Урысые Федерацием и Президентэу Владимир Путиным 2021-рэ илъэсымкIэ ыкIи 2022 — 2023-рэ илъэсхэм ячэзыу пIалъэкIэ федеральнэ бюджетым ехьылIэгъэ Законым тыгъэгъазэм и 8-м кIэ­тхэжьыгъ. ШэкIогъум и 26-м бюджетыр Къэралыгъо Думэм щаштагъ, шэкIогъум и 2-м ФедерациемкIэ Советым ащ къыщыдырагъэштагъ.

2021-рэ илъэсым сомэ триллион 18,8-рэ хъурэ хахъо бюджетым иIэнэу, сомэ триллион 21,52-рэ хъурэ хъарджхэр ышIы­нэу, сомэ триллиони 2,76-м ар фыщыкIэнэу ары къызэрэра­дзэрэр.

Республикэм хэхъоныгъэ ышIы­нымкIэ мэхьанэшхо зиIэ проект инхэм япхырыщын пае мылъкушхо Адыгеим къыфыхагъэкIынэу бюджетым къыщыдэ­лъытагъ. Адыгэ Республикэм иреспубликэ бюджет зэхагъэуцо зэхъуми ар къыдалъытагъ. Республикэм иреспубликэ бюджет Iоф дашIэ зэхъум анахьэу анаIэ зытырагъэтыгъэр цIыфхэм IэпыIэгъу афэхъугъэнымкIэ хэгъэгум и Президент пшъэры­лъэу къыгъэуцугъэхэмрэ социальнэ программэхэмрэ ягъэцэкIэн пэIухьащт мылъкур икъоу къы­хэгъэкIыгъэныр ары.

Федеральнэ бюджетым Адыге­им пае мылъкушхо къыхагъэкIыщт. 2021-рэ илъэсым социаль­нэ политикэм ипхырыщын пае сомэ миллиардрэ миллион 427-м нэ­сэу Адыгеим къыфыхагъэкIыщт. Илъэси 3-м къыщегъэжьагъэу илъэси 7-м нэс зыныбжь кIэлэ­цIыкIухэм апае сомэ миллиардым нэсэу субсидиехэм къафыхагъэхъощт. Я 3-рэ сабыир ыкIи ащ къыкIэлъыкIохэрэр къызы­хъухэкIэ ахъщэ IэпыIэгъоу ара­тырэм пае субсидиехэр фэди 4-кIэ нахьыбэ ашIыщтых, сомэ миллиони 181,9-м ар нэсыщт. Классхэм пэщэныгъэ адызезы­хьэрэ кIэлэегъаджэхэм IэпыIэгъоу аратырэм фэди 3-кIэ хэ­хъощт, сомэ миллион 223,4-м ар нэсыщт. IофшIэн зимыIэхэм фэди 3-кIэ нахьыбэу субвенцие­хэр къаратыщтых, сомэ миллион 382,7-м а IэпыIэгъур нэсыщт.

Шъугу къэтэгъэкIыжьы бюджетыр зэхагъэуцо зэхъум рес­публикэм IэпыIэгъоу къыратыщтыр нахьыбэ шIыгъэнымкIэ республикэм ипащэхэр Урысые Федерацием и Правительствэ зэрэдэлэжьагъэхэм, лъэны­къуищ зыхэхьэрэ комиссием хэтэу, Адыгеим ыцIэкIэ депутатэу, Къэ­ралыгъо Думэм ибюджет Комитетрэ Урысые политикэ партиеу «Единэ Россиемрэ» ахэтэу Владислав Резник яшIуа­гъэ къызэрэкIуагъэр.

Ащ къызэриIуагъэмкIэ, къэра­лыгъом исоциальнэ пшъэрылъхэр икъоу гъэцэкIэгъэнхэм фе­деральнэ бюджетыр фыте­гъэпсыхьагъ. Хэгъэгум и Президент Федеральнэ ЗэIукIэм фигъэхьыгъэ тхыгъэм цIыфхэм социальнэ IэпыIэгъу зэрафэ­хъущтхэ программакIэу зигугъу къыщишIыгъэм, лъэпкъ проектхэм ягъэцэкIэн епхыгъэ Указхэу Президентым къышIыгъэхэм икъоу мылъкур къафатIупщыщт.

«Социальнэ политикэм, псау­ныгъэм икъэухъумэн япхыгъэ Iофыгъохэу мэхьанэшхо зиIэхэм язэшIохын, шъолъырхэм экономикэ хэхъоныгъэ ягъэшIыгъэным пае мылъкушхо зэрагъэу­Iугъ. Пандемием къыздихьы­гъэ­хэр дэгъэзыжьыгъэнхэмкIэ, цIыфхэм хахъоу яIагъэр зыпкъ игъэуцожьыгъэнымкIэ, экономикэм зыкъегъэIэтыгъэнымкIэ Урысые Федерацием и Правительствэ мыгъэ унашъоу ыштагъэхэмкIэ хъарджэу ашIыщтхэр бюджетым къыщыдалъытагъэх. Шъолъырыбэмэ арысхэм, Адыгеим щыпсэухэрэри ахэм зэра­хэтхэу, мы илъэс къызэрымыкIом бюджетым тишъыпкъэу ты­зэрэдэлэжьагъэр къызэхашIэщт», — къыIуагъ Владислав Резник.

