Партиеу «Единэ Россием» иапэрэ социальнэ онлайн-форум хэлэжьагъэх Урысыем и Президентэу Владимир Путиныр, партием и Тхьаматэу Дмитрий Медведевыр, федеральнэ министрэхэр, «Единэ Россием» иволонтер гупчэхэм ахэтхэр.

Адыгеим ыцIэкIэ форумым хэлэ­жьагъ республикэм и ЛIышъхьэу, партиеу «Единэ Россием» ишъолъыр къутамэ и Секретарэу КъумпIыл Мурат.

Пандемием илъэхъан цIыфхэм волонтер IэпыIэгъоу арагъэгъотырэм, гуфа­кIохэм ядвижение зызэрэрагъэушъом­бгъущт шIыкIэм мыщ щатегущыIагъэх. Iофтхьабзэр къызэIуихызэ, Дмитрий Медведевым амалэу зэрахьагъэхэм — зызэраухъумэрэ пкъыгъохэмрэ транспортымрэ медицинэ учреждениехэм къазэрафагъотыгъэхэм, цIыфхэм, бизнесым IэпыIэгъоу аратыгъэм ыкIи нэмыкIхэм ягугъу къышIыгъ.

Дмитрий Медведевыр гуфакIохэм пшъэрылъэу яIэхэм къатегущыIагъ. Ахэм ащыщых врачхэр автомобилькIэ сымаджэхэм адэжь нэгъэсыгъэнхэр, IэпыIэгъу псынкIэ зимыщыкIэгъэ сымаджэхэр автомобилькIэ къэщэгъэнхэр, медицинэ IофышIэхэм гъомылапхъэхэр, сымаджэхэм Iэзэгъу уцхэр аIэкIэгъэхьэгъэнхэр ыкIи нэмыкIхэр. Телефон номер зыкIэу 122-м иколл-гупчэхэм IэпыIэгъу ятыгъэн, «зонэ плъыжьым» Iоф щызышIэрэ медицинэ IофышIэхэм яунагъо­хэм адеIэгъэн зэрэфаем шъхьафэу ягугъу къашIыгъ.

Урысые Федерацием и Президентэу Владимир Путиныр волонтер проектхэм ятегущыIэн хэлэжьагъ. Iофтхьабзэм хэлажьэхэрэм шIуфэс къарихи, къэралыгъом ипащэ гуфакIохэм Iофышхо зэрагъэцакIэрэр къыIуагъ. Хэгъэгум и Президент пандемием илъэхъан гуфа­кIохэм мэхьанэшхо зиIэ пшъэрылъ заулэ зэрагъэцэкIагъэр хигъэунэфыкIыгъ.

Форумым икIэуххэм къатегущыIэзэ, Адыгеим и ЛIышъхьэу КъумпIыл Мурат зэрэхигъэунэфыкIыгъэмкIэ, зэпахырэ узым зыкъызыщиштэгъэ апэрэ мафэхэм къащегъэжьагъэу республикэм игуфа­кIохэр медицинэ IофышIэхэми, нэмыкI цIыфхэми IэпыIэгъу афэхъугъэх. Партиеу «Единэ Россием» ишъолъыр къутамэ, Урысые общественнэ движениеу «Волонтеры — медики» зыфиIорэм, респуб­ликэм ипредпринимательхэм респуб­ликэм ис нэжъ-Iужъхэмрэ гъот макIэ зиIэ унагъохэмрэ ыпкIэ хэмылъэу гъомылапхъэхэр зэрылъ Iалъмэкъхэр аIэкIагъэхьагъэх, нэбгырэ мин 65-м ехъумэ ащ фэдэхэр афагощыгъэх.

— «Единэ Россием» ипартийнэ гухэлъхэр гъэцэкIэгъэнхэмкIэ Адыгеим иволонтерхэм Iофышхо ашIагъ. Зыныбжь хэкIотагъэхэм ыкIи щыкIагъэ зиIэхэм гъомылапхъэхэр, Iэзэгъу уцхэр аIэкIагъэхьагъэх. Непи мы IофшIэныр лъагъэ­кIуатэ. Волонтерхэр цIыфхэм IэпыIэгъу афэхъух, шIушIагъэр ягъогогъу. Ар къыгъэлъэгъуагъ илъэсищ зыныбжь сабыир зэкIодым Мыекъуапэ щыпсэурэ нэбгырабэ лъыхъунэу къызэрэдэкIыгъэхэр, — къыIуагъ КъумпIыл Мурат

Джащ фэдэу «Единэ Россием» ишъо­лъыр къутамэ республикэ клиникэ инфекционнэ сымэджэщым иIофышIэхэм автомобиль псынкIэу «Лада Веста» зыфиIорэр аритыгъ, партием хэтхэм ямылъкукIэ медицинэ IэпыIэгъу псынкIэ языгъэгъотырэ Адыгэ республикэ станцием реанимобиль къыфащэфыгъ.

Урысыем щызэрахьэгъэ Iофтхьабзэу «Мы вместе» зыфиIорэм Адыгеим щыщ гуфэкIо 1200-м ехъу хэлэжьагъ. 380-рэ фэдизыр псауныгъэм икъэухъумэн фэгъэзэгъагъ. ГуфэкIо-медик 50-м ехъумэ «зонэ плъы­жьым» Iоф щашIэ.

Шъолъыр волонтер штабым хэхьэх партиеу «Единэ Россием» иреспубликэ отделениерэ Урысые народнэ фронтым ирегион отделениерэ яволонтерхэр, апшъэрэ еджапIэхэм ачIэс гуфакIохэр, предпринимательхэр, Адыгеим иорганизацие зэфэшъхьафхэм ялIыкIохэр.

Адыгэ Республикэм и ЛIышъхьэ ипресс-къулыкъу