Урысыем псэо­лъэ­шIы­нымкIэ ыкIи унэ-коммунальнэ хъызмэтымкIэ иминистрэу Ирек Файзуллинымрэ Адыгеим и ЛIышъ­хьэу КъумпIыл Муратрэ тыгъуасэ Москва зэIукIэгъу щызэдыряIагъ. Лъэпкъ проектхэмрэ къэралыгъо програм­мэхэмрэ Адыгэ Рес­публикэм зэрэща­гъэ­цакIэхэрэм афэ­гъэхьыгъэу рес­публикэм ипащэ зэIукIэгъум хэлажьэхэрэм къафиIотагъ.

Проект заулэмэ ягъэцэкIэнкIэ федеральнэ гупчэм республикэм IэпыIэгъоу къыритыщтым епхыгъэ Iофыгъохэми атегущыIагъэх. ГущыIэм пае, федеральнэ проектэу «Псы къабз» зыфиIоу сомэ миллион 769-рэ зыпэIухьащтым, 2019 – 2024-рэ илъэсхэм ателъытагъэм хэплъагъэх. НепэкIэ проектым тетэу зашъохэрэ псыр аIэкIэзыгъэхьэрэ псэолъитIумэ яшIын аухыгъ. Республикэм ипащэ игъо ылъэгъугъ 2024-рэ илъэсымкIэ федеральнэ бюджетым илимитхэр 2021-рэ илъэсым хьыжьыгъэнхэу. Псыр нахьышIоу аIэкIэгъэхьэгъэнымкIэ Iофтхьабзэхэу къихьащт илъэсым зэрахьанхэу рахъухьэхэрэр джащыгъум икъоу агъэцэкIэнхэ зэралъэкIыщтыр зэIукIэгъум щыхагъэунэфыкIыгъ.

ЗэIукIэгъум хэлэжьагъэхэм Мыекъуа­пэ дэт укъэбзалъэхэм ягъэкIэжьын лъыгъэкIотэгъэным епхыгъэ Iофыгъоми анаIэ тырагъэтыгъ. 1965-рэ илъэсым агъэпсыгъэ псэуалъэр джырэ уахътэм диштэжьырэп. Урысые Федерацием и Правительствэ IэпыIэгъу къафэхъузэ, 2019-рэ илъэсым программэ гъэнэфагъэм ар хагъэхьагъ. Проектым игъэцэкIэн сомэ миллиарди 8,9-м ехъу пэIухьащт. Сомэ миллиард 1,3-м ехъу зыпэIухьащт апэрэ комплексым иапэрэ чэзыу 2019-рэ илъэсым къыщегъэжьагъэу 2021-рэ илъэсым нэс аухынэу рахъухьэ. НепэкIэ сомэ миллион 826-р къызфагъэфедэгъах. Республикэм и ЛIышъхьэ зэрэхигъэунэфыкIыгъэмкIэ, Урысыем псэолъэшIынымкIэ ыкIи унэ-коммунальнэ хъызмэтымкIэ и Министерствэ къазэрадыригъэштагъэр бюджет мылъкур къыхэгъэкIыгъэным ехьылIэгъэ Iофыгъом изэшIохынкIэ IэпыIэгъу къафэхъущт, апэрэ комплексым иятIонэрэ чэзыу игъэпсын заублэщтыр нахь къыгъэблэгъэщт.

ЗэIукIэгъум джащ фэдэу къалэу Мыекъуапэ иурамэу Хьахъуратэм ыцIэ зыхьырэм ощхыпсыр зэрылъэдэщт псэуалъэ щыгъэпсыгъэным иIофыгъуи щытегущыIагъэх. Нэбгырэ мин 20-м ехъу мыщ щэпсэу. Ахэм яунэхэм, ящагухэм, яхапIэхэм бэрэ псыр къакIэо. Проектым къызэрэщыдэлъытагъэмкIэ, 2022-рэ илъэсым IофшIэнхэр рагъэжьэщтых. Мы Iофыгъом социальнэ мэхьанэшхо зэриIэр къыдилъытэзэ, Адыгеим и ЛIышъхьэ Урысые Федерацием псэолъэшIынымкIэ ыкIи унэ-коммунальнэ хъызмэтымкIэ и Министерствэ игъо филъэгъугъ мылъку къыхэгъэкIыгъэным, зы илъэскIэ нахь пасэу, 2021-рэ илъэсым мы псэуалъэм ишIын фежьэнхэм яхьылIэгъэ Iофыгъор къахилъхьанэу.

Мыекъуапэ ипсэуалъэхэу зигугъу къэтшIыгъэхэр федеральнэ инвестиционнэ программэм хагъэхьанхэу игъо алъэгъугъ.

«ПсэолъэшIынымкIэ проектхэм ягъэцэкIэн, къалэхэр нахь зэтегъэпсыхьэгъэнхэм, цIыфхэм ящыIэкIэ-псэукIэ зыкъегъэIэтыгъэным атегъэ­псыхьагъэу лъэныкъуабэхэмкIэ непэ Iоф тэшIэ. Урысыем псэолъэшIынымкIэ ыкIи унэ-коммунальнэ хъызмэтымкIэ и Министерствэ IэпыIэгъу къытфэхъузэ, зэIукIэгъум зигугъу къыщашIыгъэ Iофтхьабзэхэр зызэрахьэхэкIэ, республикэм ыпашъхьэ ит пшъэрылъхэм ащыщхэр псынкIэу зэшIохыгъэ хъущтых», — къыIуагъ КъумпIыл Мурат.

ЗэIукIэгъум икIэух Урысые Федерацием псэолъэшIынымкIэ ыкIи унэ-коммунальнэ хъызмэтымкIэ иминистрэу Ирек Файзуллиным отраслэ программэхэм ягъэцэкIэнкIэ республикэм зэдэ­лэжьэныгъэ пытэ федеральнэ гупчэм къыдыриIэным мэхьанэшхо зэриIэр хи­гъэунэфыкIыгъ.

Адыгэ Республикэм и ЛIышъхьэ ипресс-къулыкъу