Тазырым фэдитIу хэхъуагъ

Мыекъопэ районым щыпсэурэ хъулъфыгъэм ешъуагъэу машинэр зэрэзэрифагъэм къыкIэлъыкIуагъ административнэ пшъэдэкIы­жьыр. Ау хьыкумым ышIыгъэ унашъор игъом зэримыгъэцэкIагъэм къыхэкIыкIэ тазырэу ытын фаер фэдитIукIэ нахьыбэ фашIыгъ.

Адыгэ Республикэм и Мые­къопэ къэлэ хьыкум унашъоу ышIыгъэмкIэ, ешъуагъэу рулым кIэрысыгъэ хъулъфыгъэм сомэ мин 30 хъурэ административнэ тазыр къыпщыныжьын фэягъ. А Iофыр хьыкум приставхэм къаIэкIэхьагъ.

Хьыкумым иунашъо зимыгъэ­цакIэкIэ кIэухэу фэ­хъун ылъэ­кIыщтыр хъулъфыгъэм гурагъэ­Iуагъ, ау сыд заIуи, чIыфэр игъом къыпщыныгъэп. Ащ къы­хэкIыкIэ хьыкум приставым протокол зэхигъэуцуагъ, нэужым хьыкумым унашъоу ышIыгъэмкIэ тазырыр фэдитIукIэ нахьыбэ хъугъэ.

ЧIыфэр сомэ мин 300-м ехъугъ

Мыекъопэ районым щыпсэурэ хъулъфыгъэм кIэлэпIупкIэр зэримытырэм къыхэкIэу административнэ пшъэдэкIыжь рагъэ­хьыгъ. Ащ фэгъэхьыгъэ унашъо хьыкумым ышIыгъ.

ЗэкIэмкIи чIыфэу зэIуигъэ­кIагъэр сомэ мин 300-м ехъу. Сабыим ипIункIэ зипшъэрылъхэр зымыгъэцэкIэрэ хъулъфыгъэм ылъэныкъокIэ административнэ протокол зэхагъэуцуагъ. Мые­къопэ районым ихьыкум участкэу N 2-м изэгъэшIужь хьыкумышIэ унашъоу ышIыгъэмкIэ чIыфэшхо зэIузгъэкIагъэм мэфэ 15-м телъытэгъэ административнэ арест тыралъхьагъ.

Iофтхьабзэ зэхащагъ

Къолъхьэ тын-Iыхыным пэ­шIуе­кIогъэным и Дунэе мафэ фэгъэхьыгъэ Iофтхьабзэу зэхащагъэм хьыкум приставхэр хэлэжьагъэх. Ащ кIэщакIо фэ­хъугъэх уголовнэ-гъэцэкIэкIо системэм икъулыкъушIэхэр.

ФСИН-м АдыгеимкIэ и ГъэIо­рышIапIэ иIофышIэу Наталья Ведерниковам хьыкум пристав­хэм я Тэхъу­тэмыкъое ыкIи Теу­цожь район подразделениехэм якъулыкъушIэхэм къафиIотагъ къолъхьэ тын-Iыхыным ылъэныкъокIэ законыр зыукъогъэ хэбзэухъумакIохэм пшъэдэкIыжьэу арагъэхьырэр, бзэджэшIагъэхэр къызэрэхагъэщыхэрэр, нэмыкIхэри.

— Мыщ фэдэ Iофтхьабзэхэм пшъэрылъ шъхьаIэу яIэр хэбзэухъумэкIо системэм хэтхэм къолъхьэ тын-Iыхыным ылъэныкъокIэ хэбзэгъэуцугъэр амыукъо­ныр, ащ фэдэ бзэджэшIагъэ зезыхьэхэрэм атефэрэ пшъэ­дэкIыжьыр ягъэхьыгъэныр ары, — къыIуагъ Наталья Ведерниковам.

Унашъор зэримыгъэцэкIагъэм къыкIэлъыкIуагъ

Республикэм икъэлэ шъхьаIэ щыпсэурэ хъулъфыгъэм тыралъхьэгъэ уголовнэ тазырыр игъом зэримыпщыныгъэм къыхэкIыкIэ пшъэдэкIыжь нахь лъэшкIэ фызэблахъугъ. Хьыкумым унашъоу ышIыгъэмкIэ тазырым ычIыпIэ шIокI зимыIэ IофшIэнхэр ыгъэцэкIэщтых.

Къолъхьэ тын-Iыхыным ылъэ­ныкъокIэ хэбзэгъэуцугъэр зыукъогъэ хъулъфыгъэм уголовнэ тазырэу сомэ миллион 1,5-рэ къызэкIигъэкIожьын фэягъ.

Тхьапэу къыIэкIэхьагъэм къы­зэригъэнафэу хьыкум приставым Iоф къызэIуихыгъ. Уна­шъоу щыIэр зимыгъэ­цакIэкIэ кIэухэу фэхъун ылъэкIыщтыр, пшъэдэ­кIыжьыр нахь зэрэпхъэшэщтыр хъулъфыгъэм гуригъэIуагъ. Ау пIалъэу къыфагъэнэфагъэм ехъу­лIэу тазырыр къыпщыныгъэп.

Мы Iофым хьыкумыр икIэрыкIэу хэплъэжьыгъ, тазырыр илъэси 2,5-м телъытэгъэ шIокI зимыIэ IофшIэнхэмкIэ зэбли­хъугъ, хъулъфыгъэм илэжьапкIэ проценти 10 хагъэкIызэ къэралыгъом фызэкIагъэкIожьыщт.

Хьыкум приставхэм я Федеральнэ къулыкъу АдыгеимкIэ и ГъэIорышIапIэ ипресс-къулыкъу.