Лъэпкъ проектэу «ПсэупIэр ыкIи къэлэ щыIакIэр» зыфи­Iорэм игъэцэкIэн зэрэлъыкIуа­тэрэм зыщытегущыIэгъэхэ зэ­хэсыгъо тыгъуасэ зэхащагъ. Ащ тхьамэтагъор щызэри­хьагъ Республикэу Татарстан и Президентэу, УФ-м и Къэралыгъо совет иIофшIэкIо куп ипащэу Рустам Миннихановым.

Видеоконференцие шIыкIэм тетэу кIогъэ Iофтхьабзэм хэлэжьагъэх Урысыем и Президент иIэпыIэгъоу, УФ-м и Къэралыгъо совет исекретарэу Игорь Левитиныр, УФ-м и Правительствэ и Тхьаматэ игуадзэу Марат Хуснуллиныр. Адыгеир къэзы­гъэлъэгъуагъэр республикэм и ЛIышъхьэу КъумпIыл Мурат.

Марат Хуснуллиным пэублэ псалъэ къышIызэ, мы IофшIэкIо купым шIуагъэ къытэу ипшъэ­рылъхэр зэригъэцакIэхэрэр къыхигъэщыгъ.

Лъэпкъ проектхэу «ПсэупIэр ыкIи къэлэ щыIакIэр», «Щынэгъончъэ ыкIи шэпхъэшIухэм адиштэрэ автомобиль гъогухэр» зыфиIохэрэм къадыхэлъытэгъэ Iофтхьабзэхэр зэрифэшъуашэу зэрагъэцакIэхэрэр хигъэунэфыкIыгъ. Ахэм яшIуагъэкIэ гъогу­кIэхэр ашIых ыкIи агъэкIэжьых, джащ фэдэу пандемием илъэ­хъан псэолъэшIыным ылъэныкъо­кIэ къэгъэлъэгъонхэм къащагъэ­кIагъэп, непэрэ мафэм ехъулIэу къэралыгъом квадратнэ метрэ миллион 80 фэдиз зэрылъ псэу­пIэхэр щашIыгъ. Ащ дакIоу про­центхэр нахь макIэ зэрашIыгъэ­хэм ишIуагъэкIэ ипотекэмкIэ чIы­фэу аратырэми хэхъуагъ.

Лъэпкъ проектэу «ПсэупIэр ыкIи къэлэ щыIакIэр» зыфиIорэм игъэцэкIэн зэрэлъыкIуатэрэм нэужым тегущыIагъэх.

Федеральнэ проектэу «Псэу­пIэм» къыдыхэлъытагъэу 2030-рэ илъэсым нэс Адыгеим квадратнэ метрэ миллиони 2-рэ мин 622-рэ зэрылъ псэупIэхэр щатын фае, мы илъэсымкIэ а къэгъэлъэгъоныр квадратнэ метрэ мин 255-рэ мэхъу. Тыгъэгъазэм и 1-м ехъулIэу квадратнэ метрэ мин 227,2-рэ атыгъах, илъэсым ыкIэм нэс планыр гъэцэкIагъэ хъущт. Адыгеим социальнэ-экономикэ хэхъоныгъэ ышIыным фытегъэпсыхьэгъэ унэе программэм къыдыхэлъытагъэу проект-сметэ тхьапэхэм ягъэхьазырын мы илъэсым сомэ миллион 86-рэ пэIуагъэхьанэу агъэнафэ. Ащ ишIуагъэкIэ къихьащт илъэсым щыублагъэу инженернэ сетьхэм яшIын рагъэжьэн алъэ­кIыщт.

Адыгеим и ЛIышъхьэ зэхэсыгъом зэфэхьысыжьхэр къыфи­шIы­зэ, псэупIэхэм яшIынкIэ фе­деральнэ проектхэм ыкIи къэралыгъо программэхэм яшIогъэшхо къызэрэкIорэр къыIуагъ. ГущыIэм пае, къызэхэонымкIэ щынагъоу щыт унэхэм арысхэр гъэкощыгъэнхэмкIэ (квадратнэ метрэ мини 7,9-рэ мэхъу) шъо­лъырым пшъэрылъэу къыфагъэу­цугъэр 2025-рэ илъэсым Iоныгъом и 1-м нэс зэшIуахын фае.

— УнакIэхэр зэрэтшIыщтхэм къыкIэлъыкIоу пшъэрылъ заулэ зэшIохыгъэ мэхъу. ТицIыфхэм шэпхъэшIухэм адиштэрэ псэу­пIэхэр яIэ хъущтых, псэолъэшIыным хэхъоныгъэхэр ышIыщтых, ащ дакIоу IофшIэпIэ чIыпIакIэхэр къызэIутхынхэ амал къытыщт, — къыIуагъ КъумпIыл Мурат.

ЫпшъэкIэ зигугъу къэтшIыгъэ проектым игъэцэкIэн къыдыхэлъытагъэу щагухэм ыкIи общественнэ чIыпIэхэм язэтегъэ­псы­хьан Адыгеим щылъагъэкIуатэ. Мы илъэсым ащ сомэ миллиони 146,1-рэ пэIуагъэхьагъ, ащ щыщэу сомэ миллиони 126,1-р федеральнэ гупчэм къытIупщыгъ. Общественнэ чIыпIэ 14 ыкIи щагу 35-рэ зэтырагъэпсы­хьагъэх. Къихьащт илъэсми а IофшIэныр лъэгъэкIотэщт.

Федеральнэ гупчэм къытIупщырэ мылъкур шIуагъэ къытэу гъэзекIогъэн, лъэпкъ проектхэм амалэу къатыхэрэр гъэфедэгъэн­хэ зэрэфаер республикэм ипащэ кIэухым къыIуагъ.

АР-м и ЛIышъхьэ ипресс-къулыкъу