ИлъэскIэ узэкIэIэбэжьмэ, 2019-м итыгъэгъэзэ мазэ, АР-м и Къэ­ра­лыгъо Совет — Хасэм идепутатхэмрэ Пшызэ къэралыгъо уни­вер­ситетым ыкIи культурэмкIэ научнэ-творческэ Гупчэу «Кубан­ский ка­зачий хор» зыфиIорэм ялIыкIохэмрэ Адыгеим и Правительствэ зы­чIэт Унэм щызэIукIэгъагъэх.

Адыгеимрэ гъунэгъу Краснодар краимрэ ащыпсэурэ лъэпкъ зэфэшъхьафхэм азыфагу зэгурыIоныгъэу, ныбджэгъуныгъэу илъыр пытэныр, лъыгъэкIотэ­гъэныр ары анахьэу зытегущы­Iэгъагъэхэр. Пшызэ къэралыгъо университетымрэ «Кубанский казачий хор» зыфиIорэ Гуп­чэмрэ научнэ-ушэтын проектэу агъэхьазырыгъэм ипхырыщын пае УФ-м и Президент игрант гъэрекIо къырахыгъ. «Земляки и соседи: изучение и популяри­зация добрососедских отношений народов Краснодарского края и Республики Адыгея» ащ зэреджагъэхэр. Мы проектыр ары Iофтхьабзэм изэхэщэн ушъхьагъу шъхьаIэу фэхъугъэри.

2020-рэ илъэсыр къызехьэм ащ ипхырыщын рагъэжьагъ. Проектым къыдыхэлъытагъэу Красногвардейскэ районымкIэ къуаджэхэу Хьатикъуае, Улапэ, Шэуджэн районымкIэ Дукма­совскэ псэупIэ коим, Кощхьэблэ районым и Дмитриевскэ псэупIэ кой, Краснодар краимкIэ къуаджэхэу Кургъокъуаерэ Шъхьэщэфыжьрэ къакIухьанхэу, ушэтын зэфэшъхьафхэр ащы­зэхащэнхэу щытыгъ.

Зэрагъэнэфагъэу, зэкIэ мы псэупIэхэм ащыIагъэх, къэралыгъо хэбзэ къулыкъухэм, дин конфессиехэм, къэзэкъ ыкIи лъэпкъ культурнэ организациехэм ялIыкIохэм, нэжъ-Iужъэу адэсхэм зэIукIэгъухэр адашIыгъэх, экспедициехэр зэхаща­гъэх. Iофэу ашIагъэм изэфэхьысыжьхэр, СМИ-хэр ыкIи интернетыр къызфагъэфедэзэ къатыжьы­гъэх. АР-м и Къэралыгъо Совет — Хасэм ипресс-къулыкъу тызэрэщигъэгъозагъэмкIэ, про­ектым ипхырыщынкIэ шIагъэ хъу­гъэр джырэблагъэ Парламентым щызэфахьысыжьыгъ. Къэралыгъо ыкIи муниципальнэ хэбзэ къулыкъухэм ялIыкIохэри, депутатхэри, къакIухьэгъэ псэу­пIэхэм адэсхэри чанэу къызэ­рэхэлэжьагъэхэр, шIэныгъэлэжьхэм яIофшIэн илыягъэу зэрамылъытагъэр къэгущыIагъэхэм къыхагъэщыгъ.

КIэухэу а IофшIэным фэхъугъэхэр научнэ-практическэ фо­румым щагъэфедагъэхэр зэ­хэубытагъэу зыдэт тхылъыр, Пшызэ шъолъырымрэ Адыгеимрэ ащыпсэухэрэм лъэпкъ ыкIи дин зэгурыIоныгъэ азы­фагу илъыным уфэзгъэсэрэ мето­ди­ческэ пособиер ыкIи «Земляки и соседи» зыфиIорэ тхы­лъыр арых.

Адыгеим и Парламент идепутатхэм ахэм нэIуасэ зыфа­шIыгъ. Зэгъунэгъу субъектитIум арыс лъэпкъ зэфэшъхьафыбэхэм зэгурыIоныгъэу, зэныбджэгъуныгъэу азыфагу илъыр гъэпытэгъэнымкIэ проектым мэхьэ­нэшхо зэриIэр ахэм къыхагъэ­щыгъ, ащ фэдэ материалхэр нэмыкI шъолъырхэм алъыIэсымэ шIуагъэ къытынэу зэралъы­тэрэр къаIуагъ.

ШIоигъоныгъэ зиIэхэм пособиемрэ тхылъхэмрэ АР-м и Къэралыгъо Совет — Хасэм иинтернет нэкIубгъо нэIуасэ зыщыфашIын алъэкIыщт.