УФ-м и Президентэу Владимир Путиныр зыхэлэжьэрэ пресс-конференциеу тыгъуасэ зэхащагъэр мызыгъэгум адрэхэм афэдагъэп. Зэпахырэ узэу дунаир зэлъызыкIугъэм мыщи зэхъокIыныгъэхэр фишIыгъэх.

Вирусым зызэриушъомбгъурэм ыпкъ къикIыкIэ, нахьыпэрэм фэдэу журналистхэр зы чIыпIэ щаугъоинхэу хъугъэп. IэкIыб къэрал ыкIи федеральнэ къэбар- лъыгъэIэс амалхэм ялIыкIохэр Москва дунэе сатыум и Гупчэ чIэсыгъэх. Субъ­ект­хэм яжурналистхэм апае федеральнэ шъолъыр гупчэхэм чIыпIэ гъэнэфагъэхэр ащагъэпсыгъагъэх.

ПстэумкIи журналист 800-м ехъоу пресс-конференцием хэлэжьагъэхэм ащыщыгъэх Адыгеим икIыгъэхэу, респуб­ликэ гъэзетхэу «Адыгэ макъэмрэ» «Советскэ Адыгеимрэ» якорреспондентхэу Абрэдж Сэтэнаерэ Дмитрий Кизяновымрэ, къэлэ гъэзетэу «Майкопские новости» иIофышIэу Вера Корниенкэр.

Мыекъуапэ щыIэу пресс-конферениер зэрэкIорэм лъыплъагъ Адыгеим и ЛIышъхьэу КъумпIыл Мурат.

Адрэ пресс-конференциехэм афэзымыгъадэу джыри зы мыщ хагъэхьэгъагъ. Илъэс къэс къэралыгъом ипащэ «линие занкIэмкIэ» цIыфхэм зыкъыфагъэзэн амал ареты. Мыгъэ коронавирусыкIэу дунаир зэлъызыкIугъэм зызэриушъомбгъурэм къыхэкIыкIэ, а Iофтхьабзэр зэхащэнэу хъугъэп. Ащ фэшI, пэшIорыгъэ­шъэу колл-гупчэ агъэпси цIыфхэм яуп­чIэхэр, яджэпсалъэхэр къаугъоигъэх, ахэр мы Iофтхьабзэм УФ-м и Президент щылъагъэIэсыжьыгъэх.

— Илъэсэу икIырэр къызэрыкIуагъэп, зэпахырэ узэу дунаир зэлъызыкIугъэм, зэпстэумэ афэдэу, къин ар къытфишIыгъ. Арэу щытми, Iофыгъоу ащ къыздихьыгъэхэм зэрифэшъуашэм тетэу тапэгъокIышъугъ, нэмыкI къэралыгъуабэхэм анахь дэгъоуи ахэр къызэпытчыгъэх, — къы­Iуагъ Владимир Путиным.

ВВП-р проценти 3,6-кIэ къызэреIыхыгъэр, IофшIэпIэ чIыпIэ зимыIэхэм япчъа­гъэ хэпшIыкIэу зэрэхэхъуагъэр, нэмыкI щыкIагъэхэри щыIэ зэрэхъугъэр къыхигъэщыгъ, арэу щытми, лъэныкъо зэфэшъхьафхэмкIэ агъэнэфэгъагъэхэр гъэцэкIагъэ зэрэхъугъэр, зыпкъ итэу зэрэ­лъыкIуатэхэрэр къыIуагъ, пчъа­гъэхэмкIэ ахэр къыушыхьатыжьыгъэх.

Журналистхэм упчIэу къатыгъэхэм апэрэхэр медицинэм, анахьэу дунаир зэлъызыкIугъэ узым пэшIуекIогъэным псауныгъэм икъэухъумэнкIэ системэр зэрэфэхьазырым, Iофыгъоу ащ къыздихьыгъэхэм ядэгъэзыжьынкIэ зэшIохыгъэ хъухэрэм, Iэзэгъу уцхэм, вакцинэ­хэм, апэрэ медицинэ IэпыIэгъум игъэ­псын япхыгъагъэх. Владимир Путиным ахэм джэуапхэр къаритыжьызэ, коронавирусыр Урысыем къызехьэм ащ хэшIыкI зыпарэми фыримыIэу, медицинэр фэмыхьазырэу, узэребэныщтыр гъэунэфыгъуаеу, специалистхэмкIэ, сымэджэщхэмкIэ щыкIагъэхэр щыIагъэ­хэми, мэзэ заулэкIэ мымакIэу зэшIохыгъэ зэрэхъугъэр къыIуагъ.

Зэпахырэ узыр къызэолIагъэхэм ащяIэзэнхэу гупчэ 40 къызэIуахыгъ, чIыпIэ мин 277-м ехъу гъэпсыгъэ хъугъэ, врачэу ахэм ачIэтхэм япчъагъэ мини 150-м нэсыгъ, пстэумкIи медицинэм иIо­фы­шIэу ебэнырэр нэбгырэ мин 500-м ехъу.

