Адыгеим икъутырэу Га­вер­довскэм щыпсэурэ илъэсищ зыныбжь Матвей цIыкIур зыдэхъугъэр амы­шIэу зэрэкIодыгъэм рес­публикэм имызакъоу, тикъэрылыгъо ишъолъыр зэфэшъхьафхэм ащы­псэу­­рэ цIыфхэр лъэшэу ыгъэгумэкIыгъэх, зэридзагъэх. Сабый цIыкIур псаоу къагъотыжьынэу Тхьэм елъэIущтыгъэх, мы чIыпIэм къэкIон зымылъэ­кIыщтхэр унагъом, ным гущыIэ фабэхэмкIэ аготыгъэх.

ЗэрэкIодыгъэмкIэ макъэ къагъэIугъ

Матвей зэрэкIодыгъэм фэгъэхьыгъэ къэбарыр социальнэ хъытыухэм янэкIубгъо зэфэшъхьафхэм къарыхьагъэх. Ащ щыгъыгъэр, итеплъэ зыфэдэр къаратхагъэх. УФ-м и Следственнэ комитет республикэмкIэ и ГъэIорышIапIэ пэшIорыгъэшъэу къызэритыгъэмкIэ, сабый цIыкIумрэ ным инэIосэ хъулъфыгъэмрэ зэгъусэхэу къакIухьэщтыгъ. Хъулъфы­гъэр гъунэгъу бзылъфыгъэм дэгущыIэфэ кIэ­лэцIыкIур IэкIэкIыгъ.

Лъыхъон Iофтхьабзэхэр

Матвей зэрэкIодыгъэм фэгъэхьыгъэ къэбар зэхэзыхыгъэ пстэури къутырэу Гавердовскэм къыщызэрэугъоигъэх, штаб зэхащагъ. Следственнэ комитетым, МВД-м ыкIи МЧС-м икъулыкъу­шIэхэр, волонтерхэр, цIыф къызэрыкIохэр лъы­хъон Iофтхьабзэм хэлэжьагъэх. Ахэм ахэтыгъэх тигъэзет иредакцие Iутхэри.

Адыгэ Республикэм и ЛIышъхьэу КъумпIыл Мурат лъыхъон-къэгъэнэ­жьын Iофтхьабзэм хэлажьэхэрэм гущыIэгъу афэхъугъ, пстэуми зэрафэразэр ари­Iуагъ. Пчыхьэ хэкIотагъэм рагъажьи, къэзэрэугъоигъэхэм чIыпIэ зэфэшъхьаф­хэр къап­лъыхьагъэх, Матвей цIыкIур къагъотыжьыным акIуачIи, амалэу яIэ пстэури рахьылIагъ.

Сабыир къагъотыжьыгъ

ЗыщыкIодыгъэ чIыпIэм километрищ фэдизкIэ пэчыжьэу, станицэу Ханскэм дэжь, Матвей къыщагъотыжьыгъ. Мыщ кIэух дэгъу зэрэфэхъугъэм цIыфхэр лъэшэу ыгъэгушIуагъэх. Сабый цIыкIур кондэ къогъум къосыгъ. Ащ игъусэгъэ хьэм макъэ къызэригъэIугъэр ары мэхьанэшхо зиIагъэр, ащ ишIуагъэкIэ кIэлэцIыкIум илъэуж техьагъэх, къагъотыжьыгъ.

ИпсауныгъэкIэ щынагъо щыIэп

Матвей къызагъотыжьым гъыщтыгъэп, медикхэм псынкIэу аIэкIагъэхьагъ. Ахэм къызэраIуагъэмкIэ, сабыим ипсауныгъэ изытеткIэ зи щынагъо щыIэп, температурэ иIэп, дэгъоу машхэ, мэгушIо, мэджэгу.

Ныр къафэраз

Мы охътэ къиным унагъом игумэкIыгъо зэхэзышIэгъэ цIыфхэм, лъыхъуа­кIохэм ыкIи къэгъэнэжьакIохэм, унэм исхэу Тхьэм елъэIугъэхэм зэкIэми Матвей янэ афэраз. Сабыим икъэгъотыжьын хэлэжьэгъэ нэбгырэ пэпчъ шIоу, дэгъоу щыIэр къыдэхъунэу афэлъаIо.

Зыгъэхьазырыгъэр ТХЬАРКЪОХЪО Адам.