Урысые Федерацием футболымкIэ изэнэкъокъу хэлэжьэрэ командэхэу апшъэрэ купым хэтхэм тыгъэгъазэм и 5 — 7-м я 17-рэ ешIэгъухэр яIагъэх.

ЗэIукIэгъухэр

«Локомотив» — «Рубин» — 3:1, «Спартак» — «Тамбов» — 5:1, «Зенит» — «Урал» — 5:1, «Краснодар» — «Ротор» — 5:0, «Ростов» — «Уфа» — 0:1, «Динамо» — «Арсенал» — 1:0, ЦСКА — «Химки» — 2:2, «Шъачэ» — «Ахмат» — 2:0. Апэ ишъыщтхэр

«Зенит» «Урал» зыдешIэм, Сердар Азмун гъогогъуи 3 къэлапчъэм Iэгуаор дидзагъ. Дзюбэрэ Сантосрэ зырызэ хъагъэм Iэгуаор дадзагъ. С. Азмун Урысыем иешIакIохэм иIэпэIэсэ­ныгъэкIэ къахэщы. «Зенит» хэгъэгум дышъэр къыщыдихыным фэшI С. Азмун, А. Дзюбэ ялъытыгъэр макIэп.

Дэгъоу ыпэкIэ щешIэрэмэ Никола Влашич ащыщ, ау ар гупчэм ит ешIакIохэм ахэтэлъытэ. ЦСКА-м Федор Чаловым фэдэ ешIакIо иIэу къэлапчъэм Iэгуаор макIэу зэрэдидзэрэм упчIабэ къегъэтэджы.

ЦСКА-р «Химки» зыIокIэм, Влашич я 40-рэ такъикъым хъа­гъэм Iэгуаор дидзагъ. Кухарчук я 47-рэ такъикъым пчъагъэр зэфэдиз ышIыгъ — 1:1. Тилъэпкъэгъоу Мырзэ Резыуан дахэу ыкIи лъэшэу ЦСКА-м икъэ­лапчъэ дауи, хъагъэм Iэгуаор дидзагъ — 1:2. Я 54-рэ такъи­къым ЦСКА-м иешIакIоу Шку­риным уахътэр къызыфигъэфеди, къэлапчъэм Iэгуаор дидзагъ.

Пчъагъэм зэхъокIыныгъэ фа­шIы­нэу ешIакIохэм уахъти, амали яIагъ, ау текIоныгъэр зыми къыдихыгъэп.

ЦСКА-м хэгъэгум изэнэкъокъу апэрэ чIыпIэр бэрэ щиIыгъыгъэп. «Спартак» ащ едгъапшэмэ, мурад хэхыгъэ иIэу дышъэм фэ­банэ. Аужырэ ешIэгъухэм яна­хьыбэр Москва е къалэм пэгъу­нэгъоу зэрэщыриIэщтхэр къызыдэплъытэкIэ, дышъэр зыхьын зылъэкIыщтхэм «Спартак» ахэтэлъытэ.

«Спартак» дэгъоу ыпэкIэ ще­шIэн зылъэкIыщтэу хэтыр макIэп: Ларссон, Понсе, Соболев, Кокорин, Бакаев, нэмыкIхэри. «Спартак» «Тамбов» зыдешIэм, Ларссон ыкIи Понсе тIорытIо, Жиго зэ хъагъэм Iэгуаор да-дзагъ. Тренер шъхьаIэу Тедеско къызэриIуагъэу, командэр ишъып­къэу дышъэм фэбанэ.

«Зенит», «Спартак» ямурадхэр къыдгурэIох. «Ростов», «Крас­нодар» яешIакIэ уасэ ­фэшIыгъошIоп. Ауж къинэрэ «Уфар» Рос­тов-на-Дону щешIи, 1:0-у текIоныгъэр къыдихыгъ. Андрич хъагъэм Iэгуаор дахэу дидзагъ.

«Краснодар» 5:0-у Волгоград иешIакIохэм атекIуагъ. Ари я 14, 41-рэ такъикъхэм, Классон я 85, 90-рэ, Сулеймановым я 43-рэ такъикъхэм хъагъэм Iэгуаор дадзагъ. «Краснодар» Европэм и Кубок икъыдэхын фэгъэхьыгъэ ешIэгъухэм ахэлажьэ, ау Урысыем изэнэкъокъу чIыпIэу къыщыдихыщтыр Тхьэм нэмыкI ымышIэрэм фэд. Командэр нахь теубытагъэ хэлъэу ешIэ тшIоигъу. Аужырэ такъикъхэм икъэлапчъэ Iэгуаор къызэрэда­дзэрэм тегъэгумэкIы.

Адыгэхэм ятарихъ къалэу Шъачэ икоманди нахь дэгъоу ешIэн ылъэкIыщт. «Динамэр» «Арсенал» 1:0-у текIуи, апэ ишъы­гъэхэм нахь пытэу ахэу­цуагъ. Къэлапчъэм Iэгуаор дэзыдзагъэр Д. Фомин. «Локомотив» «Рубин» текIуагъэми, апэ итхэм шIэхэу ахэхьаным фэ­хьазырэп.

Зэтэгъапшэх

1. «Зенит» — 35 2. «Спартак» — 35 3. ЦСКА — 33 4. «Динамо» — 30 5. «Ростов» — 29 6. «Локомотив» — 28 7. «Шъачэ» — 27 8. «Ахмат» — 25 9. «Краснодар» — 24 10. «Рубин» — 24 11. «Урал» — 19 12. «Химки» — 19 13. «Арсенал» — 14 14. «Уфа» — 13 15. «Тамбов» — 12 16. «Ротор» — 8. Я 18-рэ ешIэгъухэр 11.12 «Химки» — «Арсенал» 12.12 «Ротор» — «Уфа» «Шъачэ» — «Спартак» «Зенит» — «Динамо» 13.12 «Тамбов» — «Рубин» «Краснодар» — «Локомотив» ЦСКА — «Урал» «Ахмат» — «Ротор».

Апэ ишъы зышIоигъохэр зэрэзэIукIэщтхэм зэнэкъокъур нахь гъэшIэгъон ышIыщт.