КIэлэцIыкIу IыгъыпIищ щашIы
Красногвардейскэ районым кIэлэцIыкIу IыгъыпIищ щашIы. Ащ епхыгъэ IофшIэнхэр джырэ уахътэ лъагъэкIуатэх.
Учреждение пэпчъ чIыпIи 120-рэ иIэщт. Аужырэ шапхъэхэм адиштэу гъэпсыгъэ кIэлэцIыкIу учреждениехэр лъэныкъо зэфэшъхьафхэмкIэ сабыйхэм хэхъоныгъэхэр ашIынхэм фытегъэпсыхьэгъэщтых. Адыгэ Республикэм и ЛIышъхьэу КъумпIыл Мурат мыщ фэдэ пшъэрылъ къыгъэуцугъ. Район администрацием ипресс-къулыкъу къызэритырэмкIэ, къуаджэу Хьатикъуае щашIырэ псэуалъэм иапэрэ къат къаIэтыгъ, ятIонэрэр рагъэжьагъ. КъатитIоу зэтетыщт кIэлэцIыкIу IыгъыпIэм анахь цIыкIухэр зыщаIыгъыщт (ясельнэ) куп, IэзапIэ, музыкэм зыщедэIущтхэ, спортым зыщыпылъыщтхэ чIыпIэхэр иIэщтых. Лъэпкъ проектэу «Демографием» къыдыхэлъытэгъэ федеральнэ проектэу «Содействие занятости женщин — создание условий дошкольного образования для детей в возрасте от трех лет» зыфиIорэм епхыгъэу кIэлэцIыкIу IыгъыпIэхэр ашIых.
Шъугу къэдгъэкIыжьын илъэси 3-м къыщегъэжьагъэу 7-м нэс зыныбжь сабыйхэр Адыгеим ит кIэлэцIыкIу IыгъыпIэхэм ащэнхэмкIэ чэзыу щымыIэжьэу плъытэ зэрэхъущтыр. Непэрэ мафэм ехъулIэу ясельнэ купхэр зыщаIыгъыщтхэ псэуалъэхэм яшIын епхыгъэ Iофыгъохэр зэшIуахых. Джырэ уахътэм кIэлэцIыкIу IыгъыпIэм кIонэу чэзыум сабый мини 3,8-рэ хэт. Ащ къыхэкIэу гъэсэныгъэм иучреждениехэм яшIын зигъо Iофыгъоу щыт. Мыгъэ Пэнэжьыкъуаерэ Инэмрэ кIэлэцIыкIу IыгъыпIэхэр ащашIыгъэх. Мыекъуапэ щагъэпсыгъэри къызэIуахыным фэхьазыр. ЫпэкIэ къызэрэщытIуагъэу, Красногвардейскэ районым кIэлэцIыкIу IыгъыпIищ щашIы. КъэкIорэ илъэсым нэбгыри 120-рэ зычIэфэщт псэуалъэ Шэуджэн районым ит къутырэу Тихоновым щагъэпсыщт. Тэхъутэмыкъое районым ыкIи къутырэу Гавердовскэм арыт кIэлэцIыкIу IыгъыпIэхэм ащыщхэм чIыпIэ 360-рэ апашIыхьажьыщт. Къыхэгъэщыгъэн фае пчъагъэм ызыныкъо анахь цIыкIухэр зыщаIыгъыщт ясельнэ купхэу зэрэщытыщтхэр. 2018 — 2021-рэ илъэсхэм нэбгырэ мини 3-мэ ателъытэгъэ кIэлэцIыкIу IыгъыпIэ 13 Адыгеим щашIыщт. Ащ хэхьэ непэрэ мафэм ехъулIэу ашIыгъахэхэри.
Абрэдж Сэтэнай.