Коронавирусым зимыушъомбгъунымкIэ шап­хъэхэр Мыекъуапэ къызэрэщыда­лъы­тэхэрэр зыщарагъэшIэгъэ уплъэкIунхэм якIэуххэр бэ­мышIэу зэфахьысыжьыгъэх.

Мыекъуапэ имэрие ипресс­къулыкъу къызэритыгъэмкIэ, къэлэ администрацием, Роспотребнадзорым, ошIэ-дэмышIэ IофхэмкIэ Гъэ­IорышIапIэм ялIыкIохэр, Рос­гвардием иIофышIэхэр зы­хэхьэрэ купмэ общественнэ гъэшхэным, сатыум, цIыфхэм яфэIо-фашIэхэм ягъэцэкIэн афэгъэзэгъэ учреждениехэм, общественнэ транспортым санитар шапхъэхэр зэращагъэцакIэхэрэр ауплъэ­кIух.

Зэпахырэ узым зыкъызи­штагъэм щегъэжьагъэу ащ фэ­дэ купхэм псэолъэ 13500-м ехъумэ уплъэкIунхэр ащы­зэхащагъэх. Аужырэ мэзитIум къыкIоцI Урысые Фе­дерацием административнэ хэбзэукъоныгъэхэмкIэ и Ко­декс ия 206.1-рэ статья иа 1-рэ Iахь диштэу админист­ративнэ хэбзэукъоныгъэхэр зэрашIыгъэхэмкIэ протокол 200 фэдиз зэхагъэуцуагъ, материалхэр хьыкумым Iэ­кIагъэхьагъэх.

Нэгуихъохэр аIулъхэмэ, санитар шапхъэхэр къыда­лъытэхэмэ ахэм зэрагъашIэ.

«УплъэкIунхэр зыфытегъэ­псыхьагъэхэр коронавирусым пэуцужьыгъэнымкIэ шапхъэу агъэуцугъэхэр зэрагъэ­ца­кIэ­рэм гъунэ лъыфыгъэныр ары. Апэрэ чэзыоу ахэр зылъыIэ­сыхэрэр общественнэ транспортыр, сатыушIыпIэхэр, цIыф­хэм ягъэшхэн фэгъэзэгъэ организациехэр ары. ЗэкIэми, анахьэу Мые­къуапэ дэсхэу пенсием щы­Iэхэм, сыкъяджэ акъылыгъэ къызхагъэфэнэу, шапхъэу щыIэхэм адэмыхынхэу. ЗэкIэми тыпэуцужьмэ ары ныIэп коронавирусыр къызэтедгъэу­цон зытлъэкIыщтыр», — къы­Iуагъ къалэм ипащэ игуадзэу, ветеранхэм якъэлэ Совет итхьаматэу Юрий Томчак.

Нэгуихъор аIулъмэ, шап­хъэу Мыекъуапэ щагъэуцу­гъэхэр къыдалъытэмэ зыщызэрагъэшIэрэ, хэбзэукъоныгъэхэр зышIыхэрэм якъыхэгъэщын фытегъэпсыхьэгъэ Iофтхьабзэхэр джыри лъа­гъэкIотэщтых.