Дмитрий Медведевымрэ «Единэ Россием» и Генеральнэ совет исек­ретарэу Андрей Турчакрэ общественнэ приемнэм цIыфхэр щы­рагъэблэгъагъэх. Федеральнэ гупчэр къызыхэлэжьэн фэе Iофы­гъохэмкIэ нэбгыри 8-мэ партием ипащэхэм зафагъэзагъ.

«Единэ Россием» и Генеральнэ совет исекретарэу Андрей Турчак мэфи 10-м къыкIоцI (тыгъэгъазэм и 1-м къыщегъэжьагъэу и 10-м нэс) цIыф­хэр зэрэхэгъэгоу зэрэщырагъэблэгъагъэхэмкIэ кIэуххэр зэфихьысыжьыгъэх. МэфипшIым къыкIоцI нэбгырэ мин 80-мэ депутатхэм, сенаторхэм, губернаторхэм, шъолъыр къутамэхэм ясекретархэм закъыфагъэзагъ. Ахэр анахьэу зыгъэгумэкIы­щтыгъэхэр социальнэ Iофыгъо­хэр: врачхэм яIэпыIэгъу, Iэзэгъу уцхэм зэрафэныкъохэр, псэу­пIэ-коммунальнэ хъызмэтым епхыгъэ Iофыгъохэр ары.

Андрей Турчак къызэриIуагъэмкIэ, Iофыгъохэм азыщанэр псынкIэу зэшIуахын алъэкIыгъ. Адрэ Iофыгъохэм язэшIохыкIэ хъущтхэм чIыпIэ, шъолъыр, фе­деральнэ хэбзэ Iэшъхьэтетхэр яусэщтых.

«Татарстан, Камчатскэ краим, Псковскэ хэкум, Темыр Осетием, Алтай ащыпсэухэрэр ары нахьыбэу зыкъытфэзы­гъэзагъэхэр. Шъолъырхэм ягъэ­цэкIэкIо хэбзэ Iэшъхьэтетхэм тырягъусэу цIыфхэр зыгъэгу­мэкIырэ Iофыгъохэр пIэлъэ кIэ­кIым къыкIоцI зэхэтфыщтых, федеральнэ гупчэм зэшIуихын фэе Iофыгъохэр ахэм къаха­фэхэмэ, министерствэ, ведомствэ гъэнэфагъэхэм зафэд­гъэ­зэщт», — къыIуагъ Андрей Турчак.

2013-рэ илъэсым къыщегъэ­жьагъэу партиер зызэхащэгъэ мафэм ехъулIэу цIыфхэр мэфи 10-м къыкIоцI общественнэ приемнэхэм арагъэблэгъэнхэр хабзэ хъугъэ.

«МэфипшIым къыкIоцI тихэгъэгу исхэм приемнэхэм зызэрафагъэзэгъэ Iофыгъохэр гъэцэкIэкIо хабзэм икъулыкъухэм икъоу зэрэзэхафыщтхэм, шэп­хъэ-правовой актхэм япхыгъэ унашъохэм яштэнкIэ законодательнэ хабзэм ишъолъыр къулыкъухэмрэ Къэралыгъо Ду­мэмрэ ядепутатхэм афэлъэ­кIыщтыр зэкIэ зэрашIэщтым сицыхьэ телъ», — къыIуагъ Дмитрий Медведевым.

«Тыгъэгъазэм и 1-м къыщегъэжьагъэу и 10-м нэс цIыфхэр Адыгэ Республикэм зэрэщы­рагъэблэгъагъэхэмкIэ кIэуххэр зэфахьысыжьыгъэх. Iофыгъохэм ахэплъагъэх, ахэм язэшIохынкIэ ищыкIэгъэ амалхэр зэрахьагъэх, — къыIуагъ Адыгеим и Къэралыгъо Совет — Хасэм и Тхьаматэ игуадзэу, партием и Тхьаматэу Д. А. Медведевым ирегион общественнэ приемнэ ипащэу Шъао Аскэр. — ГущыIэм пае, хьафизэхэм атегъэ­псыхьэгъэ Адыгэ республикэ тхылъеджапIэм ипащэу Ирина Корниенкэм тыгъэгъазэм и 1-м приемнэм зыкъыфигъэзагъ. Адыгеим и ЛIышъхьэу, партием ишъолъыр къутамэ и Секретарэу КъумпIыл Мурат ащ илъэIу изэшIохын ыуж ихьагъ. Мэфэ заулэ нахь темышIэу «Единэ Россием» хьафизэхэм я Адыгэ республикэ тхылъеджапIэ исчет сомэ мин 588-рэ къыригъэ-хьагъ. Зыфэныкъохэм якъыз­IэкIэгъэхьанкIэ ар тхылъеджапIэм фикъунэу щыт.

Мэфи 10-м къыкIоцI респуб­ликэм ис нэбгырэ 685-мэ ятхылъ­хэр къаIэкIэхьагъэх. ЦIыф­хэр зыгъэгумэкIырэ Iофыгъохэм азыщанэм ехъур зэшIуа­хыгъах. Ахэм анахьэу къащаIэтыхэрэр социальнэ Iофыгъохэр: медицинэ фэIо-фашIэхэр афызэ­хэщэгъэнхэм, цIыфхэм со­циаль­нэ IэпыIэгъу ягъэгъоты­гъэным япхыгъэхэр ары. Джащ фэдэу республикэм исхэр транс­портыр зэрагъэфедэрэм, унэ-коммунальнэ хъызмэтым епхыгъэ Iофыгъохэм агъэгу­мэкIых.

ЦIыфхэр езыгъэблэгъагъэхэр Къэралыгъо Думэм идепутатхэр, Адыгеим ыцIэкIэ Урысыем ФедерациемкIэ и Совет хэтхэр, Адыгэ Республикэм и Къэралы­гъо Совет — Хасэмрэ респуб­ликэм имуниципальнэ образованиехэм янароднэ депутатхэм я Советрэ ядепутатхэр ары. Адыгеим иминистерствэхэм, иве­домствэхэм, со­циальнэ страхованиемкIэ Фондым, пенсиехэмкIэ Фондым якъутамэхэм ялIыкIохэм, рес­публикэм РоспотребнадзорымкIэ, РосздравнадзорымкIэ и Гъэ­IорышIапIэ испе­циалистхэм, цIыфымрэ кIэлэцIыкIухэмрэ яфитыныгъэхэмкIэ Уполномоченнэхэу Адыгеим щы­Iэхэм, Урысыем июристхэм я Ассо­циациеу Адыгэ Респуб­ликэм щыIэм хэтхэм цIыфхэм яуп­чIэ­хэм джэуап къаратыжьыгъ».