КоронавирусыкIэу дунаир зэлъызыкIугъэм пэшIуекIорэ вакцинэм ихэлъхьан Урысыем щырагъэжьагъ. УФ-м и Президентэу Владимир Путиным иунашъокIэ зэпахырэ узым пэшIуекIорэ Iофтхьэбзэ анахь инэу медицинэм зэхищагъэр ежьагъ. Научнэ институтэу Н.Ф. Гамалей ыцIэ зыхьырэм ышIыгъэ вакцинэу «Спутник V» зыфи­Iорэр вирусыр къеолIэным ищынагъо анахь зышъхьащыт купхэм ахалъхьащт. Ащ дакIоу Урысыеми зэрэдунаеуи нэмыкI препаратхэм якъэгъотын Iоф щадашIэ. Вакцинэхэр сыда зэрэзэтекIыхэрэр, иммунитетыр ахэм сыд фэдизкIэ агъэпытэщта? Ахэм джэуап къариты­жьыгъ биологие шIэныгъэхэмкIэ докторэу, США-м иуниверситетэу Джордж Мэйсон ыцIэ зыхьырэм системнэ биологиемкIэ иеджапIэ ипрофессорэу, РАН-м имедикэ-генетическэ научнэ гупчэ иIофышIэу Анна Барановам. — Урысыем вакцинитIу иI. Зыр Н.Ф. Гамалей ыцIэ зыхьырэ институтым иеу «Спутник V» зыфиIорэр, адрэр «пептиднэ» зыфаIорэу Новосибирскэ къыщаугупшысыгъэ «Векторыр» ары. Ахэр зэрэгъэпсыгъэхэмкIи, зэрэзепщэн фаемкIи зэте­кIых. Новосибирскэ къыщаугупшысыгъэр нахь щынэгъон­чъэу къэлъагъо, «Спутник V-м» нахьыбэу шIуагъэ къытынэу къысшIошIы. Анахь шъхьаIэр, непэ ар къызIэкIэгъэхьэгъошIу зэрэхъугъэр ары. Урысыем си­сыгъэмэ ар зыхязгъэлъхьэщтыгъагъ. Сэ сыныбжьыкIэ гурытхэм сащыщ, псауныгъэ дэгъу сиI. ЦIыфхэм сахэмыхьэу унэм сисыми, бункерым сычIэсэп, тучаным сэкIо, паркыр къэсэкIухьэ. Арышъ, вирусыр къэсыубытыным ищынагъо сшъхьащыт, прививкэ шIыныр чыжьэу зэ­кIэсымыхьэмэ нахьышIу. Сянэ илъэс 84-рэ ыныбжь, унэм икIырэп, тучаным кIорэп, ищыкIагъэр ыкъо къыфехьы. Ащ тетэу зыщысыр бэшIагъэ, джыри мэзэ зытIущ нэмыIэмэ зэпичын ылъэкIыщт. Сянэ ипсауныгъэ тIэкIу нэмыIэми къызыщыкIэкIэ лъэшэу мэгумэкIы. Арышъ, Новосибирскэ къыщаугупшысыгъэ вакцинэр къежьэ­фэкIэ ащ тетэу унэм исыныр нахь тэрэз. «Аденовирус» зыфатIорэр цIыфым ивирус, макIэу инфекцие къыздехьы. Ащ иммунитетыр ыгъэпытэн ыкIи охътэ кIыхьэм ащ тетэу ыIыгъын елъэкIы. «Спутник V-р» тIогъогогъурэ хэплъхьанэу гощыгъэ. Апэрэ хэлъхьагъур «я 26-рэ аденовирусым» пкъышъолым хехьэ, ятIонэрэр «я 5-рэ аденовирусым» къыпкъырэкIы. Иммунитетыр къызэкIэкIуагъэми, «аденовирусым» зэрэIукIэгъагъэр пкъышъолъым щыгъупшэжьырэп. Коронавирусым пэшIуекIорэ вакцинэр пшIыныр шIокI зимыIэ Iофа? Мы упчIэр социологическэу щыт. ГущыIэм пае, США-р къэралыгъо шъхьафит. ЗэкIэ кIэлэцIыкIухэм прививкэхэр афашIынхэу атырагъэпытыхьэ, ау ныр ащ фэмыяхэу, лъэшэу къыпэшIуекIомэ, егъэзыгъэкIэ ашIыщтэп. Ары шъхьае, ащ фэдэ кIэлэцIыкIур къэралыгъом имылъкукIэ ыIыгъ еджапIэм аштэщтэп. Унэе еджапIэхэр щыIэх, ау ахэр лъэпIэ дэдэх. Прививкэхэм уапэшIуекIон плъэкIыщт зы илъэси, илъэси­тIуи, ау сыдэу щытми умышIымэ мыхъунэу щыIэныгъэм уригъэзыщт. Австралием иавиакомпаниехэм ащыщ горэм коронавирусым пэшIуекIорэ вакцинэр зыхязымыгъэлъхьагъэр самолетым рамыгъэхьащтэу макъэ къыгъэIугъ. Австралием сымыкIоми сэрмэ сыщыIэшъущт. Ары шъхьае, аущтэу Урысыем е нэ­мыкI къэралыгъо горэм ышIымэ? КъэкIуапIэр: https://www.rbc.ru/society/16/11/2020/5fb2a7947102977006b