Урысые Федерацием и Правительствэ тыгъэгъазэм и 16-м зэхэсыгъоу иIагъэм COVID-19-р къызэутэлIагъэхэм адэлэжьэрэ социальнэ IофышIэхэм апае бюджет мылъку Адыгэ Республикэм къыфыхагъэкIынэу щаухэсыгъ.

Сомэ миллион 1,2-у Урысые Федерацием и Правительствэ иIэпэчIэгъэнэ фонд къыхагъэкIыщтыр социальнэ фэIо-фашIэхэм ягъэцэкIэн фэгъэзэгъэ стационар организациехэмрэ отделениехэмрэ яIофышIэхэм яотпускнойхэм апэIуагъэхьащт, отпуск щымыIагъэхэм компенсациехэр аратыщт.

Урысые Федерацием и Правительствэ ыштэгъэ унашъор къахэлъхьэгъэным кIэщакIо фэхъугъэр Урысые Федерацием и Федеральнэ ЗэIукIэ бюджет мылъкур атегощэгъэнымкIэ икомиссие ары. Адыгеим ыцIэкIэ Къэралыгъо Думэм идепутатэу, Урысые политикэ партиеу «Единэ Россием» хэтэу Владислав Резник ащкIэ ишIуагъэ къызэригъэкIуа­гъэр шъугу къэтэгъэкIыжьы.

«Зэпахырэ узым лъэшэу зыкъызи­штагъэм щегъэжьагъэу Адыгеим исоциальнэ, имедицинэ IофышIэхэм бэ атегъэуагъэ хъугъэр. Коронавирусыр къызэутэлIагъэхэми, ащ фэдэ щынагъо зышъхьащытхэми къадекIо­кIыхэзэ, ахэм мафэ къэс ящыIэныгъэ щынэгъуапIэ рагъэуцо. Бэмэ отпуск къарамытыгъэу Iоф ашIэ. КоронавирусымкIэ Iофхэр джыри зэрэхьылъэм къыпкъырыкIыхэзэ, бюджет мылъкур атегощэгъэнымкIэ комиссиеми, Урысыем и Правительстви шъолъырхэм мылъку тедзэ джыри къаратыным Iоф дашIэщт», — къыIуагъ Владислав Резник.

Шъугу къэтэгъэкIыжьы социальнэ IофышIэхэм яотпускхэм апэIуагъэ­хьанэу, отпуск щымыIагъэхэм компенсацие аратынэу сомэ миллиони 3,4-рэ хъурэ мылъку тедзэ пандемием илъэ­хъан къызэратIупщыгъэр.