Предприятиеу «Майкопводоканалым» къызэритырэмкIэ, Адыгеим икъушъхьэ чIыпIэхэм ощхи оси зэращымыIэм къыхэкIыкIэ зашъохэрэ псэу аугъоирэр хэпшIыкIэу нахь макIэ хъугъэ. Ащ иушъхьагъукIэ псыр цIыфхэм зэраIакIагъахьэрэм зэпыугъо фэхъу.

Социальнэ мэхьанэ зиIэ учреждениехэм зэрифэшъуашэу яIофшIэн зэхащэн амал яIэным фэшI рес­публикэм икъэ­лэ шъхьаIэ псыр къызэрэфатIупщырэр охътэ гъэ­нэфагъэм те­лъытагъэу щыт.

Зэпыугъо фэмыхъоу цIыфхэм псыр къазыIэкIэхьащтыр мафэм гъогогъуитIу: пчэдыжьым сыхьатыр 7-м щыублагъэу 9-м нэс ыкIи пчыхьэм сыхьатыр 7-м щегъэжьагъэу 9-м нэс. Адрэ уахътэм псым икъэтын зэпыугъо фэхъущт. Къушъхьэхэм ащыIэ псыубытыпIэхэм арыт псыр шапхъэхэм адиштэу зыхъу­жьыкIэ Iофхэм язытет зыпкъ иуцожьыщт.

Мы гумэкIыгъор дэгъэзыжьыгъэным фэшI Мыекъопэ псы­убытыпIэм ишIын республикэм щылъагъэкIуатэ. АР-м и Правительствэ къызэрэщаIуагъэмкIэ, проектыр процент 97-кIэ хьазыр. Ар гъэцэкIагъэ зыхъукIэ Адыгеим икъэлэ шъхьаIэрэ Мыекъопэ районымрэ зэпыугъо фэмыхъоу псыр аIэкIэгъэхьэгъэнымкIэ пшъэрылъыр зэшIохыгъэ хъущт.