Республикэм иоперативнэ штаб коронавирусыкIэм зызэриушъом­бгъурэр къыдилъытэзэ, Адыгеим иеджапIэхэм яя 5 — 8-рэ ыкIи я 10-рэ классхэм арыс кIэлэеджакIохэр тыгъэгъазэм и 14-м ще­гъэ­жьагъэу и 31-м нэс пэIудзыгъэ шIыкIэм тетэу еджэнхэу, гъэсэныгъэ тедзэ языгъэгъотырэ организациехэми ащ тетэу Iоф ашIэнэу ри­хъухьагъ.

Апэрэ-яплIэнэрэ, я 9-рэ ыкIи я 11-рэ классхэм, санитарнэ шапхъэхэр къыдэлъытагъэхэу, очнэ шIыкIэм тетэу еджэныр лъагъэкIотэщт.

АР-м и Къэралыгъо Совет — Хасэм гъэсэныгъэмкIэ, наукэмкIэ, ныбжьыкIэхэм яIоф­хэмкIэ, спортымкIэ, СМИ-кIэ ыкIи общественнэ организа­циехэм адыряIэ зэпхыныгъэ­хэмкIэ и Комитет ипащэу Шэу­джэн Тембот гъэсэныгъэмкIэ къэралыгъо политикэм изехьан ищыкIэгъэ хэбзэгъэуцугъэхэмрэ шапхъэхэмрэ зыщатегущыIэгъэхэ зэхэсыгъоу тыгъэгъазэм и 9-м видеоконференцие шIыкIэм тетэу щыIагъэм хэлэжьагъ. Ащ УФ-м просвещениемкIэ и Министерствэ, УФ-м и Федеральнэ ЗэIукIэ ФедерациемкIэ и Совет наукэмкIэ, гъэсэны­гъэмкIэ ыкIи культурэмкIэ и Комитет, УФ-м и Къэралыгъо Думэ гъэсэныгъэмрэ наукэм­рэкIэ и Комитет кIэщакIо фэ­хъугъэх.

Iофтхьабзэм непэ кIэлэегъа­джэхэри, ны-тыхэри, кIэлэеджа­кIохэри анахьэу зыгъэгумэкIы­хэрэ пэIудзыгъэ егъэджэным щытегущыIагъэх. Федеральнэ лIыкIохэм къызэрэхагъэщы­гъэмкIэ, сыдигъокIи щыIэгъэ очнэ шIыкIэр къэралыгъом къи­нэжьыщт, пэIудзыгъэр зэпахырэ узэу дунаир зэлъызыкIугъэм къыздихьыгъ, ар зэкIэкIожьымэ тырахыжьыщт.

Джащ фэдэу кIэлэеджакIохэм шхын стыр аIэкIэгъэхьэгъэным пэIухьащт ахъщэ тедзэу федеральнэ бюджетым къыхэхы­гъэщтым, гъэсэныгъэм зегъэу­шъомбгъугъэным ылъэныкъокIэ гъэцэкIэкIо ыкIи хэбзэгъэуцу къулыкъухэм Iоф зэрэзэдашIэрэр нахьышIу шIыгъэным ягугъу ашIыгъ.