«Единэ Россием» ипроектэу «Федеральнэ ПолитСтартап» зыфиIорэм хэлажьэ зышIоигъохэм ятхын аухыгъ. Хэгъэгум ис нэбгырэ 6700-м ехъумэ яанкетэхэр къаIэкIагъэхьагъэх. ЛъэIу тхылъхэр нахьыбэу къыздикIыгъэхэр Москва, Московскэ хэкур, Санкт-Петербург, Ростов, Волгоград, Архангельскэ, Владимирскэ хэкухэр, Краснодар краир, Чэчэныр, Башкортостан ары. Нэбгырэ 44-рэ зы чIыпIэм фэбэнэщт.

Анкетэхэр къаIэкIэзгъэхьа­гъэхэм ащыщыбэхэр кIэлэегъа­джэх, врачых, студентых, волонтерых, сатыушIэх, гъэцэкIэкIо хабзэм икъулыкъухэм ащэлажьэх. Ятфэнэрэ пэпчъ депутат. Проектым хэлажьэ зышIоигъохэм япроцент 40-р бзылъфыгъэх, азыныкъо нахьыбэр административнэ гупчэу щымыт псэупIэхэм адэсых.

Проектым изэхэщакIохэм анкетэхэр яIэубытыпIэу ныбжьыкIэ нахь чанэу алъытэхэрэр апэрэ чэзыум къыщыхахыщтых. Мыщ дэжьым кандидатхэм политикэмкIэ гъэхъагъэу яIэхэр, проектэу агъэцэкIагъэхэр, къэбар жъугъэм иамалхэмрэ соц­медиамрэ зэпхыныгъэу адыряIэр къыдалъытэщтых.

Проектым хэлэжьэщт нэбгыри 150-р ятIонэрэ чэзыум къыщыхахыщт. «Единэ Россием» и Апшъэрэ партийнэ еджапIэ иэкспертхэм, политологхэм, политтехнологхэм, социологхэм, депутатхэм ахэр къыха­хыщтых. А нэбгыри 150-р Ап­шъэрэ партийнэ еджапIэм щагъэсэщт. Ахэм яегъэ­джэн тыгъэ­гъазэм рагъэжьэщт. ЯтIо­нэрэ модулыр мэлылъфэгъу — жъоныгъуакIэм зэхащэнэу ра­хъухьэ. Ушэтынхэр дэгъоу зыты­хэрэм зыгъэсэщтхэр къафагъэ­нэфэщтых, политтехнолог, политолог цIэрыIохэр арапхыщтых.

«Федеральнэ эксперт-политологхэм, гущыIэм пае, коммуникационнэ холдингэу «Минченко консалтингым» ипащэу Евге­ний Минченкэм, политическэ упчIэ­жьэгъухэм я Урысые ассоциацие ипрезидентэу Алексей Куртовым, «Единэ Россием» ипащэхэм, партием и Тхьаматэу Дмитрий Медведевым ахэр агъэсэщтых, — къыIуагъ «Еди­нэ Россием» хэдзынхэмкIэ и Гупчэ комиссие ипащэ игуадзэу, кадрэ политикэмкIэ ыкIи проектхэмкIэ ГъэIорышIапIэм ипащэу Роман Романовым. — Федеральнэ проектыр зытегъэ­псыхьагъэр партием хэтхэу ыкIи ащ къыдезыгъаштэхэу общественнэ-политикэ IофшIэнымкIэ опыт зиIэхэр, чыжьэу лъыкIотэн, цIыфхэм яфедэхэр къэзыгъэгъу­нэн, цыхьэ зыфашIын алъэкIыщтхэр къыхэгъэщыгъэнхэр ыкIи ахэм IэпыIэгъу афэхъугъэныр ары. ЗэIугъэкIэгъукIэмкIэ Къэралыгъо Думэм цIыфхэм яфе­дэхэр къыщызгъэгъунэн зылъэ­кIыщт кандидатхэр джарэущтэу къыхахын зэралъэкIыщтым сицыхьэ телъ».

