Пшызэ къэзэкъыдзэм и Мыекъопэ къэзэкъ от­дел изэхэсыгъо видео-конференцие шIыкIэм тетэу зэхащагъ.

Адыгэ Республикэм лъэпкъ IофхэмкIэ, IэкIыб къэралхэм ащыпсэурэ тилъэпкъэгъухэм адыряIэ зэпхыныгъэхэмкIэ ыкIи къэбар жъугъэм иамалхэмкIэ и Комитет итхьаматэу Шъхьэлэхъо Аскэр зэфэхьысыжь Iофтхьабзэм хэлажьэхэрэм къафэгушIуагъ, Мыекъопэ къэзэкъ отделыр республикэм иобщественнэ щыIакIэ чанэу зэрэхэлажьэрэр хигъэунэфы­кIыгъ. Культурэм, шэн-хабзэхэм, унагъом ищыIакIэ нахьышIу шIыгъэным афэгъэхьыгъэ Iофыгъохэр тапэкIи дэгъоу зэрагъэцэкIэщтхэм ицыхьэ зэрэтелъыр къыIуагъ.

Мыекъопэ къэзэкъ отделым ипащэу Александр Даниловым 2020-рэ илъэсым IофшIагъэу иIэр зэфихьысыжьызэ, Апшерон, Шытхьэлэ, нэмыкI отделхэм ягъусэу экономикэм изыкъегъэIэтын, мыхъо-мышIагъэхэр зезыхьэхэрэм, анахьыбэу мэзыр хэбзэнчъэу изыупкIыхэ­рэм зэрапэуцужьыхэрэр, фэ­шъхьафхэри къыIотагъэх.

Дзэ къулыкъум нэбгырэ 27-рэ зэрагъэкIуагъэр, ныбжьыкIэхэр шIэжь яIэу пIугъэнхэмкIэ лIы­хъужъ щытхъум епхыгъэ чIыпIэ­хэр арагъэлъэгъунхэмкIэ зе­кIо­хэр, зэIукIэгъу гъэшIэгъон­хэр зэрэзэхащэхэрэр изэфэ­хьысыжь­хэм къащыхигъэщыгъэх.

Къэзэкъ еджэпIэ класс 292-мэ кIэлэеджэкIо 5302-рэ аще­джэ. Ахэр Апшерон, Шытхьэлэ районхэм, нэмыкIхэм арытых. Адыгеим класси 5 къыщызэ­Iуахыгъ.

Адыгэ Республикэм лъэпкъы­бэ зэрэщыпсэурэр къэзэкъ от­делым къыдилъытэзэ, общественнэ движениехэм, организациехэм зэпхыныгъэу адыриIэр тапэкIи щыIэныгъэм зэрэщыпхыращыщтыр Александр Даниловым иеплъыкIэхэм къащыхигъэщыгъ.

«Къэзэкъ район обществэ анахь дэгъу» зыфиIорэ щыт­хъу­цIэр Шытхьэлэ районым зэ­рэ­фагъэшъуашэрэр А. Даниловым къыIуагъ. Атаманэу Сергей Ефимовым ащкIэ фэразэх.

Пшызэ къэзэкъыдзэм ипащэ иапэрэ гуадзэу Александр Власовыр, Урысые къэзэкъы­дзэм игенералэу, атаманэу Ни­колай Долуда, нэмыкIхэри зэфэхьысыжь зэхахьэм къыщыгущыIагъэх.

Мыекъопэ къэзэкъхэм яотдел иIофшIагъэ уезэгъы хъущтэу зэхахьэм къыщыгущы-Iа­гъэхэм къаIуагъ. Александр Да­ниловым иIофшIэгъухэм зэрафэразэр изэфэхьысыжьхэм къащыхигъэщыгъ. Яобщественнэ пшъэрылъхэр дэгъоу зыгъэцакIэхэрэм щытхъу тхылъхэр аратыжьыгъэх.

ЕмтIылъ Нурбый. Сурэтыр зэхахьэм къыщы­тырахыгъ.