«Онджэкъыр» нахь фабэ хъугъэ
Шъолъыр зэнэкъокъоу «2020-рэ илъэсым культурэм и Унэ анахь дэгъу» зыфиIорэр Адыгэ Республикэм щыкIуагъ.
Республикэ социальнэ шъхьэегъэзыпIэу «Онджэкъ» зыфиIорэр поселкэу Каменномостскэм дэт. Илъэс къэс щыIэныгъэм чIыпIэ къин ригъэуцогъэ зыныбжь имыкъугъэ кIэлэцIыкIу 30-м нэс охътэ гъэнэфагъэкIэ мыщ щыпсэунхэу къащэх.
Къэралыгъом къафитIупщырэ мылъкумкIэ шъхьэегъэзыпIэм Iоф ешIэ, джащ фэдэу онджэкъым волонтерхэр иIэпыIэгъушIух.
Илъэсищ хъугъэу компаниеу «Градиент» зыфиIорэм илIыкIохэр чIыпIэ къин ифэгъэ кIэлэцIыкIухэм (шъхьэегъэзыпIэм чIэсхэм) адэIэпыIэх. Ренэу мыхэм адэжь къэкIох, ящыкIагъэхэм, зыгъэгумэкIыхэрэм защагъэгъуазэ. Ащ нэмыкIэу спорт зэнэкъокъухэр ыкIи яуахътэ шIуагъэ къытэу агъэкIоным фытегъэпсыхьэгъэ Iофтхьабзэхэр афызэхащэх.
«Онджэкъыр» зытет чIыгур квадратнэ метрэ 900 фэдиз мэхъу. Компаниеу «Градиентымрэ» шъхьэегъэзыпIэмрэ япащэхэм зэзэгъыныгъэ зэрэзэдашIыгъэм тетэу унэр къэзыгъэфэбэрэ электрическэ хьакур агъэуцугъ.
— «Онджэкъым» тычIэхьан тлъэкIынэу Iизын къызытатыкIэ, кIэлэцIыкIухэм адэжь тыкIощт ыкIи электрическэ хьакум Iоф зэришIэрэм зыщыдгъэгъозэщт, — къыIуагъ компанием идиректорэу Александр Кучеренкэм.
ШъхьэегъэзыпIэм иIофышIэхэм оборудованиякIэу афагъэуцугъэм осэшIу фашIыгъ. Ахэм къызэраIуагъэмкIэ, псэуалъэм игъэфэбэн тефэщтыгъэ ахъщэр фэдиплIыкIэ нахь макIэ хъугъэ, унэхэри нахь фабэх. ЧъыIэ зэрэмылIэщтхэмкIэ джы яцыхьэ телъ.