COVID-19-м пэшIуекIорэ апэрэ вакцин
КоронавирусыкIэр цIыфым къемыолIэнымкIэ апэрэ вакцинэу дунаим къыщаугупшысыгъэ «Спутник V-р» шышъхьэIу мазэр ары УФ-м псауныгъэр къэухъумэгъэнымкIэ и Министерствэ зитхыгъэр.
Ар эпидемиологиемкIэ ыкIи микробиологиемкIэ Лъэпкъ ушэтыпIэ гупчэу Н. Ф. Гамалей ыцIэ зыхьырэмрэ инвестициехэмкIэ Урысые фондымрэ, цIыфым «иаденавирус» лъапсэу фашIызэ, зэдашIыгъ.
«Спутник V-м» гъэмафэм тIогъогогъурэ ушэтынхэр иIагъэх. Зыныбжь илъэс 18 икъугъэу, ау 60-м шIомыкIыгъэу шIоигъоныгъэ зиIэхэр ары зыхалъхьагъэр. Нэужым ахэм яиммунитет ыгъэпытагъ ыкIи антителахэу «SARS-CoV-2-кIэ» зэджагъэхэр яIэ хъугъэ.
РАН-м иакадемикэу, цIыфхэм япсауныгъэ икъэухъумэн дэлажьэрэ научнэ ушэтыпIэ Лъэпкъ институтэу Н.А. Семашко ыцIэ зыхьырэм инаучнэ пащэу Рамил Хабриевым къызэриIуагъэмкIэ, зыми емыпхыгъэ комитетэу мы вакцинэм иушэтын уасэ къыфэзышIыгъэм ар зэрэщынэгъончъэр ыкIи коронавирусым пэшIуекIогъэнымкIэ ишIуагъэ къызэрэкIорэр къыушыхьатыгъ. Вакцинэм процент 96,2-у федэ къеты. Мы комитетым медицинэм иIофышIэхэр, шIэныгъэлэжьхэр хэтых, мыщ фэдэ осэшIынхэм хэшIыкIышхо афыряI. Клиническэ ушэтынхэр зэрэзэхащэгъэ шIыкIэхэр ахэм ауплъэкIугъ.
Антителэу «SARS-CoV-2-м» лъэшыщэу зиушъомбгъуным ищынагъо зэрэщыIэм фэшI нэмыкI вакцини Iоф дашIэ. Зэпахырэ узэу дунаир зэлъызыкIугъэм пэшIуекIогъэным вакцинэ пчъагъэ ищыкIагъ. Прививкэу, пэм рагъэткIорэ ткIопсым фэдэу гъэпсыгъэр Индиер, Китай ыкIи Урысыер ары зыщэрэр. Тэ тихэгъэгукIэ ащ фэдэ вакцинэм Iоф дэзышIэрэр вирусологиемкIэ ыкIи биотехнологиемкIэ научнэ гупчэу «Вектор» зыфиIорэр ары. Роспотребнадзорым къызэритырэмкIэ, ушэтын заулэ ащ зэпичыгъах.
Урысыем ишъолъырхэм етIупщыгъэу аIэкIагъахьэрэ «Спутник-V-р» анахьыбэу шIуагъэ къэзытырэ вакцинэу дунаим щаштагъ. ХэлъхьагъуитIоу ар гощыгъэ. ЯтIонэрэм ыуж мэфэ 21-рэ зытешIэкIэ, цIыфым ыпкъышъолъ иммунитетыр щыгъэпсыгъэ мэхъу. Клиническэ ушэтынхэм къызэрагъэнэфагъэмкIэ, апэрэ хэлъхьагъум ыуж мэфибл зытешIэкIэ процент 91,4-у иммунитетыр мэпытэ, ятIонэрэм ыуж процент 95-м нэсы.
Апэу мы вакцинэр зыхалъхьэхэрэр врачхэр, кIэлэегъаджэхэр, социальнэ IофышIэхэр ары.
КъэкIуапIэр:https://lenta.ru/articles/2020/I2/09/privivka/