Щытхъур Казань къыщахьыгъ
СпортымкIэ дунэе класс зиIэ мастерэу Н. Мадьяровым фэгъэхьыгъэ шIэжь-зэнэкъокъу самбэмкIэ къалэу Казань щыкIуагъ.
Тыгъэгъазэм и 3 — 6-м Урысыем ишъолъыр 18-мэ ябэнэкIо 500-м нахьыбэ алырэгъум щызэнэкъокъугъэх.
— Астрахань, Челябинскэ, Самарэ, Нижегород хэкухэм, нэмыкIхэм яныбжьыкIэхэр текIоныгъэм фэбэнагъэх, — къытиIуагъ Адыгэ Республикэм самбэмкIэ спорт еджапIэм ипащэу, спортымкIэ дунэе класс зиIэ мастерэу Делэкъо Адамэ. — Татарстан ныбджэгъуныгъэ дытиI. Я XXX-рэ зэнэкъокъоу Адыгеир зыхэлэжьа-гъэр гъэшIэгъонэу зэхащагъ. Бысымхэр хьакIэхэм дэгъоу апэгъокIыгъэх. Нэрылъэгъу IэпыIэгъухэр узыIэпащэу агъэпсыгъэх. Татарстан фэгъэхьыгъэ къэбархэр къытфаIотагъэх.
— 2004 — 2006-рэ илъэсхэм къэхъугъэ кIалэхэр зэнэкъокъум зэрэщыбэнагъэхэм тигъэгушIуагъ, — тизэдэгущыIэгъу лъегъэкIуатэ Адыгэ Республикэм самбэмкIэ итренер шъхьаIэу ГуIэтыжь Хъалидэ. — Адыгеим щыщ спортсмен анахь дэгъухэр арых Казань щыбэнагъэхэр.
Мэлгощ Адам, Кобл Рэмэзан, ЛIыхъурэе Мурат, Нащ Расул Урысыем изэнэкъокъу-хэм ахэлажьэх, Къыблэм изэIукIэгъухэм самбэмкIэ хагъэунэфыкIырэ чIыпIэхэр къащыдахыгъэх.
Татарстан щыкIогъэ зэнэкъокъум Адыгеим ибэнакIохэм медали 7 къыщахьыгъ. Мэлгощ Адам, кг 49-рэ, Кобл Рэмэзан, кг 53-рэ, Нащ Расул, кг 64-рэ, ДыдыкI Айтэч, кг 79-рэ, купэу зыхэтхэм апэрэ чIыпIэхэр къащахьыгъэх.
ЛIыхъурэе Мурат, кг 49-рэ, Хьадпашъо Дамир, кг 53-рэ, ятIонэрэ чIыпIэхэр къафагъэшъошагъэх. Хьакъуй Ислъам, кг 71-рэ, ящэнэрэ чIыпIэр къыдихыгъ.
Тренерхэу Гъомлэшк Алый, Делэкъо Адам, ГуIэтыжь Хъалид, Джарымэкъо Нурбый, Джарымэкъо Рустам ныбжьыкIэхэр самбэм фагъасэх.
2021-рэ илъэсым мэзаем и 2-м Урысыем иныбжьыкIэхэм язэнэкъокъу Ермэлхьаблэ щыкIощт. Апэрэ чIыпIэхэр къыдэзыхыхэрэр дунаим язэIукIэгъухэм ахэлэжьэщтых. Адыгеим ибэнакIохэм Ермэлхьаблэ щызэхащэщт зэнэкъокъум зыфагъэхьазыры.