Дмитрий Медведевым зэри­лъытэрэмкIэ, проектэу «ПолитСтартап» зыфиIорэм хэгъэгум ис ныбжьыкIэ мин заулэмэ политикэм екIурэ гъогур къафызэIуихыгъ. «Единэ Россием» ищыкIагъэхэр ныбжьыкIэ чанхэр, псынкIэу зиIоф зэпызыгъа­фэхэрэр ары.

«Врачхэр, кIэлэегъаджэхэр, общественнэ IофышIэхэр политикэм зэрэпыхьэхэрэм тэркIэ мэхьанэшхо иI. Анахь шъхьаIэр цIыфхэм яIофыгъохэм язэшIо­хынкIэ IэпыIэгъу аратыным ахэр фэхьазырынхэр ары. Сыда пIомэ, депутатыр ишъолъыр, икой илIыкIоу щыт, ащ пшъэрылъ шъхьаIэу иIэр хэдзакIохэм Iэпы­Iэгъу афэхъуныр ары. Федеральнэ, шъолъыр бюджетхэм мылъку къахагъэкIыным Iоф дишIэныр, цIыфхэм яIофыгъохэр зэшIуихынхэр, ахэм ягъусэу гъэцэ­кIэ­жьын, псэолъэшIын IофшIэнхэр зэрэкIохэрэм гъунэ алъифыныр ары. Ащ фэдэ кандидатхэр ары партиеми, цIыфхэми ящыкIагъэ­хэр», — къыIуагъ «Единэ Россием» и Генеральнэ совет исекретарэу Андрей Турчак.

«Проектэу «ПолитСтартап» зыфиIорэм хэлажьэ зышIоигъо­хэм ятхын аухыгъ, — къыIуагъ Урысые общественнэ организациеу «Единэ Россием и НыбжьыкIэ Гвардие» и Адыгэ шъо­лъыр къутамэ ипащэу, Мыекъуа­пэ идепутатэу Бэрзэдж Асиет. — Тиреспубликэ щыщ нэбгырэ 25-мэ анкетэхэр зэхагъэуцуагъэх. Илъэсищ хъугъэ проектыр зыпхыращырэр. Ар игъоу зэрэщытыр ыкIи шIуагъэ къызэритырэр щыIэныгъэм къыгъэлъэгъуагъ. Сэри апэу 2018-рэ илъэсым а проектым сыхэлэжьагъ, ныбжьыкIэ чанхэм акIуачIэ политикэм шаушэтыным­кIэ, политолог, технолог IэпэIа­сэхэм агъэсэнхэмкIэ ащ амалышIу къызэритырэр сшъхьэкIэ зэхэсшIагъ. ТеориемкIэ шIэныгъэу мыщ щызэзгъэгъотыгъэхэр, къулайныгъэу сIэ къыщизгъэхьагъэхэр сидепутат IофшIэнкIэ къысшъхьапэжьыгъэх. Анахь шъхьаIэр шIоигъоныгъэ зиIэ пстэури программэм хэлэжьэнхэ зэралъэкIыщтыр ары.

Партиеу «Единэ Россием» ипроектэу «ПолитСтартап» зы­фи­Iорэм хэлэжьэщтхэр зыгъа­сэхэрэм илъэсым икъихьагъу дэжь сахагъэхьагъ. Онлайн амалхэмкIэ проектым хэлажьэ­хэрэм Iофыгъо зэфэшъхьафхэмкIэ тадэгущыIагъэх. Ахэм ащыщэу зы нэбгырэ депутатэу ха­дзыгъ. АкIуачIэ аушэтынымкIэ, зыщылъыкIотэнхэ алъэкIыщт лъэныкъор къыхахынымкIэ мы проектыр ныбжьыкIэхэмкIэ Iэрыфэгъоу щыт».