COVID-19-м пэшIуекIорэ вакцинэу «Гам-Ковид-Вак» зыфиIорэр, зэреджэхэрэр «Спутник V», ятIонэрэ къэщэгъум ипчъагъэкIэ дозэ 500 хъоу Адыгеим къащагъ. Тыгъэгъазэм и 11-м 200-р, тыгъэгъазэм и 13-м къыкIэлъыкIогъэ 300-р республикэм къынэсыгъ.

Сымэджэщхэм, поликлиникэхэм, амбулаториехэм ащылэжьэрэ врачхэм, медицинэм иIофышIэхэм вакцинэр ахалъхьанэу рагъэ­жьагъ. Адыгэ Республикэм псауныгъэр къэухъумэ­гъэнымкIэ и Министерствэ иштат хэмыт врач- эпидемиолог шъхьаIэу Шъэожъ Альбинэ къызэриIуагъэмкIэ, коронавирусым пэшIуекIорэ вакцинэр нэбгырэ мин 89-мэ Урысыем ащыхалъхьэгъах.

«Медицинэм иIофышIэхэм ямызакъоу, гъэсэ­ныгъэм ыкIи социальнэ лъэныкъохэм ащылажьэхэрэм, дзэкъулыкъушIэхэм прививкэр афашIы. Джащ фэдэу ятIонэрэ къэщэ­гъум щыщэу Адыгеим нэбгырэ 65-мэ прививкэр ащыхалъхьэгъах. Апэрэ къэщэгъум вакцинэм идозэ 42-рэ Iоныгъо мазэм республикэм къыIэкIэхьэгъагъ. Прививкэ ашIыгъэхэм зэкIэми япсауныгъэ изытет дэгъу. Апэрэ уколым ыуж мэфэ 21-рэ тырагъашIэшъ ятIонэрэр ахалъхьэ. Вакцинэм цыхьэ фэпшIынэу щыт. ЭпидемиологиемкIэ ыкIи микробиологиемкIэ Лъэпкъ ушэтыпIэ Гупчэу академикэу Н.Ф. Гамалей ыцIэ зыхьырэм вакцинэр щагъэхьазырыгъ. ИнвестициехэмкIэ Урысые фондыр ащ иIэпыIэгъугъ. Илъэс 18-м щегъэжьа­гъэу илъэс 60-м шIомыкIыгъэхэм ар зыхалъхьэ хъущт. Медицинэ шэпхъэ гъэнэфагъэхэр пылъых: хэужъыныхьэгъэ узхэр зиIэхэу ахэр къызщыбырсырырэм, зэпахрэ узхэмкIэ сымаджэхэм, бзылъфыгъэ лъэрымыхьэхэм, сабый къэхъу­гъакIэхэр зыгъашхэхэрэм вакцинэр ахаплъэ хъущтэп».

Шъэожъ Альбинэ къызэриIорэмкIэ, зэхэт Мыекъопэ къэлэ поликлиникэм прививкэхэр джыдэдэм щашIых. КоронавирусымкIэ сыма­джэхэм яIэзэрэ врачхэр «зонэ плъыжьым» къызикIыжьхэкIэ, тхьамэфитIу тешIагъэу вакцинэр ахалъхьэ хъущт ныIэп.

«Сэ сшъхьэкIэ коронавирусымкIэ сысымэ­джагъ, тхьамафэрэ ныкъорэ хъугъэ сыкъыздэкIыжьыгъэр, пэтхъу-Iутхъу е грипп къызэрыкIохэм ар афэдэп», — еIо Шъэожъ Альбинэ. — Вакцинациер цIыфхэм ягъэшIыгъэн фае. Сымэджэгъахэхэм ар зыхалъхьанэу щытэп. Анахь макIэмэ мэзищ, анахьыбэмэ илъэсныкъо тешIэнэу щыт. Сымэджагъэм лъыр зитыкIэ ковидым фэхъугъэ антителахэр иIэхэу къыгъэлъэгъощт. Ахэр зыфэмыхъугъэхэр ары ныIэп вакцинэр зыхэзылъхьэ хъущтхэр. Сызысымэджагъэм тхьамэфищ зытешIэкIэ, антителахэр симыIэу къызычIэкIыкIэ, вакцинэр сэри зыхязгъэлъхьащт».

АдыгеимкIэ вакцинэр зыхалъхьагъэхэм аныбжьыр гурытымкIэ илъэс 30-м щыублагъэу илъэс 50-м нэс къыхеубытэх. Илъэс 24 — 25-рэ зыныбжь зырызхэри къахэкIыгъэх. Мы купхэм ахахьэхэ­рэм ежьхэм яшIоигъоныгъэкIэ ар зыхалъхьэ.

Тэу Замир.