«Россети Кубань» зыфиIорэ компанием иве­теранхэм я Совет итхьаматэу, Адыгэ шъолъыр къутамэм ипащэу Рустам Маг­де­евыр «Коллектив — ветеранам!» зыфиIорэ форумым хэлэжьагъ.

Мы Iофтхьабзэм лэжьэным къыкIакIорэм хэгъэхъогъэнымкIэ егъэджакIохэм я Союз кIэщакIо фэхъугъ. УФ-м и Къэралыгъо Думэ экономикэ политикэмкIэ, промышленностымкIэ, инновационнэ хэхъоны­гъэмкIэ ыкIи предпринимательствэмкIэ и Комитетрэ стратегическэ гухэлъхэмкIэ Агентствэмрэ къадеIагъэх.

Урысыем ит хъызмэтшIапIэ­хэм, организацие зэфэшъ­хьаф­хэм яветеранхэм ясоветхэм ятхьэматэхэр ары ащ хэлэжьагъэхэр. Илъэсыбэрэ Iоф ышIа­гъэу, пенсием кIуагъэу IукIыжьыгъэхэм коронавирусым зызщиу­шъомбгъурэ лъэхъаным IэпыIэгъоу аратыщтым ар фэгъэхьыгъагъ.

Зэпахырэ узэу дунаир зэ­лъызыкIугъэм ыпкъ къикIыкIэ гъунэпкъэ гъэнэфагъэхэр щыIэ зэрэхъугъэм анахьэу иягъэ зэ­ригъэкIырэр пенсионерхэр ары. Ащ фэдэу хъыз­мэтшIапIэхэм, организациехэм илъэсыбэ язытыгъэхэм ве­теранхэм ясоветхэр лъэшэу адеIэх.

Форумым хэлажьэхэрэр профсоюзнэ ыкIи ныбжьыкIэ ор­ганизациехэмрэ ветеранхэм ясо­ветхэмрэ къэкIопIэ пстэур агъэфедэзэ Iоф зэрэзэдашIэщтым зэдытегу­щыIагъэх. Пенсием щыIэ ветеран пэпчъ, шъхьадж ищыкIагъэр къыдэлъы­тагъэу, IэпыIэгъу фэхъугъэн фаеу зэ­даштагъ.