IэпыIэгъу фэхъугъэх
Хьыкум приставхэм я Федеральнэ къулыкъу АдыгеимкIэ и ГъэIорышIапIэ иотделэу Тэхъутэмыкъое районым щыIэм иIофышIэхэм яшIуагъэкIэ хъулъфыгъэм илэжьапкIэ фызэкIагъэкIожьыгъ.
Водителэу Iоф зышIэрэ хъулъфыгъэм къылэжьыгъэ сомэ мин 50 организацием къыритыжьын фэягъ. Зифитныгъэхэр аукъуагъэм хьыкумым зыфигъэзагъ.
ЛэжьапкIэм итын ылъэныкъокIэ организацием ипащэхэм чIыфэу ателъыр къатыжьын зэрэфаем епхыгъэ унашъо хьыкумым ышIыгъ. Ар яIэубытыпIэу хьыкум приставхэм Iоф къызэIуахыгъ.
Организацием ипащэхэм хьыкум приставыр адэгущыIагъ, унашъор замыгъэцакIэкIэ зэфэхьысыжьэу фэхъущтхэр, ащ уголовнэ Iофи къыкIэлъыкIон зэрилъэкIыщтыр агуригъэIуагъ. Ащ ыуж чIыфэр къапщыныжьыгъ, ащкIэ Iофыр зэфашIыжьыгъ.
2020-рэ илъэсым имэзипшI пштэмэ, лэжьапкIэм итынкIэ чIыфэм щыщэу сомэ миллиони 4-м ехъу цIыфхэм афызэкIагъэкIожьыгъ.
Хьыкум приставхэм я Федеральнэ къулыкъу АдыгеимкIэ и ГъэIорышIапIэ ипресс-къулыкъу