Илъэсныкъо къэс тилъэпкъ гъэзетэу «Адыгэ макъэм» кIэтхэнхэр зыщамыгъэгъупшэнэу цIыфхэм редакциер къяджэ.

Ащ емыкIу хэлъэп, къыхэкIы ащыгъупшэу е непэ-неущым хэтхэу, кIэтхэгъур аIэкIэкIэу. Шъыпкъэ, кIэтхапкIэр ямыIэуи мэхъу. Ари бгъэшIэгъонэу щы­тэп, тефэрэр макIэп. БлэкIыгъэ советскэ илъэсхэм джы афэ­дэжьэп. Бэдзэр зэфыщытыкIэм тызыхахьэм «зимыIэм яни фэхьакIэжьырэп» зыфаIорэм фэдэ хъугъэ типсэукIэ.

IофшIапIэ горэм Iутым лэ­жьэпкIэ тIэкIу къыраты, пенсионерхэми пенсие горэ къафэкIо. Ары шъхьай, унапкIи, газыпкIи, электроэнергием ыпкIи, псыпкIэри атынхэ фае. А зэкIэмэ афэмыхъоуи къыхэкIы. Арэу щытми, уиныдэлъфыбзэкIэ къы­дэкIырэ гъэзет закъор пщыгъуп­шэ мыхъущтэу сэлъытэ.

Илъэс къэс ащ кIатхэрэм ипчъагъэ нахь макIэ мэхъу. КъыхэкIыщтыгъ илъэсхэр минипшIым нэсэу. Сэ сишIошIыкIэ, мы Iофым Правительствэмрэ Къэралыгъо Совет — Хасэмрэ ыгъэгумэкIынхэ фае. Сыда пIо­мэ, ар ахэми ягъэзет. Сицыхьэ телъэу къэсэIо, адыгабзэкIэ къыдэкIырэ гъэзетым емыджэу ыкIи къыримытхыкIэу ахэтыр зэрэмымакIэр.

Лъэшэу сыгу къео «Адыгэ макъэм» фэгъэхьыгъэ гущыIэ мыщыоу къаIохэрэр зызэхэсхыхэкIэ. ГухэкI дэдэр, къизымытхыкIэу, емыджэу, зыфэдэри зымышIэхэрэр ащ тегущыIэхэу бэрэ къызэрэхэкIырэр ары. Адэ, мардж хъужьын, о уасэ зыфэмышIыжьымэ хэта къыпфэзы­шIыщтыр? УиныдэлъфыбзэкIэ къыдэкIырэ гъэзетыр уиунэ къимыхьэмэ, уемыджэмэ о ухэт? Уадыг ара?

Гъэзетхэм яджэхэрэр щыIэх, ау ахэри зэфэдэхэп. «Сэ урысыбз сызэреджэрэр, адыгэ гъэзетым сыфаеп» ыIоу урысыбзэкIэ тхыгъэр къыритхыкIымэ ригъэкъоу щыIэр бэ. Ащ фэдэ гупшысакIэ зиIэхэр къэзылъфыгъэр адыгэ бзылъфыгъэба, янэхэм бзэу аIулъыр адыгабзэба? Ащ фэдэу ныдэлъфыбзэр зымыгъэлъэпIэжьэу, къызхэкIыгъэр хъэтэпэмыхь зышIырэр лъэпкъым щымыщэу сэ сшъхьэ­кIэ сэлъытэ.

ТызызэхахьэкIэ адыгэ лъэпкъым зедгъэужьыжьыщтэу, титарихъ зыпкъ идгъэуцожьыщтэу, тыбзэ тырыгущыIэщтэу, дгъэлъэ­пIэщтэу, тилъэпкъэгъоу IэкIыбым щыIэхэр ячIыгужъ къэтщэжьыщтхэу тэIошъ тызэхэ­кIыжьы. Ау тызэрэзекIорэри, зэшIотхырэри, тлъэгъурэри фэшъхьафых.

Убзэ умышIэмэ убзаку, утхьамыкI, уиныдэлъфыбзэ пIэкIэмылъымэ уадыгэп, уасэ зыфэп­шIыжьырэп, шъхьакIо уиIэп. Уадыгэ унагъоу уилъэпкъ гъэзет, адыгабзэкIэ тхыгъэ тхылъхэм уямыджэрэмэ, къыпкIэхъухьэ­хэрэм лъэпкъ зэхашIэ ябгъэгъо­тыщтэп. Тикъуаджэ унэгъо шъищ Iэпэ-цыпэ дэс. Ащ щыщэу «Адыгэ макъэр» къизытхыкIырэр бгъур ары.

Гъэзетыр къызфыдэкIырэр, зыфэлажьэрэр лъэпкъыр ары. Уахътэм къыздихьырэ Iофхэм язэшIохын ар пылъ. Гъэзетым итеплъэ нахь дахэ, нахь дэгъу хъуным редакцием иIофышIэхэр фэбанэх. ШъхьакIо уиIэу, уадыгэу зыолъытэжьымэ, почтэм учIахьэу нэмыкIхэр къиптыхыкIыхэу, уиадыгэ гъэзет закъо къэбгъэнэныр хьайнапэ.

КIэтхэгъу къэс почтэм сэ­кIошъ, ащ фэдэ «адыгэ» горэм ренэу сырехьылIэ. «Адыгэ ма­къэр» пщыгъупшагъа?» къеупчIы почтэм иIофышIэ. Ынэ къэмыущакоу «ащ седжэн слъэ­кIырэп» къыреIожьы. ЗэрэзекIуагъэр сшIомытэрэзэу гущыIэ заулэ зесIокIэ «ОшIа, Сэфэр, оры ар зигъэзетыр, о кIатх, ащ пае гонорар къыуаты» къысе­Iожьы.

СыкIэгъожьырэп, сырэгушхо, синыдэлъфыбзэкIэ къыдэкIырэ гъэзетыр згъэлъапIэу илъэс 50-м ехъугъэшъ къисэтхыкIы зэкIэмэ апэу, хэзыгъэ фэсымы­шIэу седжэ, ары пакIошъ, сыфатхэ. Непэ семыджэу зыблэкIыкIэ зыгорэ чIэсынагъэм сыфэд. Аужыпкъэм письмэзехьэм семыжэу къещхыми, къесыми, чъыIэми, фабэми почтэм сэкIошъ къэсэхьыжьы.

Сэ къэзгъэшIагъэм, илъэс 85-м ситышъ, цIыф лъэпкъ сырихьылIагъэп иныдэлъфыбзэкIэ мыгущыIэу, емыджэшъоу. Сыдэу тыкIодыпэра тэ. Непэ тшхын тIэкIу, тщыгъын дгъотымэ икъу­гъэу тэлъытэ. Ау ар тэрэзэп. УбзэкIэ умыгущыIэныр, уины­дэлъфыбзэ умышIэныр насыпынчъагъ, тхьамыкIагъу, ащкIэ тхыгъэм уемыджэшъуныр емыкIушху.

ТышъолъэIу тиныдэлъфыбзэкIэ къыдэкIырэ гъэзет закъор шъумыгъэкIодынэу. Ар непэ чIэтынэмэ, илъэс зыбгъупшIыкIэ тиныдэлъфыбзэ тщыгъупшэжьыпэщт. «Адыгэ макъэр» лъэп­къым ынап, ыбзэ иухъумакIу.

ХЪОДЭ Сэфэр.

IофшIэным иветеран, гъэзетым иныбджэгъушIу. Хьалъэкъуай.