ЧIыпIэ тедзэ 260-рэ къызэIуахыщт
Непэрэ мафэм Адыгеим ит госпиталищымэ чIыпIэ 920-рэ яI. Тыгъэгъазэм и 15-м ехъулIэу джыри чIыпIэ тедзэ 260-рэ къызэIуахынэу агъэхьазыры.
Къэлэ сымэджэщым икорпусхэм ащыщ ищыкIэгъэ IофшIэнхэр щырагъэкIокIых. Мы мафэхэм кислороднэ системэхэм ягъэуцун рагъэжьэщт. Мы пстэури охътэ кIэкIым къыкIоцI зэшIуахынэу ыкIи зэпыу имыIэу кислородыр IэзэпIэ учреждением къыIэкIэхьаным анахьэу анаIэ тырагъэтынэу республикэм ипащэ пшъэрылъ къыгъэуцугъ. Адыгэ республикэм псауныгъэр къэухъумэгъэнымкIэ иминистрэу Мэрэтыкъо Рустем къызэриIуагъэмкIэ, бэмышIэу Мыекъуапэ къыщызэIуахыгъэ амбулаторнэ гупчэм пэтхъу-Iутхъу къызэутэкIыгъэ нэбгыри 100-м ехъу мафэм къеуалIэ. Ащ фэдэ гупчэ къызэIуахынэу джыри агъэнафэ. Ар урамэу Калининым ыцIэ зыхьырэм иунэу N 213-м (я 3-рэ поликлиникэр) тетынэу агъэнафэ.
— УплъэкIунымкIэ гъэIорышIапIэр «линие плъырхэм» шIуагъэу къатырэм лъыплъэнэу пшъэрылъ фэсэшIы. ИщыкIагъэ зыхъукIэ «Единэ Россием» ишъолъыр къутамэ, «ОНФ-р», общественнэ организациехэр, ныбжьыкIэ купхэр IэпыIэгъу афэхъунхэу къярэджэх. Ащ дакIоу амбулаторнэ сымаджэхэм игъом Iэзэгъу уцхэр аIэкIахьэмэ ыкIи коронавирусыр къызэутэкIыгъагъэмэ япсауныгъэ изытет зыфэдэм лъыплъэнхэ фае, — къыIуагъ КъумпIыл Мурат.
Абрэдж Сэтэнай.