БзэджашIэхэр къаубытыгъэх

Адыгэ Республикэм хэгъэгу кIоцI IофхэмкIэ и Министерствэ наркотикхэр хэбзэнчъэу къезыгъэкIокIыхэрэм апэшIуекIогъэным лъып­лъэгъэнымкIэ иотдел икъулыкъу­шIэхэм зэхащэгъэ оперативнэ Iофтхьабзэхэм яшIуагъэкIэ Краснодар краим щыпсэурэ илъэс 31-рэ зыныбжь хъулъфыгъэр къаубытыгъ. Наркотик зыхэлъ пкъыгъохэр ыщэщтыгъэу агъэунэфыгъ.

Илъэсэу тызыхэтым имэ­къуогъу мазэ хэбзэухъума­кIохэм къэбар къаIэ­кIэхьагъ мы хъулъфыгъэм нэмыкI шъо­­лъырхэм къарищызэ Адыгеим наркотикхэр зэрэщыIуигъэкIы­хэрэр.

Полицейскэхэм оперативнэ-лъыхъун Iофтхьабзэхэр рагъэкIокIызэ, респуб­ликэм и Красногвардейскэ район ис бзылъфыгъэр бзэджашIэм игъу­сэн ылъэ­кIыщтэу егуцэфагъэх.

Оперативникхэм Iофтхьабзэхэр рагъэкIокIызэ нэбгыритIур зэрэзекIощтыгъэхэ машинэр Теуцожь районым къыщагъэуцугъ. Ащ ыкIоцI зэкIоцIыщыхьэгъэ пкъыгъо 50 фэдиз къырагъотагъ. Эксперт-криминалистхэм ушэтынэу ашIыгъэ­хэм къы­зэрагъэлъэгъуа­гъэмкIэ, 39-мэ — героин, 10-мэ — метадон акIоцIы­лъыгъ, зэкIэмкIи грамм 20-м ехъу къащэчы­щтыгъ.

Къаубытыгъэхэм алъэныкъо­кIэ уголовнэ Iоф къызэIуахыгъ. Ахэм лажьэ яIэу загъэунэфыкIэ илъэс 20-м нэс хьапс къахьын алъэкIыщт. Хъулъфыгъэр изоляторым чIэс, бзылъфыгъэм ылъэны­къокIэ унашъо ашIынэу щыт. Мыхэр нэмыкI бзэджэшIагъэхэм ахэщагъэхэмэ джырэ уахътэ ауп­лъэ­кIух.

IункIыбзэхэр аратыжьыгъэх

ГъогурыкIоныр щынэгъончъэнымкIэ Къэралыгъо автоинспекцием и ГъэIорышIапIэу Адыгеим щыIэм иIофышIэхэм къулыкъур зэрифэшъуашэу ахьын амал яIэнымкIэ шъолъырым щызэшIуахырэр бэ. Ахэм апае къащэфыгъэ автомобильхэм яIункIыбзэхэр мы мафэхэм аратыжьыгъэх.

МэфэкI Iофтхьабзэм хэлэжьагъэх ыкIи къулы­къушIэхэм къафэгушIуагъэх Адыгэ Республикэм хэгъэгу кIоцI IофхэмкIэ иминистрэ ипшъэрылъхэр охътэ гъэнэфагъэкIэ зыгъэцэкIэрэ Александр Евсеевыр, ГъэIорышIапIэм ипащэу Александр Курпас, нэмыкI­хэри.

ГъогурыкIоныр щынэгъончъэныр ыкIи ащ фытегъэ­псыхьэгъэ пэшIорыгъэшъ Iофтхьабзэхэр зэхэщэгъэнхэр пшъэрылъ шъхьаIэу зэрэщытыр А. Евсеевым хигъэу­нэфыкIыгъ. АщкIэ машинакIэу къащэфыгъэхэм яшIогъэшхо къызэрэкIощтыр къыIуагъ.

Александр Курпас къызэриIуагъэмкIэ, къулыкъушIэ транспортым 23-рэ къыхэхъуагъ. Лъэпкъ проектэу «Щынэгъончъэ ыкIи шэпхъэшIухэм адиштэрэ автомобиль гъогухэр» зыфиIорэм къыдыхэлъытэгъэ федеральнэ проектэу «ГъогурыкIоныр щынэгъончъэным» ишIуагъэкIэ автомобильхэр къаIэкIэхьагъэх.

Зэхахьэм икIэух полицием иIофышIэхэр машинакIэхэм арытIысхьэхи, къулыкъур ахьынэу гъогум техьагъэх.