Адыгэ Республикэм и ЛIы­шъхьэу КъумпIыл Мурат къолъ­хьэ тын-Iы­хыным рес­пуб­ликэм щыпэуцужьыгъэным­кIэ комиссием изэхэсыгъоу тыгъуасэ щыIагъэр зэрищагъ.

Кадрэ резервым изэгъэуIун, лъэпкъ проектхэм, федеральнэ, шъолъыр, муниципальнэ программэхэм ягъэцэкIэн пае бюд­жет мылъкоу къыхагъэкIырэр агъэфедэ зыхъукIэ къолъхьэ тын-Iыхыным пэуцужьыгъэным япхыгъэ Iофыгъохэм мыщ щатегущыIагъэх.

Адыгэ Республикэм хэгъэгу кIоцI IофхэмкIэ иминистрэ ипшъэрылъхэр пIалъэ горэкIэ зыгъэцакIэу БрантIэ Мурэдин къызэрэхигъэщыгъэмкIэ, 2020-рэ илъэсым пыкIыгъэ мэзэ 11-м къыкIоцI республикэм хэгъэгу кIоцI IофхэмкIэ и Министерствэ экономикэ щынэгъончъэнымкIэ ыкIи къолъхьэ тын-Iыхыным пэуцужьыгъэнымкIэ иподраз­деление иIофышIэхэм бзэджэшIэгъэ 44-рэ зэрахьагъэу къыхагъэщыгъ. ЧIэнагъэу ашIыгъэ сомэ миллион 12,9-р къара­гъэпщыныжьыгъ.

Зэхэсыгъом зэрэщыхагъэунэфыкIыгъэмкIэ, экономикэ щынэгъончъэнымкIэ ыкIи къолъхьэ тын-Iыхыным пэуцужьыгъэнымкIэ подразделением иIофы­шIэ­хэм анахьэу джыдэдэм анаIэ зытырагъэтырэр къэралыгъо, муниципальнэ щыкIагъэхэм апае тендерхэу, зэнэкъокъухэу зэхащэхэрэм хэбзэ къулыкъухэм ялIыкIохэм бзэджэшIагъэу ащызэрахьэхэрэм яхьылIэгъэ документхэр зэхэгъэуцогъэнхэр ары. Бюджетым епхыгъэ IофышIэ 23-мэ бзэджэшIагъэхэр зэрахьагъэу агъэунэфыгъ. Ахэм ащыщэу нэбгырэ 16-мэ уголовнэ пшъэ­дэкIыжь арагъэхьыгъ.

Адыгеим и ЛIышъхьэ респуб­ликэм ихэбзэ къулыкъухэм япа­щэхэм пшъэрылъ афишIыгъ хэбзэухъумакIохэм, уплъэкIунхэр зэхэзыщэрэ организациехэм ренэу гъусэныгъэ адыряIэнэу бюджет мылъкум игъэфедэнкIэ хэукъоныгъэхэр амышIынхэм фэшI.

Шъугу къэтэгъэкIыжьы респуб­ликэм ипащэ тапэкIэ пшъэрылъ зэрафишIыгъагъэм тетэу къолъхьэ тын-Iыхыным пэуцужьыгъэ­ным тегъэпсыхьэгъэ программэмкIэ къэралыгъо къулыкъушIэ 54-м нэс мыгъэ зэрэрагъэджагъэр. Хэбзэ къулыкъухэм Iоф ащызышIэхэрэм зэфэдэ амалхэр яIэнхэмкIэ КъумпIыл Мурат пшъэрылъэу къыгъэуцугъэхэр гъэцэкIэгъэнхэм тегъэпсыхьагъэу кадрэ резервым изэгъэуIун, еджэнымкIэ, общественнэ Iоф­шIэнымкIэ гъэхъэгъэ гъэнэфагъэ­хэр зиIэ ныбжьыкIэхэр къэралыгъо къулыкъу IофшIапIэхэм штэгъэнхэм анаIэ тыра­гъэты.

Адыгэ Республикэм и ЛIышъхьэрэ Адыгеим иминистрэхэм я Кабинетрэ я Администрацие къэралыгъо къулыкъумкIэ ыкIи кадрэ политикэмкIэ и ГъэIоры­шIапIэ ипащэу Шъхьабэ Налбый зэхэсыгъом къызэрэщиIуагъэмкIэ, 2020-рэ илъэсым зэнэкъо­къухэм апхырыкIыгъэ нэбгыри 10 къэралыгъо граждан къулыкъум аштагъ, Администрацием ирезерв щыщэу зы нэбгырэ къыхахыгъ. Адыгэ Республикэм и ЛIышъхьэ пшъэрылъ зэрафишIыгъэм тетэу республикэм икадрэ резерв изэгъэуIункIэ 2021-рэ илъэсым Iофтхьэбзэ гъэнэфагъэхэр зэрахьащтых.

«Программэхэу, лъэпкъ проектхэу республикэм щагъэцакIэхэрэм шIуагъэу къатыщтыр бэкIэ зэлъытыгъэр хэбзэ къулыкъухэм Iоф ащызышIэрэ специалистхэм ухьазырныгъэу яIэр ары. Ащ пае IофышIэхэм яIэпэIэсэныгъэ зыкъегъэIэты­гъэн, къэралыгъо, муниципальнэ къулыкъушIэхэм яамалхэм ягъэфедэн анаIэ нахь тырагъэ­тын фае. ЩыIэныгъэм къызэригъэлъагъорэмкIэ, нэкI хъугъэ IэнатIэхэм аIуагъэхьащтхэмкIэ зэнэкъокъухэр зэрэзэхащэрэр зиIоф хэшIыкIышхо фызиIэ спе­циалистхэм яугъоинкIэ анахь амалышIоу щыт», — хигъэунэфыкIыгъ КъумпIыл Мурат.

Къолъхьэ тын-Iыхыным пэуцужьыгъэнымкIэ Шэуджэн районым иIофхэм язытет ехьылIэгъэ отчетхэм зэхэсыгъом нэ­ужым щядэIугъэх. Ащ хэлэжьагъэхэм къолъхьэ тын-Iыхыным Адыгэ Республикэм щыпэуцу­жьыгъэнымкIэ комиссием 2021-рэ илъэсым Iоф зэришIэщт пла­ныр аухэсыгъ.