IофшIэнымкIэ цIыфхэм фитыныгъэу яIэхэр къэухъумэгъэнхэм, лэжьапкIэм итынкIэ Iофыгъохэм ахэплъэгъэным, хэбзэIахьхэмрэ къаугъоихэрэмрэ афэгъэхьыгъэ хэбзэгъэуцугъэр гъэцэкIагъэ зэрэхъурэм афэгъэзэгъэ Межведомственнэ комиссиеу АР-м щызэхащагъэм тыгъуасэ зэхэсыгъо иIагъ. АР-м и Правительствэ и Тхьаматэу Геннадий Митрофановым ар зэрищагъ.

Нахьыбэу хэбзэIахьхэр ары зытегущыIагъэхэр. Игъом ар зымытыхэрэр къычIэгъэщы­гъэнхэм пае хэбзэухъумэкIо ыкIи хэбзэIахь къулыкъухэм хъызмэт­шIапIэхэр зэрауплъэ­кIухэрэм фэгъэхьыгъэу къэгущыIагъ АР-м и МВД экономикэ щынэгъон­чъэнымкIэ ыкIи къо­лъхьэ тын- Iыхыным пэшIуекIогъэнымкIэ и ГъэIорышIапIэ иотделэу хэбзэIахьхэм алъэныкъокIэ бзэджэшIагъэ зезыхьэ­хэрэм апэуцужьыгъэным ыкIи бюджет ахъщэм икъэухъумэн фэгъэзагъэм ипащэу Мэрэтыкъо Бислъан.

Ащ къызэриIуагъэмкIэ, илъэ­сэу икIырэм хъызмэтшIэпIитфымэ уплъэкIунхэр ащызэхащэнхэу агъэнэфэгъагъ. А Iоф­шIэныр джыри аухыгъэп. БлэкIыгъэ илъэсым агъэнэфэгъагъэхэм ащыщ гъэтхэпэ мазэм аухыгъ. БылымIус зэхэгъэкIухьагъэ къы­дэзгъэкIырэ хъызмэтшIапIэр ары ар зыфэгъэхьыгъэр. ХэбзэIахьхэмкIэ ащ сомэ миллион 11-м ехъу телъыгъ, ау ар пIалъэу фа­гъэнэфагъэм шIомыкIэу ыты­жьыгъ.

Организациехэм федэу яIэм пае хэбзэIахьэу атыхэрэм алъэ­ныкъокIэ Iофхэм язытет къыщигъэгъозагъэх хэбзэIахьхэмкIэ Федеральнэ къулыкъум и Гъэ­IорышIапIэу АР-м щыIэм ипащэ игуадзэу Дэргушъэо Аскэрбый. 2020-рэ илъэсым иапэрэ мэзих ащ зигугъу къышIыгъэр. Федэу иIэхэм апае хэбзэIахь къэзытын фаеу республикэм организацие 1514-рэ ит. Ахэм ащыщэу 725-р ары хахъо зиIэр. БлэкIыгъэ 2019-м мыщ фэдэ иуахътэ егъэ­пшагъэмэ, ар 13-кIэ нахь макI. Зэрар ышIызэ лажьэрэр 97-рэ мэхъу. БлэкIыгъэ илъэсым иапэрэ мэзих ебгъапшэмэ, ахэр организации 7-кIэ нахьыбэ хъу­гъэх.

ХэбзэIахьхэр къызыхахыщт хахъом (налоговая база), 2019-м мыщ фэдэ иуахътэ егъэпшагъэмэ, сомэ миллион 370-рэ къыщыкIагъ. Ащ ыпкъ къикIэу хахъохэм апае къатырэ хэбзэIахьэу бюджет зэхэтым хахьэрэри сомэ миллион 74-кIэ нахь макIэ хъугъэ.

ЛэжьапкIэм итынкIэ чIыфэ зытелъ организациехэми ягугъу ашIыгъ. АР-м IофшIэнымкIэ и Къэралыгъо инспекцие организации 6-мэ ащ фэдэ чIыфэу сомэ миллион 11,15-рэ ателъэу ыгъэунэфыгъагъ. Ащ ипащэ игуадзэу Сергей Абрамцовым къызэриIуагъэмкIэ, мы уахътэм зэкIэми ар атыжьыгъ. НахьыпэкIэ къыхагъэщыгъагъэу ООО-у «Адыгейскнефтехим», ООО-у «Электромонтажсервис» зыфиIохэрэм амытыжьыгъэу джыри сомэ миллиони 4,8-рэ ателъ. ХъызмэтшIэпIитIури истыхьа­гъэх. Ащ фэшI банкротствэм фэгъэхьыгъэ федеральнэ хэбзэгъэуцугъэм къызэрэщыдэ­лъытагъэм тетэу лэжьапкIэхэмкIэ чIыфэр атыжьыщт.

2020-рэ илъэсым IофшIэнымкIэ Къэралыгъо инспекцием нэбгырэ 921-мэ зыкъыфагъэ­загъ. Ахэм ащыщэу 100-р ялэ­жьапкIэ епхыгъэ Iоф зыгъэгумэкIыщтыгъэр. ЗэкIэми ящыкIэгъэ IэпыIэгъур арагъэгъотыгъ.

ХЪУТ Нэфсэт.