Нахьыбэу непэ зыгъэгумэкIыхэрэр
Фэтэрыбэу зэхэт унэхэм ачIэсхэм гумэкIыгъо шъхьаIэу сыдигъокIи яIэр гъэIорышIэкIо компаниеу зэпхыгъэхэм псэупIэ-коммунальнэ фэIо-фашIэхэр зэригъэцакIэхэрэр, ахэм апкIэ къазэрафалъытэрэр ары. Ащ фэдэу упчIэ зэфэшъхьафыбэ фагъазэ АР-м и Общественнэ палатэ чIыпIэ зыгъэIорышIэжьыпIэхэм яIофхэмкIэ, псэупIэ политикэмкIэ ыкIи псэупIэ-коммунальнэ хъызмэтымкIэ икомиссие. Нахьыбэу зыгъэгумэкIыхэрэм джэуапхэр къаритыжьыгъэх ащ итхьаматэу Татьяна Гоголевам.
УпчIэхэмрэ джэуапхэмрэ нэIуасэ шъуафэтэшIы.
Зэпахырэ узэу дунаир зэлъызыкIугъэм ыпкъ къикIыкIэ цIыфхэр зэхэмыхьанхэу зыщашIыгъэ уахътэм уплъэкIуакIохэм счетчикэу фэтэрхэм арытхэр ауплъэкIунхэу фитыныгъэ щыIа?
Джэуап: Федеральнэ хэбзэгъэуцугъэм ащ фэгъэхьыгъэу зыпари зэхъокIыныгъэ фашIыгъэп. Коммунальнэ фэIо-фашIэхэр зыгъэцакIэхэрэм илъэсым зэ нахь мымакIэу счетчикхэм Iоф зэрашIэрэр, фыкъуагъэ яIэмэ ауплъэкIун фае. Ащ фэдэ псэуалъэхэр фэтэр кIоцIым итхэмэ, мэзищым зэ язытет зэригъэшIэнэу шапхъэхэм къащыдэлъытагъ.
Коронавирусым зимыушъомбгъуным пае уплъэкIунэу гъэIорышIэкIо компанием планым щигъэнэфэгъагъэр зэкIихьажьыгоми хъущт. ЗэкIимыхьажьыгъэмэ, уплъэкIуакIохэм апае маскэхэр, Iалъэхэр, вирусым щызыухъумэщтхэ щыгъынхэр афигъэхьазырынхэ фае. Фэтэрэу зэрыхьэхэрэм пэпчъ ахэр кIэу зэблахъунхэр шIокI зимыIэ Iофэу щыт.
ЦIыфэу коронавирусыр къызэолIагъэм ипсэупIэ гъэIорышIэкIо компанием дезинфекцие ышIын фая?
Джэуап: ГъэIорышIэкIо компанием ипшъэрылъхэм ар ахахьэрэп. Унэм чIэсхэм зэдагъэфедэрэ мылъкум иIыгъын ащ иIофшIэн шъхьаIэр. Дезинфекцие зышIын фаер псэупIэр зыер е организациеу ащ фэдэ Iофхэр зыгъэцакIэрэр ары.
Фэтэрыбэу зэхэт унэм ищагу хэбзэнчъэу щагъэпсыгъэ автомобиль уцупIэр Iуихыжьынэу хэта фитыныгъэ зиIэр?
Джэуап: Унэр зытет чIыгу Iахьыр гъэнэфагъэу ыкIи кадастрэ учетым хэгъэуцуагъэу щытмэ, ар ащ чIэсхэм зэдагъэфедэрэ мылъкум хэхьэ. Джащыгъум зэIукIэ ашIынышъ, чIыгу Iахьыр зэрагъэфедэщтыр зэдырахъухьан фитых. Автомобиль уцупIэр зэрагъэпсыгъэм дырамыгъаштэрэмэ, ар Iуахыжьыни алъэкIыщт. Ахэр псэупIэ Кодексым зэхэугуфыкIыгъэу щыгъэнэфагъэх.
ЧIыгур ащ тетэу мытхыгъэмэ, гъэуцупIэр Iуахыным пае чIыпIэ зыгъэIорышIэжьыпIэ къулыкъоу зыем зыфагъэзэн фае.
Фэтэрыр зыем балконым ыкIыб тенэчкIэ къызэфишIыгъ. Ащ фэдэ фитыныгъэ хэбзэгъэуцугъэм къырета?
Джэуап: Фэтэрыбэу зэхэт унэм иконструкцие щыщкIэ алъытэхэрэр, гущыIэм пае, зыхэшIыкIыгъэ плитэхэр, фундаментыр, балконхэр зытешIыхьэгъэ плитэхэр, ащ чIэсхэм зэдыряе мылъкум хэхьэх. Арышъ, унэм итеплъэ изытет, проектэу зэрашIыгъэр мыукъогъэным алъыплъэн фаер гъэIорышIэкIо компаниеу зэпхыгъэр ары.
Проектым зэхъокIыныгъэхэр фэшIыгъэнхэм пае ыпэрапшIэу унэм чIэсхэр зэхэгущыIэжьынхэшъ зэдаштэн фае. Ащ имызакъоу, чIыпIэ зыгъэIорышIэжьыпIэхэми фитыныгъэ къатынэу щыт. Ахэр ымыгъэцакIэу балконым ежь зыфаер езышIэрэм законыр еукъо.
ПсэупIэм иIыгъын ыпкIэ къэзымытыгъэхэм пеня къаIихынэу мы уахътэм гъэIорышIэкIо организацием фитыныгъэ иIа?
Джэуап: ИIэп. УФ-м и Правительствэ тызыхэт илъэсым имэлылъфэгъу мазэ унашъоу ышIыгъэм къызэрэщиIорэмкIэ, коммунальнэ фэIо-фашIэхэм, псэупIэм иIыгъын ыкIи унэм игъэкIэжьын апкIэ къэзымытышъугъэхэм 2021-рэ илъэсым ищылэ мазэ и 1-м нэс пеня къаIахын фитхэп. Мэлылъфэгъум и 6-р ары мы унашъом кIуачIэ иIэ зыхъугъэр. Ащ ыпэкIэ чIыфэ зытелъыгъэхэм ар анэсырэп.
Фэтэрыбэу зэхэт унэм чIэсхэм зэIукIэу яIагъэм къыхэлэжьагъэхэм ащыщ нэужым кIэгъожьыгъэу бюллетеныр ратыжьынэу къыкIэдэугъэмэ, гъэIорышIэкIо компанием тхылъым ригъэгъэзэжьын фая?
Джэуап. Хьау. ЗэIукIэм иповесткэ щыгъэнэфэгъагъэхэмкIэ рахъухьагъэхэм адыригъаштэу цIыфыр зыкIатхэкIэ, ишIоигъоныгъэ къыриIотыкIыгъэкIэ макIо. КIэгъожьыгъэмэ, хьыкумым зыфигъэзэнэу фитыныгъэ иI. Ар граждан Кодексым ия 81.4-рэ статья ия 3-рэ Iахь итхагъ.
Хэутыным фэзгъэхьазырыгъэр ХЪУТ Нэфсэт.