Адыгэ къэралыгъо университетыр илъэс 80 зэрэ­хъу­рэм фэгъэхьыгъэу IэкIыб къэралыгъуабзэхэр зыщызэра­гъа­шIэ­рэ факультетым зэнэкъокъу зэхещэ.

Араб каллиграфиемкIэ Дунэе Iоф­тхьабзэм шIоигъоныгъэ зиIэ пстэури къыхэлэжьэн алъэкIыщт. Зэнэкъокъум иаужырэ едзыгъо тыгъэгъазэм и 18-м рекIокIыщт. Ащ пшъэрылъ шъхьаIэу иIэр араб каллиграфием цIыфмэ анаIэ тырадзэныр, компьютерыр жъугъэу зыщагъэфедэрэ лъэхъаным IэкIэ тхыгъэм мэхьанэу иIэр цIыфмэ къагурыгъэIо­гъэныр, кIэлэеджакIохэр творчествэм фэщагъэхэу къэтэджынхэм фагъэсэнхэр, нэмыкIхэри.

Iофтхьабзэм хэлэжьэн гухэлъ зиIэхэм зэнэкъокъум и Положение ит гущыIэ горэ IэкIэ атхын фае. Санти­метрэ 20 х 30 е 30 х 40 хъурэ тхьапэм Iоф­шIагъэр щатхын, къызызэпырагъа­зэкIэ, тхыгъэр зием ыцIэрэ ылъэкъуацIэрэ, зыщеджэрэ университетыр, факультетыр, курсыр тыратхэн фае. ЫпэкIэ зэнэкъокъухэм агъэхьыгъэ IофшIагъэхэр аштэжьыхэрэп. Нэбгырэ пэпчъ тхыгъищым емыхъоу къыгъэхьын ылъэ­кIыщт. Анахь дэгъухэм дипломхэмрэ серти­фикатхэмрэ аратыщтых.

Абрэдж Сэтэнай.