Лъэпкъ проектэу «Щынэгъончъэ ыкIи шэпхъэшIухэм адиштэрэ авто­мобиль гъогухэр» зыфиIорэм къыдыхэлъытагъэу Адыгеим мы илъэсэу икIырэм щызэшIуахыщтхэм апае пстэумкIи сомэ миллион 637-рэ агъэнэфэгъагъ. АщкIэ автомобиль гъогухэр чIыпIэ 49-мэ ащагъэцэкIэжьынхэу е ащагъэкIэжьынхэу, гъогурыкIоным ишапхъэхэр зыу­къохэрэр зыгъэунэфыщтхэ камерэ 52-рэ агъэуцунэу къыщыдэлъытэгъагъ. Мы лъэныкъомкIэ пшъэрылъхэр хэзыгъэ имыIэу гъэцэкIагъэ хъугъэ. Камерэхэм ягъэуцун сомэ миллиони 146-рэ пэ­Iуа­гъэхьанэу щытыгъ, ау аук­ционхэр зызэхащэхэм ахъщэ къызэрафэнагъэм ишIуагъэкIэ, рес­публикэм икъэлэ шъхьаIэ икъыдэхьагъуиплIымэ ащагъэ­псыгъэгъэ системэу «Фоккорд» зыфиIорэри агъэкIэжьын алъэ­кIыгъ. Ащ тетэу 52-у агъэнэ­фэгъагъэм ычIыпIэкIэ камерэ 56-рэ агъэуцугъэу хъугъэ. Мыхэр скоростыр зыукъуа­гъэр, гъогум илъэныкъоу зэ­ры­чъэн фаем текIыгъэр, лъэс­ры­кIоу изэпырыкIыпIэ къытехьагъэм пэрыохъу фэхъугъэр, нэмыкIыбэхэр агъэунэфынхэу гъэпсыгъэх. — ГИБДД-кIэ ГъэIорышIапIэм испециалистхэр къыхэд­гъэла­жьэзэ камерэхэр зыщыдгъэуцущтхэ чIыпIэхэр дгъэнэфа­гъэх, — къыIуагъ АР-м гъогу­рыкIоныр щынэгъончъэнымкIэ и Гупчэ ипащэу Аргун Даур. — Нахьыбэу автомашинэхэр зыщызэутэкIырэ, хъугъэ-шIагъэ зыщыхъурэ чIыпIэхэм талъыплъэнэу шIыгъэныр ары пшъэ­рылъ шъхьаIэу тиIагъэр. Каме­рэхэм яIофшIэн къэуцурэп, сыхьат 24-м зэпымыоу Iоф ашIэ, сурэтхэр зэрэтырахыхэрэм къыщыкIэрэп, арышъ, зыщыдгъэуцугъэхэм Iофхэр на­хьышIу ащыхъунхэу тыщэ­гугъы. Шъугу къэдгъэкIыжьын, 2024-рэ илъэсым нэс камери 100-м нэсэу республикэм щагъэуцунэу, хьылъэзещэ автомашинэхэр зыщащэчыщт псэуалъэу 6 щагъэпсынэу лъэпкъ проектым къыдыхэлъытагъ.