Урысыер — Голландиер — 33:27 (18:13). Тыгъэгъазэм и 18-м Данием щызэдешIагъэх.

Урысыер: къэлэпчъэIутхэр: Седойкина, Калинина, Габисова; ешIакIохэр: Дмитриева — 3, Ведехина — 6, Бобровникова — 3, Самохина — 3, Макеева — 2, Фомина — 2, Сабирова — 3, Ильина — 2, Малошенко — 1, Манагарова — 5, Маслова, Кожакярь — 3, Илларионова.

Европэм изэнэкъокъу я 5-рэ чIыпIэр къыщыдэхыгъэным фэгъэхьыгъэ ешIэгъум Урысыемрэ Голландиемрэ щызэIукIагъэх. ТихэшыпыкIыгъэ командэ финалныкъом хэхьан ылъэкIыгъэп —Даниер къытекIуагъ. ЕшIэгъур зэраухыгъэм лъыпытэу тренер шъхьаIэу Амброс Мартин иIэнатIэ IуагъэкIыгъ. Тикомандэ игъусэу Данием щыIэ Алексей Алексеевыр тренер шъхьаIэу агъэнафи, командэр зэIукIэгъум фигъэхьазырыгъ. А. Алексеевыр «Лада» Тольятти итренер шъхьаI.

Голландием икомандэ анахь лъэшхэм ащыщ. Бэрэ ыпэкIэ елъы, къэлапчъэм Iэгуаор дидзэ­ным пае шIыкIэшIухэр псынкIэу къегъотых. Тибзылъфыгъэ хэшыпыкIыгъэ командэ ипащэхэм ар къыдалъыти, текIоныгъэм фэбэнагъэх.

Полина Ведехинар, Юлия Ма­нагаровар, шэнышIу зэрафэхъу­гъэу, хъагъэм Iэгуаор дадзэзэ, къахэщыгъэх. Владлена Бобровниковар, Дарья Дмитриевар, Ека­терина Ильинар, нэмыкIхэри псынкIэу апэкIэ илъыхэзэ, Iэ­гуаор дадзэщтыгъ. ЗэгурыIоныгъэ ахэлъэу шIыкIабэ зэрагъэфедагъэм ишIуагъэкIэ типшъашъэхэм текIоныгъэр къыдахыгъ.

Виктория Калининар къыхахыгъ

Мыекъуапэ щапIугъэ Виктория Калининар къэлэпчъэIут анахь IэпэIасэхэм ахалъытэ, дунаим щыцIэрыIу. В. Калининар Голландием зыдешIэм, цыхьэшIэгъоу къэлапчъэм Iутыгъ, бэрэ Iэгуаор зэкIидзэжьыгъ. Ащ дакIоу, ти­командэ ыпэкIэ илъынымкIэ зэ­хэ­щэн Iофыгъохэр псынкIэу, щысэ тепхынэу ыгъэцэкIагъэх.

ЕшIэкIо анахь дэгъоу Виктория Калининар осэшIхэм къыхахыгъ, нэпэеплъ шIухьафтын къыфагъэшъошагъ.

ТихэшыпыкIыгъэ командэ Европэм я 5-рэ чIыпIэр къыщыди­хыгъ, ау ащ пае тыфэгушIорэп — медальхэм тяжэщтыгъ. Урысыем икомандэ Европэм зыкIи апэрэ чIыпIэр къыщихьыгъэп — ари тызыгъэгумэкIыхэрэм ахэтэлъытэ.

Дунаим щыцIэрыIохэ Анна Вяхиревар, Анна Сень зэрэсымаджэхэм къыхэкIэу зэнэкъо-къум хэлэжьагъэхэп.

Финалныкъор

Норвегиер — Даниер — 27:24. Франциер — Хорватиер — 30:19.

Ящэнэрэ чIыпIэр

Финалныкъом щыпхырымы­кIыгъэхэр джэрзым фэбэнагъэх. Даниер — Хорватиер — 19:25 (11:11).

Дышъэр къыдэзыхыгъэр Норвегиер — Франциер — 22:20 (14:10).