Адыгеим и ЛIышъхьэу КъумпIыл Мурат­рэ ПАО-у «Сбербанк» зыфиIорэм и Къыблэ-КъохьэпIэ банк итхьаматэу Евге­ний Титовымрэ тыгъоснахьыпэ Адыгэ Республикэм и Правительствэ зычIэт унэм зэIукIэгъу щызэдыряIагъ. Республи­кэмрэ банкымрэ язэдэлэжьэныгъэ зэрэ­лъагъэкIотэщтым пащэхэр тегущыIагъэх.

Адыгэ Республикэм ивице-премьерэу Сапый Вячеслав, Адыгэ Республикэм и ЛIышъхьэрэ Адыгэ Республикэм иминистрэхэм я Кабинетрэ я Администрацие ипащэ игуадзэу Къонэ Заур, Адыгеим экономикэ хэхъоныгъэмрэ сатыумрэкIэ иминистрэу Шэуджэн Заур зэIукIэгъум хэлэжьагъэх.

Онлайн амалхэмкIэ фэIо-фашIэу арагъэгъотыхэрэм зягъэушъомбгъугъэн зэрэфаер ары анахьэу зэIукIэгъум зыщытегущыIагъэхэр. Республикэм и ЛIышъхьэ зэрэхигъэунэфыкIыгъэмкIэ, коронавирусым лъэшэу зыкъызыщиштэгъэ лъэ­хъаным ащ лъэшэу ишIуагъэ къэкIо.

«Коронавирусыр нахь макIэу къа­пыпкIэнымкIэ амалэу щыIэхэр икъоу дгъэфедэнхэ фае. Республикэм ичIыпIэ Iудзыгъэхэм ащыпсэухэрэми яунэ исхэу псэупIэ-коммунальнэ фэIо- фа­шIэхэм атефэрэ уасэр, хьакъулахьхэр атынэу амал яIэным мэхьанэшхо иI. Цифрэ финанс фэ­Iо-фашIэхэмкIэ Сбербанкыр пэрытныгъэ зыIыгъхэм зэу ащыщ. Адыгеим ипащэхэм республикэмрэ банкымрэ зэдэлэжьэныгъэ дэгъу азыфагу илъ зэрэхъугъэм осэшхо фашIы», — къыIуагъ республикэм и ЛIышъхьэ.

Евгений Титовым банкым амалыкIэу зэрихьэхэрэм афэгъэхьыгъэу къыIотагъ. Къыблэ-КъохьэпIэ банкым итхьаматэ къызэриIуагъэмкIэ, мы аужырэ лъэхъаным онлайн фэIо-фашIэхэм къакIэупчIэрэр нахьыбэ хъугъэ.

ЦIыфхэмрэ бизнесымрэ социальнэ IэпыIэгъу зэрарагъэгъотыщт амалхэу Урысыем и Президентэу Владимир Путиным къахилъхьагъэхэм ягъэцэкIэн банкыр зэрэхэлажьэрэм шъхьафэу тегущыIагъэх. Ащ хэхьэх бизнесым щылажьэхэрэм аратыщт лэжьапкIэхэм апае фэгъэкIотэныгъэ зиIэ чIыфэхэр къыхэгъэ­кIыгъэнхэр, цIыфхэм пIалъэ горэкIэ чIы­фэхэр амытыжьынхэу Iизын ятыгъэныр ыкIи нэмыкI­хэр. Сбербанкым къызэритыгъэмкIэ, 2020-рэ илъэсым сомэ миллион 444-рэ реструктуризацие афашIыгъ. ЛэжьапкIэм пэIухьащт чIыфэхэу проценти 2 тегъахъо зиIэхэр къаратыным къыкIэлъэIухэу заявкэ 335-рэ къаIэкIагъэ­хьагъ. Адыгеим ибизнес къэралыгъо IэпыIэгъу езыгъэгъо­тырэ программэхэм адиштэу сомэ миллион 634-м ехъурэ чIыфэхэу фэгъэкIотэныгъэ зиIэхэр къаратыгъэх.

ЗэIукIэгъум икIэух республикэм и ЛIышъхьэ Къыблэ-КъохьэпIэ банкым ипащэ зэрэфэразэр риIуагъ пандемием илъэхъан IэпыIэгъу къазэрафэхъугъэхэм фэшI ыкIи язэгъусэныгъэ тапэкIи лъагъэкIотэным ицыхьэ зэрэтелъыр къыхигъэщыгъ.

Адыгэ Республикэм и ЛIышъхьэ ипресс-къулыкъу