Наркотикхэр хэбзэнчъэу амыгъэзекIонхэм фэгъэзэгъэ Къэралыгъо комитетым изэхэсыгъоу тыгъуасэ щыIагъэр зэрищагъ УФ-м псауныгъэр къэухъумэгъэнымкIэ иминистрэу Михаил Мурашко.

Видеоконференцие шIыкIэм тетэу кIогъэ Iофтхьабзэм хэлэжьагъ Адыгеим и ЛIышъхьэу КъумпIыл Мурат.

Наркотикхэм апэшIуекIогъэнымкIэ 2020-рэ илъэсым нэс телъытэгъэ къэралыгъо Стратегиер зэрагъэцакIэрэм, гъэсэныгъэм иучреждениехэм ащеджэ­хэрэм наркотикхэр ыкIи психотропнэ пкъыгъохэр амыгъэфедэнхэмкIэ пшъэрылъхэр зэшIохыгъэхэ зэрэхъурэм, нэмыкI­хэми къэзэрэугъоигъэхэр атегущыIагъэх.

КъызэраIуагъэмкIэ, 2020-рэ илъэсым мы лъэныкъомкIэ хэбзэукъоныгъэ миллиони 2,3-рэ фэдиз къыхагъэщыгъ, ахэм ащыщэу процент 72,5-р хьы­лъэх е хьылъэ дэдэх.

— Зэхэщэгъэ бзэджэшIэ купхэм апэуцужьыгъэным фытегъэпсыхьэгъэ IофшIэныр нахь шIуагъэ къытэу зэхатщэ хъугъэ. Iоф мини 166-м ехъу хэбзэухъумакIохэм зэхафыгъ, хэбзэнчъэу къырагъэкIокIэу наркотик тонн 437-рэ къапкъырахыгъ, — къыIуагъ федеральнэ министрэм.

Адыгеир пштэмэ, 2019-рэ илъэсым щыублагъэу еджапIэхэм ачIэсхэм (илъэс 13 — 19 зыныбжьхэм) социальнэ-психологическэ тестирование ара­гъэкIу. Мы илъэсым эпидемиологиемкIэ Iофым изытет зэрэ­хьылъэм къыхэкIэу тестхэм язэхэщэн 2021-рэ илъэсым имэзае нэс лъагъэкIотагъ.

Комитетым къихьащт илъэсым Iоф зэришIэщт планыр зэхэсыгъом щаштагъ.

Адыгеим и ЛIышъхьэ зэфэхьысыжьхэр къышIызэ, цIыфхэм наркотикхэр амыгъэфедэнхэмкIэ, анахьэу Iэтахъохэм ыкIи ныбжьыкIэхэм, пэшIорыгъэшъ Iофтхьабзэхэм язэхэщэн мэхьанэшхо зэриIэр хигъэунэфыкIыгъ.

— Сыдэу щытми мыщ тыкъекIолIэныр тэрэзэп. Наркоманиер профилактикэ шIыгъэным фэшI къэралыгъо хэбзэ къулыкъухэм, гъэсэны­гъэм иучреждениехэм, общественнэ ыкIи дин организациехэм яIо зэхэлъэу Iоф зэдашIэн фае, — къыIуагъ КъумпIыл Мурат. Республикэм ипащэ къызэрэхигъэщыгъэмкIэ, физкультурэм, спортым, псауныгъэр гъэпытэ­гъэным мэхьанэу яIэм зыкъегъэIэтыгъэным шъолъырым мэ­хьанэшхо щыраты, а Iоф­шIэным шIогъэшхо къеты. Ащ къыдыхэлъытагъэу спорт комплексхэр, площадкэхэр ашIых, зэтырагъэпсыхьэх.

Адыгеим и ЛIышъхьэ ипресс-къулыкъу.