Чын къэралыгъуэм хыхьэ Iухьан къалэм къыщежьа узыфэм дуней псом зызэрыщиубгъурэ илъэсым нэхърэ нэхъыбэ тещIэжащ. Мы зы илъэс закъуэм дунейм гъащIэр щыумэзэхам хуэдэщ.

ЦIыхухэм я нэхъыбэр я унэм къикIи— къиплъи ямыIэу мэпсэу. Къалэшхуэхэми зыри щымыпсэужым хуэдэу фэ тетщ, уэрамхэр цIыхуншэщ, зэхэзекIуэ щIа­гъуэ щыIэжкъым. ЛэжьапIэм мыкIуэнкIэ Iэмал зимыIэхэр махуэ къэси гъуэгу тетщ, ауэ куэдри я унэ къимыкIыу лажьэ хъуащ. Зи Iуэху, зи лэжьыгъэ зыфIэкIуэдахэр гъащIэм къахуихьыну мыщхьэпэхэм тешыныхьу щIадзащ. Узыншагъэм кIэлъыплъхэм я гъащIэр къафIэмыIуэхужу цIыхухэм я щхьэпэ зэрырагъэкIынум иужь итщ.

Къэрал куэдым узышагъэм теухуауэ ягъэпса я системэр зэтекъутэным нэсащ. ЕджапIэхэм я пIэм компьютерхэр ирагъуващ. Экономикэм и щытыкIэри пщIэгъуалэу пхужыIэнукъым, зэтощащэ. Ауэ псом нэхърэ нэхъ гуащIэу узыфэм зэхиудыныщIар цIыху цIыкIум я гъащIэрщ.

«Къаплъэ нэхърэ къиплъ», жаIэ адыгэхэм. Уеплъыпэмэ, цIыхухэм зэкъуэныгъэр къазэрытеуам, фIыуэ ялъагъу­хэр хуэзэшу зэрыхъуам, цIыхум хыхьэну, цIыху зэхэтыкIэу зэхэтыну хуейуэ дэтхэнэри щIэхъуэпс зэрыхъуам гу лъыумытэнкIэ Iэмал иIэкъым. Дунейр зэщIэзыщта узыфэр къызэрежьэрэ я гъащIэм зэхъуэкIыныгъэу къыхэхъухьахэр зыхуэдэр зэдгъэщIэну дэ упщIэ зыбжанэкIэ зыхуэдгъэзащ хущхъуэ щащIэ IуэхущIапIэм и тет Абрэдж Ибрэхьим Iуйгун (45) пандемием и гъащIэм къыхилъхьа зэхъуэкIыныгъэхэм теухуауэ деупщIащ.

– Дунейр зэщIэзыщта узыфэр сыт хуэдизу къыплъэIэса? Уи унагъуэ IуэхухэмкIэ е уи лэжьапIэмкIэ (улажьэу щытмэ) сыт хуэдэ зэхъуэкIыныгъэхэр къыхилъхьа?

– ЦIыху сымаджэхэр куэд зэрыхъуам къыхэкIыу, хуабжьу дызэхуэсакъын хуейуэ зы щытыкIэ дитщ. Дэ дызыхъумэ аппаратхэм къинэмыщIауэ, сымаджэ­хэмрэ дэрэ ди дызэлъэмыIэсыну зэхуа­кум барьер дгъэуващ. Мыпхуэдэурэ дэри, ди чэнджэщэгъухэри, ди сыма­джэхэри хъума дохъур.

– Дауэ уеплърэ, мы узыфэр къызэрежьэрэ, цIыхухэр нэхъ зэкъуэт хъуа? Хьэмэрэ зэкъуича?

– Зэкъуэтыныгъэр нэхъ зэхэсщIэу сыпсэуащ. Ауэ, узыншагъэ теухуауэ зы Iуэху сытелэжьыхьурэ, сыкъэзыщIэ цIыхухэм гугъэ етыным, тегъэуным сригъэ­шащ, пэжым ухуеймэ. Мыбы пандемием къыдита стрессри щIыбгъужмэ, нэхъри дригъэшауэ жысIэфынущ.

– Дунейм щекIуэкI пандемием и ягъэкIэ уи гур щыкIуэд къы­хэкIрэ? Гузавэмрэ гужьеймрэ закъыIэщIэпхын щхьэкIэ, сыт пщIэр?

– Сигу згъэкIуэдакъым. Дунейм и тхыдэр пандемиекIэ зыщIэблащ, зигу зымыгъэкIуэдхэращ узыншэу къызэтенэнур. Пандемие нэужьым пессимист мыхъухэр зэфIэту къелынущ, Пандемием щIэблэ хуэхъу микроорганизмхэм нэужькIэ, нэхъ шынагъуэр пессимизмращ.

– Дунейр зыIэщIэзылъхьа узыфэр Iэсэ хъурэ ужьыхыжмэ, уи хьэл-щэным зэхъуэкIыныгъэ гуэрхэр игъуэтауэ укъыщIи­дзыжыну къыпщыхъурэ? Сыт абыхэм ящыщу зызымы­хъуэжынур?

– Дезинфекцие щIыныр зы щэну къысхуинэну къысщохъу. Унагъуэм, щхьэгъусэмрэ бынымрэ, гу лъатэ абы.

– Узыфэ къекIуэкIыр ужьыхы­жыпа нэужь, япэ дыдэ зэфIэбгъэкIыну узэ­жьэр е узэгупсысыр сыт хуэдэ Iуэху?

– Си ныбжьэгъухэм нэхъыбэрэ сахуэзэну, сахэтыну сыхуейщ.