Комиссием изэхэсыгъо зэрищагъ
Адыгеим и ЛIышъхьэу КъумпIыл Мурат промышленнэ продукциер хэбзэнчъэу республикэм къызэрэщырагъэкIокIырэм пэуцужьыгъэнымкIэ комиссием изэхэсыгъоу иIагъэр зэрищагъ. Пиротехникэ продукциер хэбзэнчъэу зэрагъэзекIорэм игъогупэ пыбзыкIыгъэнымкIэ Iофтхьабзэу зэрахьэхэрэр ары анахьэу зэхэсыгъом зыщатегущыIагъэхэр.
Зэхэсыгъор къызэIуихызэ, республикэм и ЛIышъхьэ хигъэунэфыкIыгъ пиротехникэм епхыгъэ тхьамыкIагъохэр къэмыхъунхэм пае мы продукцием иIугъэкIынкIэ шапхъэу щыIэхэр къыдалъытэн зэрэфаер. ЦIыфхэм ящынэгъончъагъи, япсауныгъи ащ зэрелъытыгъэр КъумпIыл Мурат къыхигъэщыгъ.
ИлъэсыкIэ мэфэкIхэр къызыщыблагъэрэм хэбзэнчъэу зэрагъэкIорэ пиротехническэ продукциер амыщэным пхъашэу гъунэ лъафын фае. Ащ тегъэпсыхьагъэу тыгъэгъазэм и 20-м къыщегъэжьагъэу и 30-м нэс Iофтхьабзэу «Пиротехника» зыфиIорэр республикэм щызэрахьащт.
Адыгэ Республикэм и МВД экономикэ щынэгъончъэнымкIэ ыкIи къолъхьэ тын-Iыхыным пэуцужьыгъэнымкIэ и ГъэIорышIапIэ ипащэ игуадзэу Кубэщыч Мурат зэхэсыгъом къыщишIыгъэ докладым щыхигъэунэфыкIыгъ шъхьафэу щыт киоскхэм, павильонхэм е сатыу гупчэхэм ясекцие гъэнэфагъэхэм анэмыкIхэм пиротехникэр щащэн зэрэфимытхэр. Мы лъэныкъомкIэ шапхъэхэр гъэрекIо гъогогъу 12-рэ аукъуагъэу агъэунэфыгъ.
Пиротехническэ продукциер хэбзэнчъэу зэрагъакIомэ зыщызэрагъэшIэщт уплъэкIунхэр мыгъи зэхащэщтых. ППС-м илIыкIохэри, участковэ уполномоченнэхэри ахэм къахагъэлэжьэщтых. Адыгеим и ЛIышъхьэ пшъэрылъ къафишIыгъ кIэлэцIыкIухэм урамхэми, общественнэ чIыпIэхэми петардэхэр къащамыгъэонхэм нахь лъэшэу анаIэ тырагъэтынэу, машIом зыкъимыштэнымкIэ амалэу зэрахьэхэрэр агъэлъэшынэу, МЧС-м иIофышIэхэр уплъэкIунхэм къахагъэлэжьэнхэу.
Джащ фэдэу промышленнэ продукциер хэбзэнчъэу Адыгеим къызэрэщырагъэкIокIырэм пэуцужьыгъэнымкIэ комиссием къихьащт илъэсым Iофэу ышIэщтхэмкIэ планыр зэхэсыгъом щаштагъ. ЗекIо псэуалъэхэм санитар шапхъэхэр къазэращадалъытэрэм гъунэ лъыфыгъэнымкIэ республикэм ипащэ пшъэрылъ заулэ афишIыгъ. Адыгеим и ЛIышъхьэрэ Урысые Федерацием псэолъэшIынымкIэ ыкIи унэ-коммунальнэ хъызмэтымкIэ иминистрэрэ бэмышIэу зэдыряIэгъэ зэIукIэгъум зэрэщызэзэгъыгъэхэм ащыщхэр гъэцэкIэгъэнхэмкIэ муниципалитетхэм пшъэрылъ заулэ афашIыгъ.