Врачхэр анахьэу зыщафимыкъурэ лъэныкъохэр «Гастроэнтерологиер», «Кардиологиер», «Клиническэ лабораторнэ диагностикэр», «Онкологиер», «Патологическэ анатомиер», «Пульмонологиер», «Травматологиемрэ ортопедиемрэ», «Ультразвуковой диагностикэр», «КIэлэцIыкIу хирургиер», «Медицинэ IэпыIэгъу псынкIэр», «Акушерствэмрэ гинекологиемрэ», «Неонатологиер», «Нефрологиер», «Психиатрие-наркологиер», «Оториноларингологиер», «Терапиер», «Трансфузиологиер» ыкIи нэмыкIхэр ары.

Къуаджэхэм ащылэжьэрэ медицинэ IофышIэхэм ыпкIэ хэмылъэу агъэфедэнэу чIыгу Iахьхэр аратыщтых.

Псауныгъэм икъэухъумэн фэгъэзэгъэ IэзапIэхэу къоджэ псэупIэхэмрэ нэбгырабэ зыдэмыс къэлэ псэупIэхэмрэ адэтхэм ащылэжьэщт медицинэ IофышIэхэр къэгъотыгъэнхэмкIэ Урысыем и Президентэу Владимир Путиным Урысые Федерацием и Федеральнэ ЗэIукIэ фигъэхьыгъэ тхыгъэр гъэцэкIэгъэным тегъэпсыхьа-гъэу Адыгэ Республикэм и Къэралыгъо Совет — Хасэм идепутатхэр Адыгэ Республикэм иминистрэхэм я Кабинет ипредложениехэм ахэплъагъэх ыкIи Адыгэ Республикэм и Законэу «Адыгэ Республикэм и Законэу «Къэралыгъо е муниципальнэ мылъкум хэхьэрэ чIыгу Iахьхэр унэе унэхэр ащагъэпсынхэу е унэе IэпыIэгъу хъызмэтыр щызэхащэнэу ыпкIэ хэмылъэу цIыфхэм ятыгъэнхэм фэшI муниципальнэ образованиехэмрэ сэнэхьатхэмрэ гъэнэфэгъэнхэм ехьылIагъ» зы­фиIорэм иа 1-рэ статья зэ­хъокIыныгъэ фэшIыгъэным фэ­гъэхьыгъэр» аштагъ.

Урысые Федерацием чIыгу­хэмкIэ и Кодекс диштэу пэублэ медикэ-санитар IэпыIэгъу, медицинэ IэпыIэгъу псынкIэ языгъэгъотырэ медицинэ Iофы­шIэ­хэу муниципальнэ образованиехэр зыфыщыкIэхэрэр депутатхэм агъэнэфагъэх. Джащ фэдэу илъэси 6-кIэ чIыгу Iахьхэр пкIэ хэмылъэу агъэфедэнэу зэратын алъэкIыщт медицинэ IофышIэхэм сэнэхьатэу яIэн фаехэри агъэу­нэфыгъэх.

ЗэхъокIыныгъэхэр зытегъэ­псыхьагъэхэр медицинэ Iофы­шIэхэм IэпыIэгъу ягъэгъоты­гъэныр, IэпэIэсэныгъэшхо зы­хэлъ специалистхэр къуаджэ- хэм ащылэжьэнхэм тегъэгу­шIухьэгъэнхэр ары.