Урысыер — Швециер — 30:26 (15:13). Тыгъэгъазэм и 7-м Данием щызэдешIагъэх. ТиешIакIохэм къахэщыгъэхэр: Дмитриева — 6, Кожокарь — 3, Манагарова — 3, Скоробогатченко — 3.

Дунаим игандбол бзылъфыгъэ командэхэм язэнэкъокъоу Данием щыкIорэм пэшIорыгъэшъ ешIэгъухэр купхэм шIэхэу ащау­хыщтых. Урысыем ия 3-рэ зэIу­кIэгъу текIоныгъэр къыщыдихи, очкоуи 6 иIэ хъугъэ.

Швециер командэ къызэрыкIоп. Европэм изэнэкъокъу ты­жьыныр къыщыдихыгъ. Урысыем Олимпиадэ джэгунхэм, Дунаим изэнэкъокъу дышъэр къащихьыгъ, ау Европэм апэрэ чIыпIэр зыкIи къыщыдихыгъэп.

Урысыер Швецием дешIэзэ, пчъагъэр зэрэлъыкIуатэщтыгъэр: 10:5, 12:8, 13:11, 15:13. ЯтIонэрэ едзыгъом Швециер зэрэфэхьазы­рыр ешIапIэм къыщылъэгъуагъ: 16:16, 18:16, 20:19, 21:20.

Олимпиадэ джэгунхэм дышъэр къащызыхьыгъэ Екатерина Ильинар ухъумакIохэм псын­кIэу апхы­рыкIи, ешIапIэм тефэзэ хъагъэм Iэгуаор дидзагъ — 22:20.

Дарья Бобровниковар щысэ тепхынэу ешIэ, игъусэхэр зылъе­щэх. Юлия Маначаровар, Антонина Скоробогатченкэр, фэшъхьафхэри бэрэ апэкIэ илъыхэзэ, пчъагъэм хагъахъо. Мыекъуапэ щыщ къэлэпчъэIутэу Виктория Калининари дэгъоу ешIэ, ау Швецием икомандэ иIэпэIэсэ­ныгъэ шIокIыгъуае типшъашъэхэм къафэхъу. Пчъагъэр 24:22-рэ, къэнагъэр такъикъи 8.

Екатерина Ильинам икIэрыкIэу тегъэгушIо. ПсынкIэу ар мэгу­пшысэ, ухъумакIохэм ябэнызэ, аIэкIэкIы, хъагъэм Iэгуаор дедзэ — 28:24-рэ.

Арэу щытми, рэхьатныгъэу тиIэр нахь макIэ мэхъу, такъикъи 3 фэдиз къэнагъ, пчъагъэр 28:26-рэ. Виктория Калининам тикъэлапчъэ цыхьэшIэгъоу къеу­хъумэ. Iэгуаор хъагъэм изыдзэн зымылъэкIыгъэ Швецием ипшъашъэ В. Калининам къе­плъыгъ, ау сыда ышIэщтыр?

Урысыем икомандэ текIоныгъэр зыIэкIигъэкIыгъэп, 30:26-у къыхьыгъ. Дарья Дмитриевар ешIэкIо анахь дэгъоу зэхэща­кIохэм къыхахыгъ.

ТихэшыпыкIыгъэ командэ ды­шъэм фэбэнэным фэшI ятIонэрэ купым хэхьагъ. Зичэзыу ешIэгъур Данием е Францием дыриIэщт.