Тыгъэгъазэм и 10-м ыныбжь илъэс 93-м итэу зэлъашIэрэ шIэныгъэлэжьэу, кIэлэегъаджэу Иуанэкъо Нурбый Рэщыдэ ыкъом идунай ыхъожьыгъ.

Нурбый сыригъэджагъ ыIоу рыгу­шхоу бэдэд ащыпсэурэр Адыгеим, Къэ­бэр­тэе-Бэлъкъарым ыкIи Къэрэщэе-Щэр­джэ­сым. «Нурбый Iоф дэс­шIагъ, ар сыдэу цIыф Iушыгъ, гулъы­тэшхо иIагъ» зыIощтыри макIэ хъущтэп. Щэч хэ­лъэп, ащ нахь макIэ зэрэмыхъу­щтыр Нурбый ныбджэгъоу иIагъэри.

Арэущтэу цIыфмэ уалъытэу, уиIоф­шIагъэ осэшхо фашIэу, уицIыфыгъэ ащымыгъупшэ зыхъукIэ дунаеу узытетыгъэм ужы дахэ къыщыбгъэнагъэ мэхъу.

Иуанэкъо Нурбый 1927-рэ илъэсым тыгъэгъазэм и 21-м къуаджэу Къунчы­къохьаблэ къыщыхъугъ. Ичылэ гупсэ щыпсэунэу мыхъугъэми, егъашIэм ыгу илъэу, гущыIэгъу уфэхъу къэсми игукъэкIыжь дахэмэ ахэтэу, Къунчыкъохьаблэ игугъу къышIыщтыгъэ.

Нурбый сэнэхьатэу къыхихыгъэм ыгурэ ыпсэрэ хэлъэу фэлэжьагъ. Адыгабзэм ибаигъэрэ икуугъэрэ ыгукIэ зэхишIэу илъэс тIокIищым ехъурэ дэлэжьагъ. Бзэм имызакъоу, лъэп­къым иIорыIотэ жанрэ зэфэшъхьафхэри Нурбый дэгъу дэдэу ышIэщтыгъэх. 1962 — 2017-рэ илъэсхэм Нурбый Къэбэртэе-Бэлъкъар университетым щылэжьагъ.

Нурбый анахь шIэныгъэ шъхьаIэу ылъытэщтыгъэр ныдэлъфыбзэм изэгъэ­шIэн, изэхэшIэн ары. Зы мафи блигъэкIыщтыгъэп адыгабзэм фэгъэхьыгъэу статьями е нэмыкIми Iоф димышIэу. Сыда пIомэ, илъэпкъ зэрэфэ­лажьэрэм Нурбый гухахъо хигъуатэщтыгъэ. Ары кIуачIи къезытыщтыгъэр, игугъэ лъагэу зыIэтыщтыгъэр.

Нурбый щыIэныгъэ гъогу инэу къы­кIугъэм илъэсищ къыхэфагъ Хэгъэгу зэошхом имэшIо гъогухэр зэпичынхэу. Илъэс пшIыкIух нахь ымыныбжьэу Iашэр ыштагъ ыкIи 1943 — 1945-рэ илъэсхэм заом икъиныгъохэр лIыгъэрэ щэIагъэрэ хэлъэу ыушэтыгъэх. ДзэкIолI ныбжьыкIэм ихэгъэгу псэемыблэжьэу къызэриухъумагъэр дэгъоу къаушыхьаты орденэу ыкIи медалэу къыфагъэшъошагъэхэм.

Аужырэ мафэхэм тыримыгъусагъэ­ми, тицыхьэ телъ Нурбый игупшысэхэм ичылэ гупсэ ахэтэу рэхьатыныгъэ зэригъотыжьыгъэм.

Къуаджэри лъэпкъыри къыпфэразэх, Нурбый. Ныдэлъфыбзэм узэрэдэлэжьагъэр, цIыфыгъэшхоу пхэлъыгъэр егъа­шIэм тщыгъупшэщтэп.

Пэнэшъу Хьазрэт, Хьагъур Айтэч, Пэнэшъу Азмэт, Хьаудэкъо Шыхьамыз, Къэзэнэ Юсыф, Гъыщ Шумаф, Гъыщ Заубэч, Пэнэшъу Борис, Къуекъо Асфар, Пэнэшъу Аскэр.