Медицинэм имызакъоу, коронавирусым ебэныгъэнымкIэ общественнэ организациехэм, къулыкъу зэфэшъхьафхэм ыкIи политикэ партиехэм шIушIэ Iофтхьабзэхэр зэхащэх. Ахэм ащыщ партиеу «Единая Россия» зыфиIорэм ишъолъыр къутамэ.

Социальнэ купхэм ахэхьэрэ унагъо­хэм гъомылэпхъэ Iахьхэр анэгъэсыгъэ­нымкIэ республикэм щызэхащэгъэгъэ шIушIэ Iофтхьабзэм партием иволонтерхэри хэлэжьагъэх. Медицинэм иучреждениехэм автомобильхэр аIэкIэгъэ­хьэгъэныр партием ишъолъыр къутамэ зэшIуихыгъэхэм ащыщ.

Сихъу Ахьмэд — Адыгэ Республи­кэм имедицинэ IэпыIэгъу псынкIэ истанцие ыкIи медицинэ катастрофэхэмкIэ и Гупчэ иврач шъхьаI:

«2020-рэ илъэсым ижъоныгъокIэ мазэ Урысые Федерацием и Правительствэ иунашъокIэ медицинэ IэпыIэгъоу цIыфхэм ядгъэгъотырэр нахьышIу хъуным пае автомобиль 11 къытфатIупщыгъагъ. Ащ кIыгъоу шIушIэ Iофтхьабзэу «Врачхэр тхьаегъэпсэух» зыфиIорэм къыхиубытэу партиеу «Единэ Россием» ишъолъыр къутамэ реанимобиль къытитыгъ. Ащ лъэшэу ишIуагъэ къытэкIыгъ, сыда пIомэ, цIыфым IэпыIэгъу псынкIэ егъэгъотыгъэнымкIэ ищыкIэгъэ медицинэ аппаратхэр икъу фэдизэу ащ хэтых: тхьабылхэм жьы къязгъэщэщтыр, дефибрилляторхэр, кислород жьы къэкIуапIэхэр, нэмыкI Iэмэ-псымэхэр. Реанимобилым чэщ-зымафэм дэкIыгъо 15 фэдиз МыекъуапэкIэ ешIы. IэпыIэгъу псынкIэм исыд фэдэрэ амалхэмкIи тэгъэфедэ, ковид сымаджэхэми афэтэ­гъакIо».

Лъэустэнджэл Роз — Адыгеим зэпахырэ узхэмкIэ иклиническэ сымэ­джэщ игоспиталь иврач шъхьаIэ иIэнатIэ егъэцакIэ:

«Пандемиер къызежьэм автомобильхэм тызэрафэныкъор лъэшэу зэхэтшIагъэ. Сыда пIомэ врачхэр ядэжь мыкIожьхэу сымэджэщым хэт общежитием зэрэщыпсэущтыгъэхэм имызакъоу Мые­къопэ районым ит хьакIэщхэм ащыщхэм аращэлIэжьыщтыгъэх. Ахэр IофышIэ къэт­­щэнхэм пае тиIэ автомобильхэм анэмыкIэу джыри транспорт зэрэтищыкIагъэр къэнэфагъ. Мыщ дэжьым партиеу «Единэ Россием» ишъолъыр къутамэ къытитыгъэ автомобилэу «Лада-Вестэм» ишIогъэшхо къэкIуагъ. IэпыIэгъур игъо шъыпкъэу къытIэкIэхьагъ. Iэзэгъу уцхэм якъэщэнкIи ар тэгъэфедэ. Непэ врачхэр язакъоу пчэгум итхэп. Правительствэм, партием, волонтерхэм яIэпыIэгъу ин зэхэтэшIэ. Ковидым ебэныгъэнымкIэ зэшIотхырэ IофшIэным зыкIыныгъэ къыт­хилъхьагъ».

КIыкI Нуриет — Адыгэ Респуб­ликэм игимназие ипащ:

«Социальнэ купхэм апае агъэхьазырыгъэгъэ гъомылэпхъэ Iахьхэр Адыгэ республикэ гимназием къыращэлIэгъагъэх, щагъэхьазырыгъагъэх. Мы шIушIэ Iофтхьабзэм ти­еджапIэ икIэлэегъаджэхэр чанэу зэ­рэхэлэжьагъэхэм фэдэу, партиеу «Единэ Россием» ишъолъыр къутамэ иволонтерхэми гъомылэпхъэ Iахьхэм язэбгырыщынкIэ яшIуагъэ къагъэ­кIуагъ. Общественнэ гуетыныгъэм, непэ фэдэ уахътэм зыч-зыпчэгъоу тызэготын, тызэдеIэжьын зэрэфаем ищысэу ар хъугъэ. IэпыIэгъу зищыкIэгъэ цIыфхэмкIэ ар псапэ».

Тэу Замир.