Япчъагъэ Адыгеим щыхэхъуагъ
Адыгеим щыпсэухэрэм къызэIуахыгъэ унэе инвестиционнэ счетхэм (ИИС) япчъагъэ чъэпыогъум 300-кIэ нахьыбэ хъугъэ ыкIи мини 5,4-м нэсыгъ.
Москва ибиржэ къызэритырэмкIэ, унэе инвестиционнэ счет къызэIухыгъэнымкIэ Къыблэ федеральнэ шъолъырыр пштэмэ, республикэм я 5-рэ чIыпIэр ыIыгъ.
— Адыгеим щыпсэухэрэр чанэу биржэ инвестированием кIэупчIэх, кIэу къежьэрэр зэрагъашIэ. ГущыIэм пае, инвесторхэм я Дунэе тхьамафэ хахьэу, Урысыем и Банк зэхищагъэ Iофтхьабзэм республикэм щыпсэурэ нэбгырэ 700 фэдиз хэлэжьагъ. Мы лъэныкъомкIэ шIэныгъэу уиIэм емылъытыгъэу, инвестированиемкIэ тегушхоныгъэу щыIэхэри къыдэплъытэнхэ фае. ГущыIэм пае, унэе инвестиционнэ счетыр банкым ахъщэ иплъхьаным фэдэп, ащ ахъщэр страховать пшIыныр къыдыхэлъытагъэп.
Ащ къыхэкIыкIэ, финанс бэдзэрым хэлажьэрэм ИИС къызэIупхынэу зыкъыпфегъазэмэ ыкIи мылъкоу хаплъхьэрэм зи къемыхъулIэнэу къыуеIомэ, а операцием ишъыпкъагъэ уегупшысэн фае,— къыIуагъ Лъэпкъ банкым АдыгеимкIэ игъэIорышIакIоу С. Самойленкэм.
Хэбзэгъэуцугъэм къызэригъэнафэу, цIыф къызэрыкIом унэе инвестиционнэ счетыр къызфигъэфедэзэ илъэсым зэ ИИС-м иамалхэмкIэ миллионым мынахьыбэу зыфаем инвестицие хилъхьан ылъэкIыщт. ГущыIэм пае, цIыфым инвестициеу хилъхьагъэр сомэ мин 400-м нэсымэ, ащ ипроцент 13-р (сомэ мин 52-рэ) къыфызэкIагъэкIожьыщт е мы хахъомкIэ хэбзэIахьыр рагъэтыщтэп.