Колл-гупчэу цIыфхэм зыкъызфагъэзагъэми гущыIэр ратыгъ. Ащ иоператор къызэриIуагъэмкIэ, зэпахырэ узэу дунаир зэлъызыкIугъэм епхыгъэу упчIабэ къатыгъ. Коронавирусыр къызэрэхагъэщырэ анализхэм ятын, врачхэм къызэря­джэщтхэм, Iэзэгъу уцхэр къазэрарамытыхэрэм, нэмыкIхэм япхыгъэ Iофыгъуа­бэхэм цIыфхэр арехьылIэх. Джащ фэдэу ежь медицинэм иIофышIэхэу вирусым ебэныхэрэм ахъщэ тедзэу къэралыгъом афигъэнэфагъэр къызэрамытыхэрэр ахэт­хэу къэралыгъом ипащэ къетхьаусыхылIэх. Хэзыгъэ имыIэу нэбгырэ пэпчъ иIофыгъо зэхафынэу, джэуап е Iэпы­Iэгъу аратынэу Владимир Путиным ариIуагъ.

Коронавирусым итемэ хэмыкIыхэзэ, вакцинэр ежь зыхаригъэлъхьагъэмэ къеупчIыгъэх. Мы уахътэм атIупщыгъэр зыхалъхьащтхэм ныбжь гъэнэфагъэ зэряIэр, ахэм ежь къазэрэхимыубытэрэр агу къыгъэкIыжьыгъ, ау ащ ыуж къэ­кIыщт вакцинэр шIокI имыIэу зыхари­гъэлъхьащтэу ары зэриIуагъэр.

Зэпахырэ узэу дунаир зэлъызыкIу­гъэм ыпкъ къикIыкIэ нэбгырабэхэм пэIудзыгъэ шIыкIэм тетэу Iоф ашIэн фаеу хъу­гъэ, кIэлэеджакIохэмрэ студентхэмрэ анахьыбэри ащ тетэу еджэх. Мы шIыкIэм интернет зэпхыныгъэм ылъэныкъокIэ Iофыгъоу щыIэхэр къыгъэнэфагъэх. Къо­джэ псэупIэхэм адэсыбэхэм ар анэсырэп, пэIудзыгъэу еджэнхэр къин къащэхъу.

Къэралыгъом ипащэ ащ джэуап къы­ритыжьызэ, 2021-рэ илъэсым ыкIэм нэс къоджэ псэупIэхэм интернет зэпхыныгъэр зэралъыIэсыщтыр къыIуагъ. Къэралыгъом ащ сомэ миллиард 12,6-рэ пэIуигъэхьанэу ыгъэнэфагъ.

Пенсиехэм афэгъэхьыгъэуи журналистхэм упчIэ къатыгъ. Зэпахырэ узым зызщиушъомбгъурэ, цIыфхэм гъотэу яIэм къызщыщыкIэрэ лъэхъаным индексациер игъо дэдэу зэрэщытым Владимир Путиным къыкIигъэтхъыгъ. 2021-рэ илъэ­сэу къихьащтым инфляциеу щыIэщтым шъхьарыкIэу пенсиехэмрэ социальнэ ахъщэ тынхэмрэ индексацие ашIыщтых. IофшIапIэ Iумытыжь пенсионерхэм страхованиемкIэ пенсиеу къафакIорэм проценти 6,3-рэ къыхэхъощт. IофшIапIэхэм аIутхэм япенсиехэми ягугъу къышIыгъ. Бюджетым амал къытымэ ахэри индексацие зэрашIыщтыгъэхэм къыфагъэзэжьыным тегущыIэх.

Лъэпкъ проектхэм япхырыщын, 2021-рэ илъэсым щыIэщт хэдзынхэм, гъомы­лап­хъэхэм ауасэ зэрэдэкIоягъэм, зекIоным изегъэушъомбгъун, нэмыкI лъэныкъуабэ­хэм афэгъэхьыгъэ упчIэхэр жур­на­листхэм къатыгъэх. Субъектэу къыз­дикIыгъэхэм яIофыгъохэм ащыщхэр Владимир Путиным къылъызгъэIэсыгъэ­хэри къахэкIыгъэх. IэкIыб политическэ зэфыщытыкIэхэми мымакIэу къакIэупчIагъэх.

Пресс-конференциер сыхьати 4-м ехъурэ кIуагъэ.

Ащ изэфэхьысыжьхэм Адыгеим и ЛIышъхьэу КъумпIыл Мурат къатегущыIэзэ, къэралыгъом ипащэ зэIухыгъэу цIыфхэм зэрадэгущыIэрэм, ахэм яIофыгъохэр зэхэфыгъэнхэм ынаIэ зэрэтетым мэхьанэшхо зэряIэр хигъэунэфыкIыгъ. Республикэм ипащэ къызэриIуагъэмкIэ, Урысыем и Президентрэ УФ-м и Правительствэрэ IэпыIэгъу къазэрэфэхъухэ­рэм ишIуагъэкIэ Iофыгъоу къаIэтыгъэхэм ащыщыбэхэр шъолъырым щызэшIуахых.

— Пресс-конференцием Iофыгъо зэфэшъхьафхэр къыщаIэтыгъэх. Ахэр къэралыгъом ишъолъырхэм зэрагъэцакIэхэрэр зэбгъэшIэныр гъэшIэгъоныгъэ, УФ-м и Президент ащ еплъыкIэу афыриIэм, пшъэрылъэу къыгъэу­цухэрэми уядэIуным мэхьанэшхо иI. Анахьэу тынаIэ зытетыдзэн фэе лъэ­­ныкъохэр гъэнэфэгъэнхэмкIэ, экономикэмкIэ ыкIи социальнэ лъэны­къомкIэ Iофхэм язытет нахьышIу шIыгъэнымкIэ мы Iофтхьабзэр амалы­шIоу щыт, — къыIуагъ КъумпIыл Мурат.

ХЪУТ Нэфсэт.