Дунейр зэщIэзыщта узыфэр къызэрежьэрэ я гъащIэм зэхъуэкIыныгъэу къыхэхъухьахэр зыхуэдэр зэдгъэщIэну дэ упщIэ зыбжанэкIэ зыхуэдгъэзащ чэнджэщэгъу БланэгъапцIэ Сефа Байкал (31) пандемием и гъащIэм къыхилъхьа зэхъуэкIыныгъэхэм теухуауэ деупщIащ.

– Дунейр зэщIэзыщта узыфэр сыт хуэдизу къыплъэIэса? Уи унагъуэ IуэхухэмкIэ е уи лэжьапIэмкIэ (улажьэу щытмэ) сыт хуэдэ зэхъуэкIыныгъэхэр къыхилъхьа?

– Мы дызыхэт гузэвэгъуэм и ягъэкIэ си хэхъуэми, гъащIэм и хэхьэ-хэкIыкIэми, щэн-хабзэми зыгуэрхэ пичащ. Хамэ хэгъэгухэм къикIыу Тыркум къакIуэ цIыхухэм чэнджэщ етынращ си лэжьыгъэр. Пандемиер и щхьэусыгъуэу ди Iуэхур къэувыIащ мазэ зыбжанэ лъандэрэ. Иджы, къэрал гъунапкъэхэр къызэIуахыжащи, тIэкIу дызэпэжыжьэу дызэхущытурэ, дызэбгъэдэмыхьащэурэ, Iуэхур зэрыхъуу идогъэкIуэкI.

– Дауэ уеплърэ, мы узыфэр къызэрежьэрэ, цIыхухэр нэхъ зэкъуэт хъуа? Хьэмэрэ зэкъуича?

– Закъуэныгъэр къыслъэIэсауэ жысIэфынукъым. Къызэгъэза цIыхухэр щIэгъэкъуэн къысхуэхъуащ.

– Дунейм щекIуэкI пандемием и ягъэкIэ уи гур щыкIуэд къы­хэкIрэ? Гузавэмрэ гужьеймрэ закъыIэщIэпхын щхьэкIэ, сыт пщIэр?

– Шынагъуэшхуэу е гузэвэгъуэшхуэу жысIэфынукъым. Пандемием къыхэкIыу си дуней тетыкIэм хэлъ Iуэхугъуэ гуэр къызэтеувыIащ. Экономикэ зэтехуам къыхэкIа шынагъэм нэхъ гупсысэрей сищIащ. Къызэгъэза цIыхухэм я фIыгъэ­кIэ, ар си унагъуэм щыщхэрауи щрет, си ныбжьэгъухэрауи ирехъу, сызыдэлажьэхэрауи къыхрекI, си гур нэхъ тынш зэрысщIынум сыхэтащ, си псэр нэхъ хуиту сызэрыпсэунум сыхущIэкъуащ.

– Дунейр зыIэщIэзылъхьа узыфэр Iэсэ хъурэ ужьыхыжмэ, уи хьэл-щэным зэхъуэкIыныгъэ гуэрхэр игъуэтауэ укъыщIидзыжыну къыпщыхъурэ? Сыт абыхэм ящыщу зызымыхъуэжынур?

– Армырами хэхьэхэкIышхуэ сиIэтэкъым… Иджы нэхъри нэхъ зэкIуэцIылъ сыхъуауэ жысIэфынущ.

– Узыфэ къекIуэкIыр ужьыхыжыпа нэужь, япэ дыдэ зэфIэбгъэкIыну узэжьэр е узэгупсысыр сыт хуэдэ Iуэху?

– Си гум бырсыр имылъу сежьэу къэскIухьыну сыхуейщ.

Епсэлъар Мамхыгъ Хикмет Адал.