Сомэ миллион 60 фэдиз Iахьтедзэу Адыгеим къыфыхагъэкIыгъ
Урысые Федерацием и Правительствэ зэхэсыгъоу иIагъэм коронавирусыр къызэутэлIагъэхэу амбулаторнэу зэIазэхэрэм Iэзэгъу уцхэр къафэщэфыгъэнхэм тегъэпсыхьагъэу бюджет мылъку тедзэхэр шъолъырхэм атырагощэнэу щаухэсыгъ. А гухэлъхэм апае Адыгэ Республикэм сомэ мин 9622,8-рэ къыфыхагъэкIыгъ.
Джащ фэдэу агропромышленнэ комплексым ипсэуалъэхэм ягъэпсынкIэ ыкIи ягъэкIэжьынкIэ мылъкоу агъэкIодыгъэм щыщ къафигъэкъужьыгъэным тегъэпсыхьагъэу федеральнэ бюджетым имылъку тедзэ шъолъырхэм атырагощэнэу аухэсыгъ. А гухэлъхэм апае Адыгэ Республикэм тедзэу сомэ миллион 50 къыфыхагъэкIыгъ.
Урысые Федерацием и Правительствэ иIэпэчIэгъэнэ фонд ары ащ фэдэ мылъкухэр къызыхагъэкIыщтхэр. Зыфытегъэпсыхьэгъэ гухэлъхэмкIэ ахэр гъэфедэгъэнхэм Адыгэ Республикэм и ЛIышъхьэу КъумпIыл Мурат лъэшэу гъунэ лъефы. Зэпахырэ узым зимыушъомбгъунымкIэ шапхъэхэр шIокI имыIэу гъэцэкIэгъэнхэми ар афэгъэхьыгъ.
«Хэгъэгум щыпсэухэу коронавирусыр къызэутэлIагъэхэм ыкIи яунэхэм арысхэу зэIазэхэрэм ыпкIэ хэмылъэу Iэзэгъу уцхэр аIэкIэгъэхьэгъэнхэу Урысые Федерацием и Президентэу Владимир Путиным пшъэрылъ афишIыгъ. Мылъку тедзэу къыхагъэкIыгъэхэм яшIуагъэкIэ Адыгеим а пшъэрылъыр ыгъэцэкIэн ылъэкIыщт», — къыIуагъ КъумпIыл Мурат.
Шъолъырхэм мылъку къафыхэгъэкIыгъэным ехьылIэгъэ унашъохэр Урысые Федерацием и Правительствэ зиштагъэхэр Адыгэ Республикэм ыцIэкIэ Къэралыгъо Думэм идепутатэу, «Единэ Россием» хэтэу Владислав Резник яIэпыIэгъоу Урысые Федерацием и Федеральнэ ЗэIукIэ бюджет мылъкур атегощэгъэнымкIэ икомиссие ахэм къазыдырегъэштэ нэуж ары.
«Бюджет мылъкур атегощэгъэнымкIэ парламент комиссиемрэ Урысые Федерацием и Правительствэрэ мэлылъфэгъум къыщегъэжьагъэу Адыгеим лъэныкъуабэхэмкIэ финанс IэпыIэгъу къыраты. Адыгеим иагропромышленнэ комплекс республикэм иэкономикэ иIахьышхо хешIыхьэ. Пандемием ыпкъ къикIыкIэ республикэ бюджетыр мыгъэ мылъкум зэрэфыщыкIагъэм епхыгъэу федеральнэ бюджетым къыхагъэкIыщтыр мэкъумэщ предприятиехэм хэхъоныгъэ ашIыным, мэкъумэщ продукциер нахьыбэу къахьыжьыным афэIорышIэщт», — хигъэунэфыкIыгъ Владислав Резник.
Адыгэ Республикэм и ЛIышъхьэ ипресс-къулыкъу