Автобус 12 гурыт еджапIэхэм аратыгъ
Федеральнэ бюджетым имылъкукIэ (сомэ миллион 30 фэдизкIэ) къащэфыгъэ автомобиль 12-мэ яIункIыбзэхэр КъумпIыл Мурат тыгъуасэ Мыекъуапэ щаритыжьыгъэх.
Адыгеим и ЛIышъхьэ автобусыкIэхэр къыплъыхьагъэх, гурыт еджапIэхэм япащэхэм адэгущыIагъ. КъумпIыл Мурат зэрэхигъэунэфыкIыгъэмкIэ, Урысые Федерацием и Правительствэ мылъку къазэрафыхигъэкIырэм ишIуагъэкIэ республикэм игурыт еджапIэхэм игъом яавтобусхэр зэблахъун алъэкIы.
Адыгеим игурыт еджапIэхэм ачIэсхэр зэкIэ ыпкIэ хэмылъэу, щынэгъончъэу автобускIэ зэращэх. Автотехникэр зэрагъэфедэн фэе пIалъэри аукъорэп. Гурыт еджапIэхэм къяпхыгъэ автобусхэм илъэси 10-м къехъу агъэфедагъэу зи ахэтэп.
Адыгэ Республикэм гъэсэныгъэмрэ шIэныгъэмрэкIэ иминистрэу КIэрэщэ Анзаур къызэриIуагъэмкIэ, республикэм автобуси 5 гъэрекIо щызэблахъугъ. Адыгеим имуниципалитетхэм ГЛОНАСС-GPS системэмрэ навигаторхэмрэ зэрыт машинэ 12 джыри тыгъуасэ аратыжьыгъ. Мы охътэ благъэм ахэр агъэфедэхэу аублэщт. Адыгеим игурыт еджапIэхэм къяпхыгъэ автобус 80-мкIэ кIэлэеджэкIо 3000-м ехъу еджапIэхэм аращалIэ.
«ТэркIэ мэхьанэшхо иI Адыгеим икIэлэеджакIохэм, анахьэу къуаджэхэм адэсхэм, гъэсэныгъэ дэгъу зэрагъэгъотынымкIэ зэфэдэ амалхэр яIэнхэм. КIэлэцIыкIухэр щынэгъончъэу еджапIэм нэсынхэм, сыд фэдэрэ уахъти экскурсие кIонхэу, творческэ, спорт Iофтхьабзэхэм, олимпиадэхэм ахэлэжьэнхэу амал яIэным», — хигъэунэфыкIыгъ Адыгэ Республикэм и ЛIышъхьэ.
Республикэр къэралыгъо программэхэм, лъэпкъ проектэу «Гъэсэныгъ» зыфиIорэм щыгъэнэфэгъэ пшъэрылъхэм язэшIохын зэрахэлажьэрэм мэхьанэшхо зэриIэр КъумпIыл Мурат къыхигъэщыгъ.