Адыгеим икъэлэ шъхьаIэ ИлъэсыкIэм зыфегъэхьазыры. Мыгъэ Мые­къуа­пэ ыкIи ащ къыкIэрысхэм яплощадки 6-мэ илъэсыкIэ чъыгхэр аща­гъэуцущтых.

Мыекъопэ къэлэ админист­рацием культурэмкIэ и ГъэIоры­шIапIэ къызэритыгъэмкIэ, район цIыкIоу Восходым (урамэу Шоссейнэм тет аллеем), джащ фэдэу станицэу Ханскэм игупчэ елкэр ащагъэуцугъах.

Мы мафэм ехъулIэу къэлэ гупчэ паркым елкэр щагъэуцу. Ащ нэмыкIэу Лениным ыцIэ зыхьырэ гупчэм метрэ 25-рэ зилъэгэгъэ илъэсыкIэ чъыгым игъэуцун щыфежьэщтых. Елкэм изэпкъырыгъэуцон ыкIи игъэ­дэхэн епхыгъэ IофшIэнхэр тыгъэгъазэм и 15-м нэс аухыщтых.

Хабзэ зэрэхъугъэу, Мыекъуа­пэ иурам шъхьаIэу Краснооктябрьскэр электрическэ остыгъэхэмкIэ дахэу гъэнэфыгъэу агъэкIэрэкIэщт. Ащ къыхэкIэу урамхэу Советскэмрэ Пионерскэмрэ азыфагу транспортыр щыземыкIонэу зэфашIыщт.

Мы илъэсым республикэм мэфэкI Iофтхьабзэхэр щызэхащэщтхэп. Арэу щытми, Мыекъуа­пэ игупчэ фотозонэр щагъэу­цущт, аттракционхэм ыкIи мэфэкI ермэлыкъым Iоф ашIэщт.

Эпидемием ылъэныкъокIэ чIыпIэ къинэу тызэрытым къы­хэкIыкIэ аттракционхэр зиехэу ыкIи предпринимательхэу мэфэкI ермэлыкъым хэлажьэхэрэм Iофтхьабзэхэр щынэгъончъэу зэхащэнхэмкIэ нэгуихъор ыкIи дезинфекциер зэрашIырэ пкъы­гъохэр агъэфедэнхэу афагъэпытагъ.

Къэлэдэсхэм япсауныгъэ къаухъумэнэу, зыфэсакъыжьынхэу, илъэсыкIэ мэфэкIыр унэм къыщырагъэхьанэу Мые­къопэ къэлэ администрациер къяджэ.

КIарэ Фатим.