«Краснодар» тыфэгушIо
«Зенит» — «Боруссия» Д — 1:2. Тыгъэгъазэм и 8-м Санкт-Петербург щешIагъэх. Къэлапчъэм Iэгуаор дэзыдзагъэхэр: Дриусси — 16, «Зенит». Пищек — 67, Витсель — 78, «Боруссия».
Европэм ичемпионхэм ялигэ Кубокыр къыщыдэхыгъэным фэгъэхьыгъэ ешIэгъур «Зенит» дэгъоу ригъэжьагъ. Бэрэ ыпэкIэ зэрилъырэм дакIоу, шъуамбгъоу ешIэщтыгъ. «Боруссие» икъэлапчъэ Дриусси зыдаом, ошIэ-дэмышIэу ухъумакIохэм ащыщ Iэгуаор тефи, чэрэгъузэ хъагъэм ифагъ — 1:0.
«Зенит» пчъагъэм хигъэхъонэу амалышIухэр иIагъэх шъхьае, Азмун, Дзюбэ, Кузяевым, нэмыкIхэм тагъэгушIуагъэп.
«Боруссие» угловоир къызетым, Пищек тиухъумакIохэм азыфагу къыдэкIи, къэлапчъэм Iэгуаор дидзагъ — 1:1. Метрэ 17 фэдизкIэ зыпэчыжьэ къэлапчъэм Витсель зыдаом, ухъумакIохэри, къэлэпчъэIутэу Кержаковыри ащ пэуцунхэм фэмыхьазырхэу къэлъэгъуагъэх, пчъагъэр 1:2 хъугъэ.
ЗэIукIэгъум иаужырэ такъикъхэм Германием икомандэ нахьыбэрэ ыпэкIэ къилъыщтыгъ. ТекIоныгъэм нахь лъэшэу фэбэнагъ. «Зенит» Европэм и Кубок фэгъэхьыгъэ зэнэкъокъум къыхэзыгъ.
«Челси» — «Краснодар — 1:1
Тыгъэгъазэм и 8-м Англием щызэдешIагъэх.
Ощхышхом хэтхэу ешIапIэм щызэнэкъокъугъэх. Кабеллэ къэлапчъэм Iэгуаор дидзагъ. «Челси» пенальтикIэ я 28-рэ такъикъым пчъагъэр зэфэдиз ышIыжьыгъ.
«Краснодар» дунаим щыцIэрыIо «Челси» щымыщынэу дешIагъ. КъэлэпчъэIутэу Городовыр, зэкIэ тиешIакIохэр щысэ атепхынэу зэIукIэгъум хэлэжьагъэх.
«Краснодар» тыфэгушIо. Очкоуи 5 къыхьыгъ, Европэм и Кубок икъыдэхын тапэкIи фэбэнэнэу фитныгъэ къыдихыгъ. 2021-рэ илъэсым, гъатхэм зэIукIэгъухэр ригъэжьэщтых.