Гъогухэм яшIын лъагъэкIуатэ
Автомобиль гъогухэм ягъэцэкIэжьынкIэ мы лъэпкъ проектым 2020-рэ илъэсымкIэ къыгъэнафэрэр бэдзэогъу мазэм ыкIэм нэс зэшIохыгъэ хъугъэ.
Ащ фэшI къихьащт 2021-кIэ IофшIэнхэм апэIухьанэу федеральнэ гъогу ведомствэм къытIупщын фэягъэм ипроцент 50-р мы илъэсым республикэм къыритыгъ.
АщкIэ чъэпыогъу ыкIи шэкIогъу мазэхэм Мыекъуапэ ичIыпIи 10-мэ гъогухэр ащагъэцэкIэжьыгъэх. Джащ фэдэу тызыхэт мазэм республикэм икъэлэ шъхьаIэ иурамхэу Подлеснаям, Железнодорожнэм, станицэу Ханскэм иурамэу Лениным ыцIэ зыхьыхэрэм зэкIэмкIи чIыпIиплI ащагъэкIэжьыгъ.
Мы уахътэм поселкэу Родниковэм екIолIэрэ гъогум Iоф щашIэ. ХъызмэтшIапIэу «БАК-Строй» зыфиIорэр ары ар зышIырэр. А чIыпIэм километриплIэу щагъэцэкIэжьырэр мы илъэсымкIэ аужырэ мэхъу. Ощхи, оси зэрэщымыIэу, температурэр лъэшэу зэремыхырэм ишIуагъэкIэ IофшIэнхэр пIалъэм тетэу лъагъэкIуатэх, мазэр имыкIызэ аухыщт.
Мы гъогум муниципальнэ мэхьанэ иI, ау федеральнэм екIужьы. Арышъ, ащ игъэцэкIэжьынкIи федеральнэ шапхъэхэр агъэцакIэх.