Къихьащт илъэсым псауныгъэм икъэухъумэн лъэшэу анаIэ тырагъэтыщт. А гухэлъхэм апае федеральнэ бюджетым къыщыдэлъытэгъэ хъарджхэр процент 13-кIэ нахьыбэ хъущтых, сомэ триллион 1,123-м ар нэсыщт. Поликлиникэхэм ягъэкIэжьын пае шъолъырхэм сомэ миллиард 90-рэ къафыхагъэкIыщт. Псауныгъэм икъэухъумэн пае фэ­дищкIэ нахьыбэу федеральнэ бюд­жетым мылъку къыхагъэ­кIыщт, сомэ миллион 413,5-рэ ар хъущт. Ащ щыщэу сомэ миллион 254,2-м ехъур поликлиникэхэм ягъэкIэжьын тегъэ­псыхьэгъэ шъолъыр программэм ипхырыщын пэIуагъэхьащт.

«Республикэм иполиклини­кэхэм хэхъоныгъэ ягъэшIыгъэнымкIэ мэхьанэшхо зиIэ пшъэ­рылъхэм ягъэцэкIэн а мылъкур пэIуагъэхьащт. Пандемием илъэ­хъан анахьэу ащ мэхьанэ иIэу щыт», — хигъэунэфыкIыгъ Адыгэ Республикэм и ЛIышъхьэ.

Адыгэ Республикэм социальнэ-экономикэ хэхъоныгъэ зэри­шIыщт унэе программэм игъэцэкIэн пае сомэ миллиард къа­тIупщыщт. Мыгъэ рагъэжьэгъэ Iофтхьабзэхэу программэхэм къащыдэлъытагъэхэм ялъы­гъэкIотэн а мылъкур пэIуагъэ­хьащт. Ахэм ащыщых автомобиль гъогоу Дахъорэ Лэгъо­-На­къэрэ зэзыпхырэм игъэкIэжьын, поселкэу Краснооктябрьскэм газ станциер щыгъэкIэжьыгъэныр, сабыищ ыкIи ащ нахьыбэ зиIэ унагъохэм къафыхагъэкIыгъэ чIыгу Iахьхэм инженер ин­фраструктурэр ащыгъэпсыгъэныр, бэнэнымкIэ спорт еджапIэм иинфраструктурэ гъэкIэ­жьыгъэныр ыкIи нэмыкI Iоф­тхьабзэхэр.

Владислав Резник къызэрэхигъэщыгъэмкIэ, шъолъырхэм ахъщэ IэпыIэгъоу аIукIэщтыр дотацие, субсидие, субвенцие лъэпкъи 100-м ехъумэ атырагощэщт. ПстэумкIи 2021-рэ илъэсым федеральнэ бюджетым имылъкукIэ республикэм псэо­лъэ 50-м ехъу щагъэкIэжьынэу, щашIынэу, щагъэцэкIэжьынэу рахъухьэ. Ахэм ахэхьэх кIэлэцIыкIу IыгъыпIэхэр, гурыт еджа­пIэхэр, культурэмкIэ унэхэр, спорткомплексхэр, автомобиль гъогухэр, псыIыгъыпIэхэр, къуа­джэхэм ащагъэпсыщт псэуа­лъэхэр.

ЦIыфхэм IэпыIэгъу афэхъугъэ­нымкIэ къэкIорэгъым мылъку Iахь тедзэхэр шъолъырхэм къа­фыхагъэкIын алъэкIыщт.

«Ящэнэрэ хэплъэгъумкIэ бюд­жетыр зэраштэрэм ехьылIэгъэ унашъоу Къэралыгъо Думэм ща­штагъэм Правительствэм пшъэрылъ щыфашIыгъ ищыкIагъэу зыхъурэм мыгъэрэм нахь мымакIэу 2021-рэ илъэсым шъолъырхэм мылъку тедзэ аратынэу», — къыIуагъ Владислав Резник.

Шъугу къэтэгъэкIыжьы мыгъэ пандемием зызэриушъомбгъугъэм епхыгъэу Урысые Федерацием и Президент пшъэрылъ зэрафишIыгъэм, Урысые Фе­дерацием и Правительствэрэ бюджет мылъкур атегощэгъэнымкIэ парламент комиссиемрэ ашIыгъэ унашъохэм адиштэу Адыгэ Республикэм сомэ милли­арди 7-м ехъу Iахь тедзэу къы­зэрэфыхагъэкIыгъэр. А мылъкумкIэ врачхэм, кIэлэегъаджэ­хэм, сабыйхэр зэрыс унагъохэм IэпыIэгъу афэхъугъэх.

Адыгэ Республикэм и ЛIышъхьэ ипресс-къулыкъу