ЦыхьэшIэгъоу ешIэрэм уегъэгушхо
Урысыер – Чехиер – 24:22 (15:13). Тыгъэгъазэм и 5-м Данием щызэдешIагъэх.
Европэм гандболымкIэ ибзылъфыгъэ командэхэм язэнэкъокъу Данием щэкIо. Командэхэр купи 4-у гощыгъэхэу пэшIорыгъэшъ зэIукIэгъухэм ахэлажьэх.
Урысыер Испанием 31:22-у зытекIом ыуж Чехием дешIагъ. ТикъэлэчъэIутхэу Виктория Калининамрэ Анна Седойкинамрэ цыхьэшIэгъоу ешIагъэх.
ЗэIукIэгъур заублэм, Чехием икомандэ 6:4-у зэнэкъокъур ыхьыщтыгъ. Мыекъуапэ щыщэу Виктория Калининам IэпэIэсэныгъэ ин къыгъэлъагъозэ, метри 7 хъурэ тазыр дзыныр къызэкIидзэжьыгъ, Чехием иешIакIохэр благъэу къекIухэу къызыхэкIыми, хъагъэм Iэгуаор даригъэдзагъэп. ЯтIонэрэ къэлэпчъэIутэу Анна Седойкинам иешIакIи тыгу рихьыгъ.
Къэлапчъэр дэгъоу къызэраухъумэрэм тиешIакIохэм ягуетыныгъэ къыIэтыгъ, нахьыбэрэ апэкIэ илъыхэу фежьагъэх. Пчъагъэр 17:17, 18:18.
Зэнэкъокъур кIэухым зыщыфэкIощт уахътэм Урысыер Чехием ыпэ ишъыгъ — 24:21. Чехиер пчъагъэм емызэгъэу текIоныгъэм фэбанэщтыгъ. Пчъагъэр 24:22-у зы такъикъ къызэнэм, тиешIакIохэм ухъумэн Iофыгъохэр дэгъоу агъэцэкIагъэх. Екатерина Ильинам Iэгуаор Чехием икомандэ къыIэкIихи, тиухъумакIохэм къаритыгъ, гумэкIыгъо тимыIэжьы хъугъэ.
ТиешIакIохэу гъогогъуи 3 хъагъэм Iэгуаор изыдзагъэхэр: Дарья Дмитриева, Юлия Манагарова, Дарья Самохина, Полина Ведехина.
Гъогогъуи 2 къэлапчъэм Iэгуаор дэзыдзагъэхэр: Владлена Бобровникова, Екатерина Ильина, Ксения Макеева, Валерия Маслова, Антонина Скоробогатченко. Ольга Фоминам ыкIи Кристина Кожокарь зырызэ хъагъэм Iэгуаор радзагъ.
Чехием иешIакIоу Маркета Ержабковам гъогогъуи 6 тикомандэ икъэлапчъэ Iэгуаор дидзагъ.
ЗэIукIэгъухэр
Испания – Швеция – 23:23, Румыния – Германия – 19:22, Норвегия – Польша – 35:22, Бельгия – Хорватия – 22:24, Франция – Черногория – 24:23, Дания – Словения – 30:23, Нидерланды – Сербия – 25:29, Германия – Норвегия – 23 – 42. ПэшIорыгъэшъ ешIэгъухэр шIэхэу аухыщтых, ау медальхэр зыхьыщтхэр нахь къэшIэгъуае мэхъу.
ЧIыпIэхэр
Урысыер купэу зыхэтым изэгъэпшэнхэр:
1. Урысыер — 4 2. Швециер — 3 3. Испаниер — 1 4. Чехиер — 0.
Тыгъуасэ Урысыер Швецием дешIагъ. Апэрэ чIыпIитIур зыхьыхэрэ командэхэр медальхэм афэбэнэщтхэм ащыщых.