COVID-19-м пэшIуекIорэ вакцинэу «Гам-Ковид-Вак» зыфиIорэр, Спутник V нахьыбэу зэрэтшIэрэр, хэлъхьэгъу 200 хъоу тыгъуасэ республикэм къащагъ.

Ар коронавирусыкIэм пэшIуекIорэ апэрэ вакци­нэу Урысыем щатхыгъэр ары. ЭпидемиологиемкIэ ыкIи микробиологиемкIэ Лъэпкъ ушэтыпIэ Гупчэу академикэу Н. Ф. Гамалей ыцIэ зыхьырэм ар ыгъэ­хьазырыгъ ыкIи илъэсэу тызыхэтым ишышъхьэIу мазэ и 11-м УФ-м псауны­гъэр къэухъумэгъэнымкIэ и Министерствэ щатхыгъ.

Адыгеим мы вакцинэм ихэлъхьанкIэ опыт имы­Iа­хэу щытэп. Вирусыр къео­лIэным ищынагъо нахьыбэу зышъхьащыт купым хахьэхэрэм апае Iоныгъо мазэм ыкIэм апэрэ хэлъхьагъухэр къащэгъагъэх.

ЦIыфыбэхэм ахалъхьаным пэшIорыгъэшъэу зы­фагъэхьазырыгъ. Ащ пае вакцинэм ищыкIэгъэ температурэр къэзытырэ гъэу­чъыIалъэхэр Iэзэгъу уцхэр зыщаIыгъхэ базэхэм ыкIи гупчэу прививкэхэр зыщашIыщтхэм ащагъэуцугъэх. Джащ фэдэу хэзылъхьащтхэр шапхъэхэм афырагъэджагъэх.

Хэлъхьэгъу 200-у къэ­кIуагъэр гупчэу агъэхьазырыгъэхэм атырагощагъ. Ахэм анахь шъхьаIэр Мыекъопэ къэлэ поликлиникэу урамэу Школьнэм тетым щагъэпсыгъэр ары. Тыгъэгъазэм и 12-м вакцинэм ихэлъхьан рагъэ­жьэщт, едзыгъуитIоу, мэфэ 21-рэ азыфагу илъэу ашIыщт.

Апэу ар зыIэкIэхьащтхэр медицинэм, гъэсэныгъэм ащылажьэхэрэр, со­циальнэ IофышIэхэр ары. ТапэкIэ, вакцинэр на­хьыбэу къызыкIокIэ, зыхалъхьэхэрэри нахьыбэ ашIыщт.

Мы прививкэм зыпари щынагъо хэлъэп, ау бгъэ­цэкIэн фэе шапхъэхэр щы­­Iэх. Вакцинэр бзылъ­фы­гъэу сабый ежэхэрэм е къыфэхъугъахэу зыгъа­шхэхэрэм, зыныбжь имыкъугъэхэм, илъэс 60-м шIокIыгъэхэм зыхалъхьэ хъущтэп.

НэмыкI прививкэ, гущы­Iэм пае, пэтхъу-Iутхъум пэшIуекIорэр къыпфашIыгъэми, мыр къы­зэрэпхалъхьащтым иягъэ екIыщтэп. Ау ащ ыуж мэ­фэ 30 те­шIэгъэн фае.

ЦIыфэу пэтхъу-Iутхъур къызэолIагъэм ар те­мыкIэу зыхаригъалъхьэ хъущтэп, уз гъэтIылъыгъэ зиIэри а уахътэм нахь дэи хъугъэмэ, зэ­теуцо­жьын фае. Джащ фэдэу, COVID-м пэшIуе­кIорэ вакцинэр къызыпхалъхьэрэм ыуж мэфищым къыкIоцI шъон пытэ бгъэфедэ хъущтэп.